ഒടുവിൽ അത് സംഭവിക്കുന്നു. മലയാളികളുടെ സ്വന്തം ലേഡി സൂപ്പർ സ്റ്റാർ മഞ്ജുവാര്യര്‍ ബോളിവുഡിലേക്ക് . ചിത്രത്തിന്റെ ഔദ്യോഗിക പ്രഖ്യാപനം ഉടനെ തന്നെയുണ്ടാകും. ചിത്രീകരണം ഈ മാസം തന്നെ തുടങ്ങുമെന്നാണ് സൂചനകൾ ലഭിക്കുന്നത്.

തെന്നിന്ത്യന്‍ താരം മാധവനാണ് ഈ ചിത്രത്തില്‍ മഞ്ജുവാര്യരുടെ നായകനായി എത്തുന്നത്.ഭോപ്പാലില്‍ നടന്ന ചിത്രത്തിന്റെ വര്‍ക്ക് ഷോപ്പില്‍ മഞ്ജുവാര്യര്‍ പങ്കെടുത്തു.

മമ്മൂട്ടിയോടൊപ്പം മഞ്ജുവാര്യര്‍ ആദ്യമായഭിനയിക്കുന്ന ദ പ്രീസ്റ്റ് നാളെ റിലീസ് ചെയ്യുകയാണ്. ഇന്നലെ കൊച്ചിയില്‍ നടന്ന പത്രസമ്മേളനത്തില്‍ മമ്മൂട്ടിക്കും ദ പ്രീസ്റ്റിന്റെ അണിയറ പ്രവര്‍ത്തകര്‍ക്കുമൊപ്പം മഞ്ജുവാര്യരും പങ്കെടുത്തു.

ഒരു ഹൊറർ മിസ്റ്റീരിയസ്-ത്രില്ലർ ചിത്രമാണ് ദി പ്രീസ്റ്റ്. ചിത്രത്തിന്റെ ടീസറും ഫസ്റ്റ് ലുക്ക് പോസ്റ്ററുമെല്ലാം പ്രേക്ഷകരുടെ ഇടയിൽ ഏറെ ശ്രദ്ധിക്കപ്പെട്ടിരുന്നു.

പത്രസമ്മേളനത്തിന് ശേഷം തൃശൂരിലേക്ക് പോയ മഞ്ജുവാര്യര്‍ വൈകിട്ട് അമ്മ ഗിരിജാ മാധവന്റെ കഥകളി അരങ്ങേറ്റച്ചടങ്ങില്‍ പങ്കെടുക്കുകയും ചെയ്തിരുന്നു .

നവാഗതനായ മഹേഷ് വെട്ടിയാര്‍ സംവിധാനം ചെയ്യുന്ന വെള്ളരിക്കാപ്പട്ടണമാണ് മലയാളത്തില്‍ മഞ്ജു വാര്യര്‍ അഭിനയിക്കുന്ന പുതിയ ചിത്രം. ഏപ്രില്‍ 15ന് ചേര്‍ത്തലയിലും പരിസരങ്ങളിലുമായി ചിത്രീകരണമാരംഭിക്കുന്ന ഈ ചിത്രത്തില്‍ സൗബിന്‍ ഷാഹിറാണ് നായകനായി എത്തുന്നത്.

ഈ വര്‍ഷം തന്നെ ഒരു തമിഴ് ചിത്രത്തിലും മഞ്ജുവാര്യര്‍ അഭിനയിക്കും. വെട്രിമാരന്‍ സംവിധാനം ചെയ്ത ധനുഷ് ചിത്രമായ അസുരനിലൂടെയാണ് മഞ്ജുവാര്യര്‍ തമിഴില്‍ അരങ്ങേറിയത്. അസുരനില്‍ മഞ്ജുവാര്യര്‍ അവതരിപ്പിച്ച പച്ചൈയമ്മാള്‍ എന്ന കഥാപാത്രം ഏറെ ശ്രദ്ധിക്കപ്പെട്ടിരുന്നു.

സഹോദരൻ മധുവാര്യർ സംവിധായകനാകുന്ന ലളിതം സുന്ദരത്തിന്റെ ഡബ്ബിംഗ് മഞ്ജുവാര്യർ പൂർത്തിയാക്കിയിരുന്നു. ജയസൂര്യ നായകനാകുന്ന മേരി ആവാസ് സുനോ, സണ്ണി വയ്‌ൻ നായകനാകുന്ന ചതുർമുഖം, സണ്ണി വയ്ൻ നിർമ്മിച്ച് നിവിൻപോളി നായകനാകുന്ന പടവെട്ട് എന്നീ ചിത്രങ്ങൾ പൂർത്തിയാക്കിക്കഴിഞ്ഞു.

മോഹൻലാൽ - പ്രിയദർശൻ ടീമിന്റെ ബ്രഹ്മാണ്ഡ ചിത്രമായ മരയ്ക്കാർ അറബിക്കടലിന്റെ സിംഹം, സന്തോഷ് ശിവൻ സംവിധാനം ചെയ്യുന്ന ജാക്ക് ആൻഡ് ജിൽ സനൽകുമാർ ശശിധരൻ സംവിധാനം ചെയ്ത കയറ്റം എന്നിവയാണ് മഞ്ജുവിന്റേതായി പ്രദർശനത്തിനൊരുങ്ങിക്കഴിഞ്ഞ ചിത്രങ്ങൾ .