ബ്രിട്ടനിലേക്ക് വിദേശ നഴ്‌സുമാരുടെ റിക്രൂട്ട്‌മെന്റിന് ആവശ്യമായ ഇംഗ്ലീഷ് പ്രാവീണ്യ പരീക്ഷകളിൽ ഇളവ് പ്രഖ്യാപിച്ചു. വിദേശത്ത് നിന്ന് കൂടുതൽ നഴ്സുമാരെ എത്തിച്ച് എൻഎച്ച്എസ് ഉൾപ്പെടെയുള്ള ആരോഗ്യമേഖലയിലെ നഴ്സുമാരുടെ ക്ഷാമം പരിഹരിക്കാനാണ് നഴ്സിങ് ആൻഡ് മിഡ്വൈഫറി കൗൺസിൽ (എൻഎംസി) ഇത്തരമൊരു തീരുമാനമെടുത്തത്. ഇംഗ്ലീഷ് പ്രാവീണ്യ പരീക്ഷയ്ക്ക് യോഗ്യത നേടാതെ ബ്രിട്ടനിലെത്തി കെയററായി ജോലി ചെയ്യുന്ന നഴ്സുമാർക്ക് ഭാവിയിൽ എൻഎംസി രജിസ്ട്രേഷൻ സാധ്യമാക്കും.

ബുധനാഴ്ച ചേർന്ന കൗൺസിൽ യോഗത്തിലാണ് ഇതു സംബന്ധിച്ച തീരുമാനങ്ങൾ കൈക്കൊണ്ടത്. ഈ തീരുമാനങ്ങൾ 2023 ജനുവരി മുതൽ പ്രാബല്യത്തിൽ വരും.

നിലവിൽ യുകെയിൽ കെയറർമാരായി ജോലി ചെയ്യുന്ന നഴ്‌സുമാർക്ക് അവരുടെ നഴ്‌സിംഗ് പഠനങ്ങളും പരീക്ഷകളും ഇംഗ്ലീഷിലായിരുന്നു എന്നതിന് തെളിവ് നൽകാനും അവരുടെ നിലവിലെ തൊഴിൽ ദാതാവിന് അവരുടെ ഇംഗ്ലീഷ് പരിജ്ഞാനം സാക്ഷ്യപ്പെടുത്താനും കഴിയും. നിങ്ങൾക്ക് രജിസ്ട്രേഷനുമായി മുന്നോട്ട് പോകാം എന്നതാണ് ഏറ്റവും വലിയ മാറ്റം. തൊഴിലുടമയുടെയോ ബോസിന്റെയോ ഈ സാക്ഷ്യപ്പെടുത്തലും റഫറൻസും എങ്ങനെയായിരിക്കണം എന്നതിനെക്കുറിച്ചുള്ള വിശദമായ മാർഗ്ഗനിർദ്ദേശങ്ങൾ മൂന്ന് മാസത്തിനുള്ളിൽ തയ്യാറാക്കും. തൊഴിൽ ചെയ്യുന്ന സ്ഥാപനത്തിൽ നേതൃസ്ഥാനത്തുള്ള ഒരാൾക്ക് ഈ സാക്ഷ്യപ്പെടുത്തലിന് അർഹതയുണ്ട്. അതേ സ്ഥാനത്തുള്ള മറ്റൊരാൾ അതിനെ പിന്തുണയ്ക്കുകയും വേണം. അവർക്ക് എൻഎംസി രജിസ്ട്രേഷനും ഉണ്ടായിരിക്കണം.

ചുരുക്കത്തിൽ, ബ്രിട്ടനിൽ നഴ്‌സായി ജോലി ചെയ്യാൻ IELTS അല്ലെങ്കിൽ OET പരീക്ഷ പാസാകണമെന്ന കർശന നിബന്ധന നീക്കം ചെയ്യും.

OET, IELTS പരീക്ഷ എഴുതുന്നവർക്കുള്ള ക്ലബിംഗ് ഇളവുകൾ കൂടുതൽ ഉദാരമാക്കി. ആറുമാസത്തിനുള്ളിൽ എഴുതിയ പരീക്ഷകളുടെ മാർക്ക് ഒന്നായി എണ്ണാൻ ഇതുവരെ അവസരമുണ്ടായിരുന്നു. ഇത് 12 മാസമായി ഉയർത്തും. ഒന്നോ രണ്ടോ മൊഡ്യൂളുകൾക്ക് മതിയായ സ്കോർ ലഭിക്കാതെ ഒന്നിലധികം തവണ പരീക്ഷയെഴുതിയ മലയാളികൾ ഉൾപ്പെടെ പതിനായിരക്കണക്കിന് ഇന്ത്യൻ നഴ്സുമാർക്ക് ഇത് പ്രയോജനപ്പെടും.

നിലവിൽ യുകെയിലെത്താൻ അപേക്ഷിക്കുന്നവർക്ക് ഐഇഎൽടിഎസിന് ലിസനിംങ്, സ്പീക്കിംങ്, റീഡിംങ് മൊഡ്യൂളുകൾക്ക് ബാൻഡ് ഏഴും റൈറ്റിംങ്ങിന് 6.5 ബാൻഡും ആണ് വേണ്ടത്. ഒഇടിക്ക് സ്പീക്കിംങ് ലിസനിങ് റീഡിങ് എന്നിവയ്ക്ക് ബിയും റൈറ്റിങ്ങിന് സി പ്ലസ്സ് സ്കോറും വേണം. ഇതിൽ ഒരു മൊഡ്യൂളിന് സ്കോർ കുറഞ്ഞാൽ ആറുമാസത്തിനുള്ളിൽ എഴുതിയ പരീക്ഷയെഴുയുടെ റിസൾട്ടുമായി ക്ലബ്ബ് ചെയ്യാനുള്ള അവസരമാണ് ഒരുവർഷമായി ഉയർത്തിയിരിക്കുന്നത്.