നടപ്പ് സാമ്പത്തിക വര്‍ഷത്തെ ആദ്യ പണവായ്പ നയത്തില്‍ റിസര്‍വ് ബാങ്ക് നിരക്കുകളില്‍ മാറ്റം വരുത്തിയേക്കില്ല. കോവിഡ് വ്യാപനത്തെ തുടര്‍ന്നുള്ള സാമ്പത്തികാഘാതത്തില്‍ നിന്ന് സമ്പദ്ഘടന തിരിച്ചുവരവിന്റെ പാതയിലായതിനാലാണിത്.

അതേസമയം, ചരക്കുകളുടെ വിലവര്‍ധനമൂലം പണപ്പെരുപ്പ നിരക്കുകള്‍ ഉയരുന്നത് മോണിറ്ററി പോളിസി കമ്മറ്റിക്കു മുന്നില്‍ വെല്ലുവിളിയുയര്‍ത്തുന്നുണ്ട്. 2021 സാമ്പത്തിക വര്‍ഷത്തെ നാലാം പാദത്തില്‍ 5.2ശതമാനം നിരക്കിലായിരുന്നു ഉപഭോക്തൃ വില സൂചിക.

മഹാരാഷ്ട്ര, ഗുജറാത്ത്, മധ്യപ്രദേശ് എന്നീ സംസ്ഥാനങ്ങളിലെ വിവിധയിടങ്ങളില്‍ കോവിഡ് വ്യാപനത്തെതുടര്‍ന്ന് ഭാഗികമായി ലോക്ഡൗണ്‍ പ്രഖ്യാപിച്ചതുമൂലം ജനുവരിയിലെ വ്യാവസായികോത്പാദനം 1.6ശതമാനം ചുരുങ്ങിയത് തിരിച്ചടിയാണ്.

2019 ഫെബ്രുവരിക്കുശേഷം റിപ്പോനിരക്കില്‍ 2.50ശതമാനത്തിന്റെ കുറവാണു വരുത്തിയത്. ബുധനാഴ്ചയാണ് ആര്‍ബിഐ വായ്പനയം പ്രഖ്യാപിക്കുക.