ഹൈദരാബാദിലെ ഏറ്റവും പ്രശസ്തമായ ബാലാപൂര്‍ ലഡ്ഡു ലേലത്തില്‍ വിറ്റ് പോയത് 18.90 ലക്ഷം രൂപയ്ക്ക്. ചരിത്രത്തിലെ തന്നെ ഏറ്റവും ഉയര്‍ന്ന തുകയാണിത്. 21 കിലോഗ്രാം തൂക്കം വരുന്ന ലഡ്ഡു ഇന്നലെയാണ് ലേലം ചെയ്തത്. തെലങ്കാനയിലെ നാടര്‍ഗുളില്‍ നിന്നുള്ള വ്യവസായി മാരി ശശന്‍ റെഡ്ഡിയും ആന്ധ്രാപ്രദേശ് ലെജിസ്ലേറ്റീവ് കൗണ്‍സില്‍ അംഗമായ രമേശ് യാദവും ആണ് ലഡ്ഡു സ്വന്തമാക്കിയത്.

1,116 രൂപയ്ക്കാണ് ലേലം ആരംഭിച്ചത്. ലേലത്തില്‍ പങ്കെടുക്കാന്‍ കൂടുതല്‍ ആളുകള്‍ രംഗത്തെത്തിയതോടെ വിലയും കുതിച്ചു. നൂറുകണക്കിനു ഭക്തര്‍ ലേലത്തിനായെത്തിയിരുന്നു. ആന്ധ്രാപ്രദേശ് മുഖ്യമന്ത്രി വൈ.എസ്. ജഗന്‍ മോഹന്‍ റെഡ്ഡിയ്ക്കുള്ള സമ്മാനമാണ് ലഡ്ഡുവെന്ന് യാദവ് പറഞ്ഞു. 2019 ല്‍ 17.60 ലക്ഷം രൂപയ്ക്ക് ലഡ്ഡു വാങ്ങിയ ബിസിനസുകാരനും കൃഷിക്കാരനുമായ കോളനു റാം റെഡ്ഡിയും ഈ വര്‍ഷം ലേലത്തില്‍ പങ്കെടുത്തിരുന്നു.

തെലങ്കാന വിദ്യാഭ്യാസ വകുപ്പ് മന്ത്രി പി. സബിത ഇന്ദ്ര റെഡ്ഡി, മുന്‍ എം.എല്‍.എ. ടി. കൃഷ്ണ റെഡ്ഡി തുടങ്ങി നിരവധി രാഷ്ട്രീയക്കാര്‍ ലേലത്തിന് സാക്ഷ്യം വഹിച്ചു. നഗരത്തിന്റെ പ്രാന്തപ്രദേശത്തുള്ള ബാലാപൂര്‍ ഗ്രാമത്തിലെ വാര്‍ഷിക ലേലം നഗരത്തിന്റെ വിവിധ ഭാഗങ്ങളിലൂടെ കടന്നുപോകുന്ന ഗണേശ നിമഞ്ജന ഘോഷയാത്രയുടെ ആരംഭമാണ്. തുടര്‍ന്ന് ഗണേശ വിശ്രഹം നഗരത്തിന്റെ ഹൃദയഭാഗത്തുള്ള ഹുസൈന്‍ സാഗര്‍ തടാകത്തില്‍ ഒഴുക്കും.

1994ല്‍ നടന്ന ആദ്യ ലേലത്തില്‍ 450 രൂപയ്ക്കാണ് ലഡ്ഡു വിറ്റ് പോയതെന്നു ബാലാപൂര്‍ ഗണേശ് ഉത്സവ സമിതി പറഞ്ഞു. അതിനുശേഷം ലേലം ജനപ്രീതിയിലും വിലയിലും വളര്‍ന്നു. ലേലത്തില്‍ ലഡ്ഡു സ്വന്തമാക്കുന്നവര്‍ക്ക് അഭിവൃദ്ധിയും സമ്പത്തും വന്നുചേരുമെന്നാണു വിശ്വാസം. അതിനാല്‍ തന്നെ ബിസിനസുകാര്‍- രാഷ്ട്രീയക്കാര്‍ തുടങ്ങി നിരവധി പേരാണ് ഓരോ വര്‍ഷവും ലേലത്തില്‍ പങ്കെടുക്കുന്നത്. 2018 ല്‍ 16.60 ലക്ഷം രൂപയ്ക്കാണ് ലഡ്ഡു ലേലം ചെയ്തത്. കഴിഞ്ഞ വര്‍ഷം കോവിഡ് -19 കാരണം പൊതു ആഘോഷങ്ങള്‍ ഇല്ലാത്തതിനാല്‍ ലേലം റദ്ദാക്കിയിരുന്നു.

1994 -ലെ ആദ്യ ലേലത്തില്‍ കോലാനു മോഹന്‍ റെഡ്ഡിയാണു ലഡ്ഡു വാങ്ങിയത്. തുടര്‍ന്നുള്ള അഞ്ചു വര്‍ഷവും അദ്ദേഹം തന്നെ ലേലത്തില്‍ വിജയിച്ചു. ലഡ്ഡു തനിക്ക് അഭിവൃദ്ധി കൊണ്ടുവന്നെന്നു റെഡ്ഡി വ്യക്തമാക്കിയതോടെ ലേലത്തിലേക്ക് ആളുകള്‍ ഒഴുകിയെത്തി. ലേല വിജയികള്‍ അവരുടെ കുടുംബത്തിനും സുഹൃത്തുക്കള്‍ക്കും ലഡ്ഡു പങ്കുവയ്ക്കുന്നതിനൊപ്പം അവശേഷിക്കുന്ന അവശിഷ്ടങ്ങള്‍ കൃഷിയിടങ്ങളിലും വ്യാപാര സ്ഥാപനങ്ങളിലും വീട്ടിലും വിതറും.