സോഷ്യൽ മീഡിയ ഭീമനും മാർക്ക് സുക്കർബർഗിന്റെ ഉടമസ്ഥതയിലുള്ളതുമായ ഫേസ്ബുക്ക് മാധ്യമം യുവാക്കൾ കൂട്ടത്തോടെ ഉപേക്ഷിക്കുന്നതായി റിപ്പോർട്ടുകൾ. 3400 അമേരിക്കൻ പൗരന്മാരായ ഫെയ്‌സ്ബുക്ക് ഉപഭോക്താക്കൾക്കിടയിൽ നടത്തിയ സർവ്വേയിലാണ് ഞെട്ടിക്കുന്ന റിപ്പോർട്ടുകൾ പുറത്തു വന്നത്.

മെയ്, ജൂൺ എന്നീ മാസങ്ങളിലായിരുന്നു സർവ്വേ നടത്തിയത്. എന്നാൽ കഴിഞ്ഞ വർഷം 18നും 29നും ഇടയിൽ പ്രായമുള്ള 44 ശതമാനം പേർ അവരുടെ ഫോണിൽ നിന്ന് ഫെയ്സ്ബുക്ക് ആപ്പ് ഡിലീറ്റ് ചെയ്തതായാണ് സർവ്വെയിലെ കണ്ടെത്തൽ. അതേസമയം ചിലർ ആപ്പ് പിന്നീട് റീ ഇൻസ്റ്റാൾ ചെയ്തിട്ടുമുണ്ട്.

സർവെയിൽ പങ്കെടുത്ത 26 ശതമാനം പേരും ഫെയ്സ്ബുക്ക് ആപ്പ് ഡിലീറ്റ് ചെയ്തിട്ടുണ്ട്. 42 ശതമാനം പേർ ഫെയ്സ്ബുക്കിൽ നിന്ന് ചെറിയൊരു ഇടവേള എടുത്തിട്ടുണ്ട്. 54 ശതമാനം പേർ അവരുടെ പ്രൈവസി സെറ്റിംഗ് അഡ്ജസ്റ്റ് ചെയ്തിട്ടുണ്ട്.

എന്നാൽ ഫെയ്സ്ബുക്ക് ആപ്പിൽ നിന്ന് മാത്രമാണ് കൂട്ടക്കൊഴിഞ്ഞുപോക്ക്. ഫെയ്സ്ബുക്കിന്റെ ഉടമസ്ഥതയിലുള്ള ഇൻസ്റ്റഗ്രാം, വാട്സ്ആപ്പ്,മെസഞ്ചർ എന്നിവയെ ഇത് ബാധിച്ചിട്ടില്ല. ധാരാളം ഫേസ്ബുക്ക് ഉപയോക്താക്കൾ കമ്പനിയുടെ ബുദ്ധിമുട്ടുകൾ ശ്രദ്ധിക്കുന്നുണ്ടെന്നും സർവെയിൽ നിന്ന് വ്യക്തമായി.

ഫെയ്സ്ബുക്കുമായി ബന്ധപ്പെട്ടുയർന്ന വിവാദങ്ങൾ ഫെയ്സ്ബുക്കിന്റെ സാമ്പത്തിക അവസ്ഥയെയും ബാധിച്ചിട്ടുണ്ടെന്നാണ് വിവരം. കമ്പനിയുടെ സ്റ്റോക്കിലും ഇടിവുണ്ടായിട്ടുണ്ട്. അതേസമയം ഫെയ്സ്ബുക്ക് ഇക്കാര്യത്തിൽ ഇതുവരെ പ്രതികരിച്ചിട്ടില്ല.