വാഹന അപകടത്തിൽ ഗുരുതരമായി പരിക്കേറ്റ ചികിത്സയിൽ കഴിഞ്ഞിരുന്ന യുവാവ് മരിച്ചു; ഭാര്യ ഗുരുതരാവസ്ഥയില്‍, നീണ്ട നാളത്തെ പ്രണയത്തിനൊടുവിൽ മൂന്ന് മാസം മുമ്പായിരുന്നു വിവാഹം
കൊല്ലം മണ്ണഞ്ചേരിയിൽ വാഹനാപകടത്തെ തുടർന്ന് ചികിത്സയിലായിരുന്ന യുവാവ് മരിച്ചു. മ‍ണ്ണഞ്ചേരി കാര്‍ത്തികയില്‍ അഖില്‍.കെ.കുറുപ്പാണ് (28) മരണപ്പെട്ടത്. അഖിലിനോടൊപ്പം വാഹനത്തിൽ സഞ്ചരിച്ച ഭാര്യ കാർത്തിക ഇപ്പോഴും ഗുരുതര അവസ്ഥയിലാണ്.
കഴിഞ്ഞ ഞായറാഴ്ച്ച ആയിരുന്നു അഖിലും ഭാര്യയും സഞ്ചരിച്ചിരുന്ന വാഹനം അപകടത്തിൽ പെട്ടത്. കൊല്ലം ബൈപ്പാസിന് സമീപത്ത് വെച്ച് എതിരെ വന്ന ടിപ്പർ ലോറി ബൈക്കിൽ ഇടിക്കുകയായിരുന്നു. വീട്ടിൽ നിന്നും ജോലി സ്ഥലത്തേയ്ക്ക് പോകവേ ആയിരുന്നു അപകടം സംഭവിച്ചത്.
കൊല്ലത്ത് ഒരു സ്വാകാര്യ സ്ഥാപനത്തിലെ ജീവനക്കാരനായിരുന്നു അഖിൽ. ഭാര്യ കാർത്തിക തിരുവനന്തപുരം മെഡിക്കൽ കോളേജിലെ എംബിബിഎസ്‌ വിദ്യാർത്ഥിയുമാണ്. ഇരുവരും അവധിക്കായി വീട്ടിലേക്കെത്തി മടങ്ങുകയായിരുന്നു.
ഗുരുതരമായി പരുക്കേറ്റ അഖിൽ മരണത്തിന് മുന്നിൽ ഇന്നലെ കീഴടങ്ങി. കാലിനും തലയ്ക്കും പരിക്കേറ്റ കാര്‍ത്തികയുടെ അവസ്ഥയും ഗുരുതരമായിരിക്കുകയാണ്. അഖിലിന്റെ മരണം ഇപ്പോഴും അറിയാതെ ആശുപത്രി കിടക്കയിലാണ് കാർത്തിക.
നീണ്ടനാളത്തെ പ്രണയത്തിനൊടുവില്‍ മൂന്ന് മാസം മുമ്പാണ് അഖിലും കാര്‍ത്തികയും വിവാഹിതരായത്. പുതുമോടി മായുന്നതിന് മുമ്പ് തന്നെ അപകടത്തിന്‍റെ രൂപത്തില്‍ മരണം അഖിലിനെ തേടിയെത്തി.
https://www.facebook.com/Malayalivartha
