സിനിമാ പ്രേമമുള്ളവരുടെ ആദ്യത്തെ ലക്ഷ്യം എങ്ങനെയെങ്കിലും സിനിമയിലെത്തിപ്പെടുകയെന്നതാണ്. പിന്നീട് നടനായോ തിരക്കഥാകൃത്തായോ അസിസ്റ്റന്റ് ഡയറക്ടറോ ഒക്കെയായി വളര്‍ന്നു കഴിഞ്ഞ് പിന്നീട് ആഗ്രഹം വരുന്നത് സംവിധാനത്തിലാണ്. അങ്ങനെ സംവിധായകരായ നടന്മാരും നടിമാരും മലയാള സിനിമയിലേറെയുണ്ട്. യുവതാരങ്ങളില്‍ പലരും മുതിര്‍ന്ന താരങ്ങളേക്കാള്‍ മുന്‍പേ സംവിധായകരായി കഴിഞ്ഞു. അതിലൊരാളാണ് പൃഥ്വിരാജ്. പൃഥ്വിരാജിന്റെ ആദ്യചിത്രമായ ലൂസിഫറിനായുള്ള കാത്തിരിപ്പിലാണ് ആരാധകര്‍.

മലയാള സിനിമയില്‍ കഴിഞ്ഞ 30 വര്‍ഷമായി നിറഞ്ഞു നില്‍ക്കുന്ന മോഹന്‍ലാലാണ് ലൂസിഫറിലെ നായകന്‍. ഇത്രയും വര്‍ഷം സിനിമാ ലോകത്ത് നിന്നിട്ടും ലാലേട്ടനെന്താ സംവിധാനം ചെയ്യാത്തതെന്നാണിപ്പോള്‍ ആരാധകരുടെ ചോദ്യം. നായകനടനെന്ന നിലയില്‍ തിരക്കുള്ള സമയത്ത് ആണ് പൃഥ്വിരാജ് സംവിധായകനായി എത്തുന്നത്. മോഹന്‍ലാല്‍ തന്നെ ഇക്കാര്യം എടുത്ത് പറഞ്ഞിട്ടുണ്ട്. നായകനായി തിരക്കുള്ള ഒരു നടന്‍ സംവിധായകനാകുന്നത് അപൂര്‍വ്വമായിരിക്കും എന്ന് മോഹന്‍ലാല്‍ പറഞ്ഞിരുന്നു. മോഹന്‍ലാല്‍ സംവിധായകനാകാന്‍ ആഗ്രഹിക്കുന്നുണ്ടോ എന്ന ചോദ്യത്തിന് ഇല്ലെന്നാ്ണ് ഉത്തരം.

നമുക്ക് ഒരുപാട് മിടുക്കരായ സംവധായകര്‍ ഉണ്ട്. പിന്നെന്തിനാണ് ഞാന്‍ സംവിധാനം ചെയ്ത് മോശമാക്കുന്നത്. നടനാകുന്നതു പോലെയല്ല സംവിധായകനാകുന്നത്. അഭിനയത്തില്‍ നിന്നെല്ലാം മാറി നിന്നു കൊണ്ട് ചെയ്യേണ്ട കാര്യമാണ്. അത്രയ്ക്കും പഠനം വേണ്ട കാര്യമാണെന്നും മോഹന്‍ലാല്‍ പറയുന്നു. സംവിധായകനാകാന്‍ ഡിസൈന്‍ ചെയ്ത ആള്‍ക്കാരുണ്ട്. അവര്‍ക്കൊപ്പം പോവുകയാണ് നല്ലതെന്നും മോഹന്‍ലാല്‍ പറയുന്നു. സിനിമയില്‍ എന്തൊക്കെ കാര്യങ്ങളാണ് സംവിധായകന്‍ ചെയ്യുന്നത്. കഴിഞ്ഞ ദിവസം മുന്നോറോളം പേരാണ് മരയ്ക്കാറിന്റെ സെറ്റില്‍ ഉണ്ടായിരുന്നത്. എല്ലാവരും നീങ്ങുന്നത് പ്രിയദര്‍ശന്‍ എന്ന സംവിധായകനിലേക്കാണ്. ഒട്ടും റിലാക്‌സ്ഡ് അല്ല അത്. സിനിമ ഇറങ്ങിക്കഴിയുമ്പോള്‍ പ്രിയന് രണ്ട് വയസ് കൂടും. കലാപാനി സംവിധാനം ചെയ്തു കഴിഞ്ഞതോടെയാണ് അയാള്‍ നരയ്ക്കാന്‍ തുടങ്ങിയത്. ഓരോ സീനും മികച്ചതാക്കാനാണ് അവരുടെ ശ്രമം' മോഹന്‍ലാല്‍ പറഞ്ഞത്.