ക്വീന്‍ എന്ന ആദ്യ ചിത്രത്തിലൂടെ തന്നെ മലയാളികള്‍ക്ക് പ്രിയങ്കരനായി മാറിയ യുവതാരം ധ്രുവിനെ മമ്മൂട്ടിയുടെ മാമാങ്കത്തില്‍ നിന്ന് അപ്രതീക്ഷിതമായി പുറത്താക്കിയത് ഏറെ വിമര്‍ശനങ്ങള്‍ക്ക് വഴിവെച്ചിരിക്കുകയാണ്. പകരം ഉണ്ണിമുകുന്ദനാകും ആ വേഷം ചെയ്യുകയെന്നും സൂചനയുണ്ട്. സിനിമയില്‍ നിന്ന് പുറത്താക്കപ്പെട്ട ധ്രുവിന് പിന്തുണയറിയിച്ച് നടന്‍ ഷമ്മി തിലകന്‍ രംഗത്തെത്തി.

'അഭിനയിച്ച സിനിമയില്‍ നിന്നും പുറത്താക്കപ്പെട്ട സ്ഥിതിക്ക് പെന്‍ഷന്‍ കിട്ടാനുള്ള യോഗ്യത ധ്രുവന് ഉണ്ട്' എന്നതരത്തില്‍ താര സംഘടനെയെ പരിഹസിച്ചുകൊണ്ടാണ് ഷമ്മിയുടെ ഫേസ്ബുക് പോസ്റ്റ്. തന്റെ അച്ഛന്‍ തിലകന്‍ സിനിമാ രംഗത്തു നിന്നു നേരിട്ട അവഗണസകളെയും വിലക്കുകളേയും ഓര്‍മ്മിപ്പിക്കുന്നതു കൂടിയാണ് ഷമ്മി തിലകന്റെ പോസ്റ്റ്.

'അഭിനയിച്ച സിനിമയില്‍ നിന്നും പുറത്താക്കപ്പെട്ട സ്ഥിതിക്ക് ; ''സ്തുത്യര്‍ഹമായ പ്രവര്‍ത്തനങ്ങളെ മാനിച്ച്'' മാസം തോറും 5000 രൂപ കൈനീട്ടം (പെന്‍ഷന്‍) കിട്ടാനുള്ള യോഗ്യത ധ്രുവന്‍ എന്ന പുതുമുഖനടന്‍ തുടക്കത്തില്‍ തന്നെ നേടിയതായി കരുതേണ്ടതാണ് എന്ന് അനുഭവം ഗുരു സ്ഥാനത്തുള്ളതിനാല്‍ ഞാന്‍ സാക്ഷ്യപ്പെടുത്തുന്നു.' എന്നാണ് ഷമ്മി തിലകന്‍ പറയുന്നത്.

ആദ്യ ചിത്രത്തിലൂടെ തന്നെ ശ്രദ്ധേയനായ നടനാണ് ധ്രുവ്. ക്വീനിന്റെ വിജയശേഷം മാമാങ്കത്തിന് വേണ്ടി ധ്രുവന്‍ മറ്റു ചിത്രങ്ങള്‍ ഒന്നും തന്നെ ഏറ്റെടുത്തിരുന്നില്ല. ഏകദേശം ഒരു വര്‍ഷത്തോളമാണ് ധ്രുവന്‍ ഈ ചിത്രത്തിനായി മാറ്റി വെച്ചിരുന്നത്. ചിത്രത്തിനായി കളരി പഠിക്കുകയും, ബോഡി മേക്ക് ഓവര്‍ നടത്തുകയും ചെയ്തിരുന്നു. എന്നാല്‍ വളരെ അപ്രതീക്ഷിതമായാണ് താരത്തെ ചിത്രത്തില്‍ നിന്ന് ഒഴിവാക്കിയത്. ചിത്രത്തില്‍ നിന്ന് തന്റെ അറിവോടെയല്ല താരത്തെ പുറത്താക്കിയതെന്നും സംവിധായന്‍ സജീവ് പിള്ള നേരത്തെ പ്രതികരിച്ചിരുന്നു.

ധ്രുവ് 'അമ്മ' സംഘടനയില്‍ അംഗമല്ലാത്തതിനാല്‍ ഈ വിഷയത്തില്‍ ഇടപെടാനാകില്ലെന്നും ,ഇങ്ങനെ ഒരു കാര്യം അറിഞ്ഞാട്ടില്ലെന്നുമായിരുന്നു 'അമ്മ' ജനറല്‍ സെക്രട്ടറി ഇടവേള ബാബുവിന്റെ പ്രതികരണം.