മാസങ്ങള്‍ നീണ്ട കാത്തിരിപ്പിന് വിരാമമിട്ട് മഞ്ഞിൽ വിരിഞ്ഞ പൂവ് നായകൻ യുവ കൃഷ്ണയും പൂക്കളം വരവായി നായികാ മൃദുല വിജയും വിവാഹിതരായിരിക്കുകയാണ്. തലസ്ഥാനനഗരിയിലെ ആറ്റുകാല്‍ ക്ഷേത്രത്തില്‍ വെച്ചായിരുന്നു ആ ധന്യ മുഹൂർത്തം നടന്നത്. അടുത്ത ബന്ധുക്കളും സുഹൃത്തുക്കളുമായിരുന്നു വിവാഹ ചടങ്ങില്‍ പങ്കെടുത്തത്. വിവാഹ ശേഷമായി സ്വകാര്യ ഹോട്ടലില്‍ വിരുന്നും നടത്തിയിരുന്നു.

വിവാഹത്തിന്റെയും വിരുന്നിന്റെയും ചിത്രങ്ങളും വീഡിയോയുമെല്ലാം ഒറ്റദിവസം കൊണ്ടാണ് സോഷ്യല്‍ മീഡിയയിലൂടെ വൈറലായി മാറിയത് . വിവാഹസമയത്ത് മൃദുല അണിഞ്ഞ ആടയാഭരണങ്ങളെക്കുറിച്ചും സാരിയെക്കുറിച്ചുമുള്ള വിശേഷങ്ങളും ആരാധകർ കൗതുകത്തോടെ ഏറ്റെടുക്കുകയുണ്ടായി.

തിരക്കുള്ള വിവാഹ ദിവസവും ആരാധകരോട് സംവദിക്കാൻ താരങ്ങൾ മറന്നില്ല. വിവാഹനിശ്ചയം കഴിഞ്ഞ് 6 മാസമായിരിക്കുകയാണ്. ഇനിയും വിവാഹം നീട്ടാന്‍ പറ്റാത്ത അവസ്ഥയായിരുന്നു. കൊവിഡ് കാലമായതിനാല്‍ അധികം ആളുകളെയൊന്നും വിളിച്ചിട്ടില്ല. അക്കാര്യത്തില്‍ ഞങ്ങള്‍ക്ക് രണ്ടാള്‍ക്കും സങ്കടമുണ്ടെന്നായിരുന്നു യുവയും മൃദുലയും ഒരുപോലെ പറഞ്ഞത്. സെറ്റും മുണ്ടുമണിഞ്ഞായിരുന്നു മൃദുല ആദ്യമെത്തിയത്. അമ്പലത്തിലെ ചടങ്ങിന് ശേഷമായി സാരിയും ആഭരണങ്ങളും മാറ്റുകയായിരുന്നു.

വിവാഹ സമയത്ത് മൃദുല അണിഞ്ഞ സാരിയെക്കുറിച്ചുള്ള ചര്‍ച്ചകളും സോഷ്യല്‍ മീഡിയയില്‍ അരങ്ങേറിയിരുന്നു. മൂന്നാഴ്ചയായി 6 നെയ്ത്തുകാര്‍ ചേര്‍ന്നാണ് മൃദുലയ്ക്കായി സാരി ഒരുക്കിയത്. കോളം കോളം പോലെയായുള്ള ഡിസൈനാണ് സാരിയുടേത്. ഒരാഴ്ച തുന്നിയാല്‍ ഏഴ് കോളമേ വരൂ, അതാണ് മൂന്നാഴ്ച തുന്നേണ്ടി വരുന്നതെന്ന് ഡിസൈനര്‍ വ്യക്തമാക്കിയിരുന്നു. ഈ വിവരം മൃദുല പങ്കുവെച്ചിരുന്നു.

വിവാഹ സാരിയുടെ ഡിസൈന്‍ വീഡിയോ നേരത്തെ മൃദുല പങ്കുവെച്ചിരുന്നു. വ്യത്യസ്തമായി എന്തെങ്കിലും ചെയ്യണമെന്നുണ്ടായിരുന്നു. മേക്കപ്പ് ആര്‍ടിസ്റ്റായ വികാസ് ചേട്ടനാണ് ഇതേക്കുറിച്ച് പറഞ്ഞ് തന്നതെന്നും താരം പറഞ്ഞിരുന്നു. മൃദുലയെ നവവധുവായി ഒരുക്കിയത് വികാസായിരുന്നു. ഒരുക്കങ്ങള്‍ക്കിടയിലെ വീഡിയോയുമായി വികാസ് എത്തിയിരുന്നു.

35000 രൂപയുടെ സാരിയാണ് വിവാഹ സമയത്ത് മൃദുല ധരിച്ചിരുന്നത്. ഇത്രയും നാളത്തെ സമ്പാദ്യം മുഴുവനും കല്യാണത്തിനായി ചെലവഴിക്കുന്നതിനോട് താല്‍പര്യമില്ല. ഒരുദിവസത്തെ ആഡംബരത്തിനായി സമ്പാദ്യം മുഴുവനും തീര്‍ക്കുന്നതിനോട് യോജിപ്പില്ലെന്നും നേരത്തെ മൃദുല പറഞ്ഞിരുന്നു. മൃദുലയുടെ വിവാഹസാരിയുടെ വിലയെക്കുറിച്ചും ആരാധകര്‍ ചര്‍ച്ച ചെയ്തിരുന്നു.

വ്യത്യസ്തമായ ബ്ലൗസ്  ഡിസൈനായിരുന്നു മൃദുല തിരഞ്ഞെടുത്തത്. ബ്ലൗസില്‍ മൃദുലയുടേയും യുവയുടേയും പേര് ചേര്‍ത്ത് മൃദ് വ എന്നെഴുതിയിരുന്നു. രണ്ടുപേരും പരസ്പരം ഹാരമണിയിക്കുന്ന ചിത്രവുമുണ്ടായിരുന്നു. അമ്പലത്തിലെ ചടങ്ങിന് ശേഷമായി വിരുന്നിനെത്തിയപ്പോള്‍ യുവയും മൃദുലയും വസ്ത്രങ്ങള്‍ മാറ്റിയിരുന്നു. ഒരേനിറത്തിലുള്ള വസ്ത്രങ്ങളായിരുന്നു ധരിച്ചത്.

വിവാഹത്തോടനുബന്ധിച്ചുള്ള ഹൽദി ചിത്രങ്ങളും സോഷ്യൽ മീഡിയ മുഴുവൻ നിറഞ്ഞുനിന്നിരുന്നു. മൃദുലയുടെ ഹൽദി ദിനത്തിൽ മൃദുല മാത്രമായിരുന്നില്ല സോഷ്യൽ മീഡിയയും മഞ്ഞ നിറമണിഞ്ഞു നിന്നിരുന്നു. വളരെയധികം സന്തോഷവതിയായി മഞ്ഞയിൽ കുളിച്ചു നിന്ന മൃദുലയ്ക്ക് ആശംസകളുമായി നിരവധി ആരാധകരായിരുന്നു എത്തിയിരുന്നത്.