മലയാളികളുടെ ലേഡി സൂപ്പർസ്റ്റാർ മഞ്ജുവാര്യര്‍ ബോളിവുഡിലേയ്ക്ക്. ഉടൻ തന്നെ തന്റെ ബോളിവുഡ് സിനിമയുടെ പ്രഖ്യാപനം താരം പറഞ്ഞിരുന്നെങ്കിലും ഇതിനെകുറിച്ച് കൂടുതലായൊന്നും താരം പറഞ്ഞിരുന്നില്ല. ഇപ്പോള്‍ ചലച്ചിത്ര നിരൂപകനും നിരീക്ഷകനുമായ ശ്രീധര്‍ പിള്ളയാണ് ഇതേക്കുറിച്ചുള്ള വാര്‍ത്ത പുറത്തുവിട്ടിരിക്കുന്നത്.

അമേരികി പണ്ഡിറ്റ് എന്നാണ് താരത്തിന്റെ പുതിയ ചിത്രത്തിന്റെ പേര്. മഞ്ജുവാര്യരുടെ കന്നി ചിത്രത്തിന് നായകനായി എത്തുന്നത് മാധവനാണ്. നവാഗതനായ സംവിധായകൻ കല്‍പേഷാണ് ചിത്രത്തിന്റെ സംവിധാനം നിര്‍വഹിക്കുന്നത്. ഇപ്പോൾ ചിത്രത്തിന്റെ ഷൂട്ട് ഭോപ്പാലിൽ ആരംഭിച്ചിരിക്കുകയാണെന്നും വൈകാതെ തന്നെ മഞ്ജു ഷൂട്ടിങ്ങിനെത്തുമെന്നാണ് റിപ്പോർട്ടുകളിൽ പറയുന്നത്.

കൂടുതല്‍ വിവരങ്ങള്‍ പിന്നാലെയുണ്ടാവുമെന്നും ശ്രീധര്‍ പിള്ള ട്വീറ്റിൽ പറയുന്നത്. പുതിയ വിവരങ്ങള്‍ പുറത്തുവന്നതോടെ ആരാധകര്‍ ആകാംഷയിലായിരിക്കുകയാണ്. മഞ്ജു വാര്യരുടെ മലയാള ചിത്രം 'പ്രതി പൂവന്‍കോഴി'യുടെ ഹിന്ദി റീമേക് അവകാശം ബോണി കപൂര്‍ നേരെത്തെ സ്വന്തമാക്കിയിരുന്നു.

അതേസമയം മഞ്ജുവാര്യരും മമ്മൂട്ടി ഒന്നിക്കുന്ന ചിത്രം ദ പ്രീസ്റ്റ് തിയേറ്ററുകളിൽ എത്തിയിരിക്കുകയാണ്. പ്രിയദര്‍ശന്‍-മോഹന്‍ലാല്‍ ചിത്രം മരക്കാര്‍ അറബിക്കടലിന്റെ സിംഹം, സന്തോഷ് ശിവന്റെ ജാക്ക് ആന്‍ഡ് ജില്‍, സനല്‍ കുമാര്‍ ശശിധരന്റെ കയറ്റം, രണ്‍ജീത് കമല ശങ്കറും സലിലും ചേര്‍ന്ന് സംവിധാനം ചെയ്യുന്ന ചതുര്‍മുഖം തുടങ്ങി നിരവധി സിനിമകളാണ് മഞ്ജുവിന്റേതായി അണിയറയില്‍ ഒരുങ്ങികൊണ്ടിരിക്കുന്നത്.