'ദൃശ്യം 2ല് മോഹന്ലാല് അവതരിപ്പിച്ച കോടതിക്കുള്ളില് സൃഷ്ടിച്ച ട്വിസ്റ്റ് കണ്ട് ഉച്ചത്തില് ചിരിച്ചുപോയി. ഇതുവരെ കാണാത്തവര് ദൃശ്യം 1 മുതല് കാണുക....' ദൃശ്യത്തിന്റെ രണ്ടാം ഭാഗം കണ്ട അനുഭവം പങ്കുവെച്ച് ഇന്ത്യന് ക്രിക്കറ്റ് താരം ആര്.അശ്വിന്
മലയാള ചിത്രം ദൃശ്യത്തിന്റെ രണ്ടാം ഭാഗം കണ്ട് മോഹന്ലാലിന്റെ ജോര്ജ്കുട്ടിയുടെ ആരാധകരായി മാറിയവർ ഒട്ടനവധിയാണ്. ഇപ്പോഴിതാ ആ കൂട്ടത്തില് ഒരു ക്രികെറ്റ് താരം കൂടി എത്തിയിരിക്കുന്നു. ഇംഗ്ലന്ഡിനെതിരായ രണ്ടാം ക്രികെറ്റ് ടെസ്റ്റില് ഇന്ത്യന് വിജയശില്പിയായ തമിഴ്നാട്ടുകാരന് സ്പിനര് രവിചന്ദ്രന് അശ്വിനാണ് ദൃശ്യം 2 കണ്ട് ആകൃഷ്ടനായി എത്തിയിരിക്കുന്നത്. ചിത്രം തകര്പ്പനാണെന്നും ഇതുവരെ കാണാത്തവര് ദൃശ്യത്തിന്റെ ആദ്യഭാഗം മുതല് കാണണമെന്നും അശ്വിന് ട്വീറ്റ് ചെയ്യുകയുണ്ടായി.
'ദൃശ്യം 2ല് മോഹന്ലാല് അവതരിപ്പിച്ച കോടതിക്കുള്ളില് സൃഷ്ടിച്ച ട്വിസ്റ്റ് കണ്ട് ഉച്ചത്തില് ചിരിച്ചുപോയി. ഇതുവരെ കാണാത്തവര് ദൃശ്യം 1 മുതല് കാണുക. മികച്ച ചിത്രമാണ്. വളരെ മികച്ച ചിത്രം'- എന്നാണ് അശ്വിന് ട്വിറ്ററില് കുറിച്ചു.
കോവിഡ് വ്യാപനത്തിന്റെ പശ്ചാത്തലത്തില് ഒടിടി പ്ലാറ്റ്ഫോമില് റിലീസ് ചെയ്ത ദൃശ്യം 2 വളരെ മികച്ച പ്രേക്ഷക പ്രതികരണം നേടി മുന്നേറുകയാണ്. ജീത്തു ജോസഫാണ് ചിത്രത്തിന്റെ രണ്ടാം ഭാഗവും തിരക്കഥയെഴുതി സംവിധാനം ചെയ്തിരിക്കുന്നത്. മോഹന്ലാലും മീനയും കേന്ദ്ര കഥാപാത്രങ്ങളെ അവതരിപ്പിക്കുന്ന ചിത്രത്തില് സിദ്ധിഖ്, മുരളി ഗോപി, സായ്കുമാര്, ആശാ ശരത്, അന്സിബ ഹസന്, എസ്തേര് തുടങ്ങിയവരും പ്രധാന വേഷങ്ങളിലെത്തുന്നു.
https://www.facebook.com/Malayalivartha
