മോഹൻലാലിന്റെ ആദ്യ സംവിധാന സംരംഭമായ ‘ബറോസി’ന്റെ പൂജയുമായി ബന്ധപ്പെട്ട ഒത്തുകൂടലിനിടെയാണ് പൃഥ്വി രസകരമായി പാടിയത്. വനിത ഫിലിം അവാർഡ് വേദിയിൽ മികച്ച സംവിധായകനുള്ള പുരസ്കാരം ഏറ്റുവാങ്ങാൻ എത്തിയപ്പോൾ പൃഥ്വി പാട്ട് പാടിയതിന്റെ വിഡിയോ സമൂഹമാധ്യമലോകത്തു പ്രചരിച്ചിരുന്നു.

അന്ന് വേദിയിലുണ്ടായിരുന്നു നടി നവ്യ നായരുടെ അഭ്യർഥനപ്രകാരമായിരുന്നു പൃഥ്വിരാജ് പാടിയത്. ഇരു താരങ്ങളും ഒരുമിച്ച ‘നന്ദനം’ സിനിമയുടെ ലൊക്കേഷനിൽ പൃഥ്വി എപ്പോഴും പാട്ട് പാടി നടക്കാറുണ്ടായിരുന്നു എന്ന് നവ്യ വെളിപ്പെടുത്തിയതിനു പിന്നാലെയാണ് താരം പാടണം എന്ന ആവശ്യം ആരാധകരില്‍ നിന്നുൾപ്പെടെ ഉയർന്നത്.

അന്ന് പൃഥ്വിരാജ് പാടിയത് സമൂഹമാധ്യമലോകം ഏറ്റെടുത്തിരുന്നു. ഇപ്പോഴിതാ ‘ബറോസി’ന്റെ പൂജാദിനം ‘പൊൻ‌വീണേ എന്നുള്ളിൻ മൗനം വാങ്ങൂ, ജന്മങ്ങൾ പുൽ‌കും നിൻ നാദം നൽ‌കൂ’ എന്ന ഹിറ്റാണ് താരം ആലപിച്ചത്.

‘താളവട്ടം’ എന്ന മോഹൻലാൽ ചിത്രത്തിൽ രഘുകുമാറും രാജാമണിയും ചേർന്നൊരുക്കിയതാണീ ഗാനം. കെ.എസ്.ചിത്രയും എം.ജി.ശ്രീകുമാറും ആണ് പിന്നണിയിൽ സ്വരമായത്. പൂവച്ചൽ ഖാദറിന്റേതാണു പാട്ടിന്റെ വരികൾ.

ഒരു കയ്യിൽ മൊബൈൽ ഫോണും മറു കയ്യിൽ മൈക്കും പിടിച്ച് ഫോണിൽ വരികൾ നോക്കി, നിന്നുകൊണ്ട് താളം പിടിച്ചാണ് പൃഥിരാജിന്റെ പാട്ട്. വാദ്യോപകരണങ്ങളുമായി കലാകാരന്മാർ ചുറ്റുമുണ്ട്. നാൽപ്പതോളം സെക്കന്റുകൾ ആണ് വിഡിയോയുടെ ദൈർഘ്യം. ഇതിനു മുൻപും പൊതു വേദികളിൽ ഉൾപ്പെടെ പൃഥ്വിരാജ് പാട്ട് പാടിയിട്ടുണ്ട്.