മുന്‍കാല ബോളിവുഡ് നടി സാധനാ ശിവദാസനി അന്തരിച്ചു. അര്‍ബുദ രോഗത്തെ തുടര്‍ന്ന് മുംബൈയിലെ ഹിന്ദുജ ആശുപത്രിയിലായിരുന്നു സാധനയുടെ അന്ത്യം. 74 വയസായിരുന്നു.

മേരാ സായ, വോ കോന്‍ തി, വക്ത് തുടങ്ങിയ ചിത്രങ്ങളിലൂടെ ബോളിവുഡില്‍ ശ്രദ്ധേയയായ സാധനയുടെ ഫ്രിഞ്ജ് ഹെയര്‍സ്‌റ്റൈല്‍ അക്കാലത്തെ തന്നെ ട്രേഡ് മാര്‍ക്കുകളിലൊന്നായിരുന്നു. സാധന കട്ട് എന്ന പേരില്‍ അറിയപ്പെടുകയും അക്കാലത്തെ കോളേജ് കുമാരികള്‍ അനുകരിക്കുകയും ചെയ്തു ഫ്രിഞ്ജ് ഹെയര്‍ സ്‌റ്റൈല്‍.

സാധനയുടെ ഹെയര്‍ സ്‌റ്റൈല്‍ ശ്രദ്ധ നേടിയത് 1960-ല്‍ ആര്‍.കെ.നയ്യാര്‍ സംവിധാനം ചെയ്ത ലവ് ഇന്‍ സിംല എന്ന സിനിമയിലൂടെയാണ്. ഹോളിവുഡ് നടി ഓഡ്രി ഹെപ്‌ബേണിന്റെ ഹെയര്‍സ്‌റ്റൈലില്‍ നിന്നാണ് സാധന ഇത് പരുവപ്പെടുത്തിയത്. പിന്നീട് ഈ നയ്യാരുമായി പ്രണയത്തിലായ സാധന അദ്ദേഹത്തെ 1966-ല്‍ വിവാഹം ചെയ്തു. ഈ ദമ്പതികള്‍ക്ക് മക്കളില്ല.

 ദേവാനന്ദിനൊപ്പം ഹം തുനോ, അസ്ലി നഖലി എന്നീ ചിത്രങ്ങളിലും അവര്‍ നായികയായി. 1963 ല്‍ സാധന അഭിനയിച്ച ടെക്‌നി കളര്‍ ചിത്രമായ മേരെ മെഹ്ബൂബ് വന്‍വിജയം നേടി. 1964ല്‍ അഭിനയിച്ച കോന്‍ തീ എന്ന വേഷം സാധനയുടെ കരിയറിലെ ഏറ്റവും മികച്ചതായാണ് വിലയരുത്തപ്പെടുന്നത്.

നായികയായി അവസരങ്ങള്‍ കുറഞ്ഞതോടെ അഭിനയത്തില്‍ നിന്ന് പിന്‍വാങ്ങി. പിന്നീട് ഭര്‍ത്താവിനൊപ്പം നിര്‍മ്മാണ കമ്പനി തുടങ്ങി. അഭിനയത്തില്‍ നിന്ന് പിന്മാറിയതിനു ശേഷം ഒരിക്കലും തന്റെ ചിത്രം പകര്‍ത്താന്‍ സമ്മതിച്ചിരുന്നില്ല. പഴയ ഹെയര്‍ സ്‌റ്റൈലില്‍ താന്‍ അറിയപ്പെട്ടാല്‍ മതിയെന്നായിരുന്നു അവരുടെ ആഗ്രഹം.

ബോളിവുഡ് സിനിമാലോകം സാധനയ്ക്ക് ആദരാഞ്ജലി അര്‍പ്പിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha