രാജ്യത്തെ പെട്രോള്‍, ഡീസല്‍ വിലയില്‍ ഇന്ന്  മാറ്റമില്ല. വെള്ളിയാഴ്ച ഇന്ധന കമ്പനികള്‍ എണ്ണവില ഉയര്‍ത്തിയിരുന്നു. പെട്രോളിന് ലിറ്ററിന് 29 പൈസയും ഡീസലിന് 34 പൈസയുമാണ് വര്‍ധിപ്പിച്ചത്.

ഈ മാസം ഇത് എട്ടാമത്തെ തവണയാണ് ഇന്ധന വില കൂട്ടുന്നത്. എട്ട് ദിവസംകൊണ്ട് പെട്രോളിന് 2.16 രൂപയും ഡീസലിന് 2.74 രൂപയുമാണ് വര്‍ധിച്ചത്. കേരളത്തില്‍ ഇന്ന് ഒരു ലിറ്റര്‍ പെട്രോളിന് 94.07 രൂപയാണ് വില. ഡീസലിന് 88.95 രൂപയും.

കഴിഞ്ഞ ആഴ്ച തുടര്‍ച്ചയായ നാലു ദിവസം പെട്രോള്‍, ഡീസല്‍ വില വര്‍ധിച്ചിരുന്നു. ഈ മാസം രാജ്യതലസ്ഥാനത്ത് ഒരു ലിറ്റര്‍ പെട്രോളിന് 1.94 രൂപയും ഡീസലിന് 2.22 രൂപയുമാണ് കൂടിയത്.

ഡല്‍ഹിയില്‍ ഒരു ലിറ്റര്‍ പെട്രോളിന് 92.34 രൂപയും ഡീസലിന് 82.95 രൂപയുമാണ്. മുംബൈയില്‍ പെട്രോള്‍ വില 98.65 രൂപയാണ്. ഡീസല്‍ വില 90.11 രൂപയാണ്.

ജനുവരി, ഫെബ്രുവരി മാസങ്ങളില്‍ ഇന്ധന വില വര്‍ധിച്ചിരുന്നു. ഫെബ്രുവരി 27ന് ഇന്ധന വില റെക്കോര്‍ഡിലെത്തി. പിന്നീട് 24 ദിവസം വിലയില്‍ മാറ്റമില്ലാതെ തുടര്‍ന്നു. മാര്‍ച്ച് 24, 25 തീയതികളിലും മാര്‍ച്ച് 30നും വിലയില്‍ എണ്ണ കമ്ബനികള്‍ നേരിയ കുറവുവരുത്തി.