പൊതുവെ സമ്മാനങ്ങള്‍ എക്കാലവും ഓര്‍മയില്‍ തങ്ങി നില്‍ക്കുന്നതായിരിക്കും. അപ്രതീക്ഷിതമായിട്ടുള്ള സമ്മാനമാണെങ്കില്‍ പറയുകയേ വേണ്ട.

ഇത്തരത്തില്‍ ഒരു സമ്മാനം കിട്ടിയതിന്റെ സന്തോഷത്തിലാണ് നടന്‍ ഗിന്നസ് പക്രുവിന്റെ മകള്‍ ദീപ്തകീര്‍ത്തി.

മകൾ ദീപ്ത കീർത്തിക്ക് ഒരു അപ്രതീക്ഷിത സമ്മാനം നൽകുന്നതിന്റെ ഒരു വീഡിയോ സാമൂഹ്യ മാധ്യമങ്ങളിലൂടെ പങ്കുവച്ചിരിക്കുകയാണ് പ്രിയ നടൻ ഗിന്നസ് പക്രു.

വര്‍ണക്കടലാസില്‍ അച്ഛന്‍ ഒളിപ്പിച്ചത് എന്താണെന്ന് അറിയാന്‍ കൗതുകത്തോടെയാണ് ദീപ്തകീര്‍ത്തി നോക്കി നില്‍ക്കുന്നത്.

തനിക്ക് പ്രിയപ്പെട്ട നായ്ക്കുട്ടിയാണ് അതിലെന്ന് അറിഞ്ഞപ്പോള്‍ സന്തോഷം ഇരട്ടിയായി. 'ദീപ്തകീര്‍ത്തിയ്ക്കുള്ള സര്‍പ്രൈസ്' സമ്മാനമെന്ന കുറിപ്പോടെയാണ് അജയകുമാര്‍ ഈ ക്യൂട്ട് വിഡിയോ പങ്കുവച്ചിരിക്കുന്നത്.

മകൾക്കൊപ്പമുള്ള നിമിഷങ്ങൾ ഇതിനു മുൻപും ഗിന്നസ് പക്രു സാമൂഹ്യ മാധ്യമങ്ങളിൽ പങ്കുവച്ചിട്ടുണ്ട്. സൂപ്പർ ഹിറ്റായ “എൻജോയ് എൻജാമി” എന്ന പാട്ടിനനുസരിച്ച് നൃത്തം ചെയ്യുന്ന മകളുടെ വീഡിയോയാണ് ഏതാനും ദിവസം മുൻപ് താരം പങ്കുവച്ചത്.

മകൾക്കൊപ്പമുള്ള നിരവധി ചിത്രങ്ങളും താരം പങ്കുവയ്ക്കാറുണ്ട്. സോഷ്യൽ മീഡിയയിൽ ഏറെ സജീവമായ ഗിന്നസ് പക്രു അടുത്തിടെ തമിഴകത്തിന്റെ പ്രിയതാരമായ അജിത്തിനൊപ്പമുള്ള ഒരു പഴയ വീഡിയോ പങ്കുവയ്ക്കുച്ചിരുന്നു.

ഒരു അവാർഡ് ചടങ്ങിനിടെ അജിത്തിന് അരികിലെത്തി കുശലം പറയുന്ന പക്രുവിനെയാണ് വീഡിയോയിൽ കാണാനാവുക.

താരങ്ങളായ വിജയ്, വിക്രം, പ്രഭു എന്നിവരും അടുത്തുണ്ട്. പ്രഭുവും വിക്രമും പക്രുവിനോട് വിശേഷങ്ങൾ ആരായുന്നുണ്ട്.

1984ൽ പ്രദർശനത്തിനെത്തിയ അമ്പിളി അമ്മാവൻ എന്ന ചിത്രത്തിലൂടെയാണ് ഗിന്നസ് പക്രു എന്ന അജയ് കുമാർ സിനിമയിലേക്ക് ആദ്യമായി കടന്നു വരുന്നത്.

വിദ്യാഭ്യാസത്തിനു ശേഷം ഒരു മിമിക്രി കലാകാരനായിരുന്നതിനു ശേഷമാണ് സിനിമയിലെത്തുന്നത്. നിരവധി ടെലിവിഷൻ പരമ്പരകളിലും ഇദ്ദേഹം അഭിനയിച്ചിട്ടുണ്ട്.

2006 മാർച്ചിൽ ഗായത്രി മോഹനെ വിവാഹം ചെയ്തു. ‘അത്ഭുതദ്വീപ്’ എന്ന ചിത്രത്തിലൂടെ ഒരു മുഴുനീള ചിത്രത്തിൽ പ്രധാന വേഷം ചെയ്ത ഏറ്റവും ഉയരം കുറഞ്ഞ നടൻ (64.008 cm height) എന്ന ഗിന്നസ് റെക്കോർഡും പക്രു കരസ്ഥമാക്കി.