മലയാളത്തിലെ ഏറ്റവും മികച്ച കുറ്റാന്വേഷണ ചിത്രങ്ങളില്‍ മമ്മൂട്ടിയുടെ സിബിഐ പരമ്പരയുമുണ്ട്. ഒരു സിബിഐ ഡയറിക്കുറിപ്പ്, ജാഗ്രത, സേതുരാമയ്യര്‍ സിബിഐ, നേരറിയാന്‍ സിബിഐ എന്നിവയ്ക്കു ശേഷം 14 വര്‍ഷങ്ങള്‍ക്കിപ്പുറം അഞ്ചാം ഭാഗം എത്തുകയാണ്. കെ.മധു- എസ്.എന്‍ സ്വാമി ഹിറ്റ് കൂട്ടുകെട്ടില്‍ ചിത്രമൊരുങ്ങുന്നത്. നേരത്തെ തന്നെ ചിത്രം 2019 ല്‍ ഇറങ്ങുമെന്ന റിപോര്‍ട്ടുകള്‍ ഉണ്ടായിരിന്നു.

സംവിധായകന്‍ കെ.മധുവിന്റെ ഫേസ്ബുക്ക് പോസ്റ്റിലൂടെയാണ് ചിത്രത്തിന്റെ വര്‍ക്കുകള്‍ നടക്കുന്നതായി അറിയിച്ചിരിക്കുന്നത്.
കെ മധുവിന്റെ സ്വന്തം നിര്‍മാണ കമ്പനിയായ കൃഷ്ണകൃപ ഫിലിംസായിരിക്കും ചിത്രം നിര്‍മ്മിയ്ക്കുക. മമ്മൂട്ടിയെ തന്നെ നായകനാക്കി അഞ്ചാം ഭാഗം വരുന്നതോടെ ലോകസിനിമയില്‍ തന്നെ ഇതൊരു റെക്കാര്‍ഡായി മാറുമെന്നാണ് കരുതുന്നത്. മധു-മമ്മൂട്ടി-സ്വാമി കൂട്ടുകെട്ടില്‍ വീണ്ടും ഒരു ചിത്രം എത്തുമ്പോള്‍ പ്രേക്ഷരുടെ പ്രതീക്ഷ വളരെ വലുതാണ്.

1988 ല്‍ പുറത്തിറങ്ങിയ 'ഒരു സിബിഐ ഡയറി കുറിപ്പ്' എന്ന ചിത്രമാണ് സി.ബി.ഐ ചിത്രങ്ങളിലെ ആദ്യ ചിത്രം. ആക്കാലത്തു വലിയ വിജയമായി മാറിയ ചിത്രത്തിന്റെ രണ്ടാം ഭാഗം തൊട്ടടുത്ത വര്‍ഷം തന്നെ ഉണ്ടായി 'ജാഗ്രത'യാണ് രണ്ടാം ചിത്രം. എന്നാല്‍ മൂന്നാം ചിത്രം സേതുരാമയ്യര്‍ സിബിഐ 2004 ല്‍ 16 വര്‍ഷങ്ങള്‍ക്ക് ശേഷമാണ് ഇറങ്ങിയത്. നാലാം ഭാഗം നേരറിയാന്‍ സിബിഐ 2005 ലും റിലീസ് ആയി. ഇപ്പോഴിതാ 14 വര്‍ഷങ്ങള്‍ക്ക് ശേഷം സിബിഐ വീണ്ടും എത്തുകയാണ്. എന്നാല്‍ ചിത്രത്തെ കുറിച്ചുള്ള കൂടുതല്‍ വിവരങ്ങള്‍ പുറത്തു വിട്ടട്ടില്ല.

കെ മധുവിന്റെ നിര്‍മാണ കമ്പനിയായ കൃഷ്ണകൃപ ഫിലിംസ് വീണ്ടും നിര്‍മ്മാണ രംഗത്തേക്ക് വരുന്നതായും അദ്ദേഹം ഫേസ്ബുക്ക് പോസ്റ്റിലൂടെ അറിയിച്ചു. രണ്ടു ചിത്രങ്ങളാണ് 2019 ല്‍ നിര്‍മ്മിക്കുന്നത്.എം പദ്മകുമാര്‍ സംവിധാനം ചെയ്യുന്ന ചിത്രവും,അരുണ്‍ ഗോപിയുടെ സിനിമയുമാണ് ഈ രണ്ടു നിര്‍മ്മാണങ്ങള്‍ എന്നും അദ്ദേഹം വ്യക്തമാക്കി