തന്റെ ജീവിതത്തിലെ ഏത് ചെറിയ കാര്യവും, വലിയ കാര്യവും... വേദനകളും സന്തോഷങ്ങളും എല്ലാം സോഷ്യല്‍ മീഡിയയിലൂടെ പങ്കുവയ്ക്കുന്ന താരമാണ് പേളി മാണി. എപ്പോഴും സന്തോഷവതിയായി സോഷ്യൽ മീഡിയയിൽ എത്തുന്നതിനോടൊപ്പം ആരാധകരെയും പൊട്ടിച്ചിരിപ്പിക്കാൻ പേളിക്ക് സാധിക്കാറുണ്ട്. ജീവിതത്തിൽ എന്തിനെയും കരുത്തോടെ നേരിടുന്ന പേളി ഇപ്പോള്‍ പങ്കുവച്ചിരിക്കുന്നത് ഏറെ വേദന നിറഞ്ഞ ഒരു നഷ്ടത്തെ കുറിച്ചാണ്. അച്ഛന്റെ സഹോദരന്റെ വേര്‍പാട് കുടുംബത്തിനുണ്ടാക്കിയ ആഘാതത്തെ കുറിച്ച് പേളി ഇന്‍സ്റ്റഗ്രാമില്‍ എഴുതി.

കുടുംബത്തിടൊപ്പം നില്‍ക്കുന്ന ഒരു ഗ്രൂപ്പ് ഫോട്ടോയ്‌ക്കൊപ്പമാണ് പേളി മാണിയുടെ ഇന്‍സ്റ്റഗ്രാം പോസ്റ്റ്. 'എന്റെ അച്ഛന്റെ ഇളയ സഹോദരന്‍... ഞങ്ങളുടെ വലിയ കുടുംബത്തിന്റെ നെടുംതൂണികളിലൊന്ന്.. ഞങ്ങളുടെ ഡേവി അങ്കിള്‍... അദ്ദേഹത്തിന്റെ ആത്മാവിന് നിത്യ ശാന്തി' എന്ന് പേളി എഴുതി. മാസങ്ങളായി സ്‌ട്രോക്ക് വന്ന് ചികിത്സയിലാരുന്നുവത്രെ അങ്കിള്‍. അതില്‍ നിന്ന് സുഖം പ്രാപിച്ചു വരികയായിരുന്നു. എന്നാല്‍ ദൈവത്തിന്റെ തീരുമാനം മറ്റൊന്നായിരുന്നു എന്ന് പേളി പറയുന്നു.

സോന നായരും, ശില്‍പ ബാലയും അടക്കം നിരവധി പേര്‍ പേളിയുടെ ചെറിയച്ഛന് ആദരാഞ്ജലികള്‍ നേര്‍ന്നുകൊണ്ടുള്ള കമന്റ് പങ്കുവച്ചു . കഴിഞ്ഞ ദിവസമാണ് ജീവിതത്തിലെ ഏറ്റവും സന്തോഷമുള്ള മറ്റൊരു മുഹൂര്‍ത്തത്തിന്റെ ആഘോഷങ്ങളും ഫോട്ടോകളും പേളി ഇന്‍സ്റ്റഗ്രാമില്‍ പങ്കുവച്ചത്. പേളിയുടെ സഹോദരിയുടെ വിവാഹമായിരുന്നു. സ്വപ്‌ന തുല്യമായ ആ വിവാഹ ആഘോഷങ്ങള്‍ കഴിഞ്ഞ് തൊട്ടടുത്ത ദിവസമാണ് അച്ഛന്റെ സഹോദരന്റെ മരണവും.

പേളി മാണിയുടെ സഹോദരിയായ റേച്ചലിന്റെ വിവാഹമായിരുന്നു കഴിഞ്ഞ ദിവസം സോഷ്യൽ മീഡിയ ഉൾപ്പെടെ ഏറ്റെടുത്തത് . ഫോട്ടോഗ്രാഫറും മോഡലുമായ റൂബനായിരുന്നു റേച്ചലിനെ വിവാഹം ചെയ്തത്. കൊവിഡ് കാലമായതിനാല്‍ കുറച്ചുപേരാണ് വിവാഹത്തില്‍ പങ്കെടുത്തത്. പള്ളിയിലെ ചടങ്ങിന്റേയും പിന്നീട് നടന്ന റിസപ്ക്ഷനിടയിലെ ചിത്രങ്ങളുമെല്ലാം വൈറലായി മാറിയിരുന്നു. അനിയത്തിയുടെ വിവാഹസന്തോഷം ആഘോഷിച്ച് തീരുന്നതിനിടയിലാണ് പിതൃസഹോദരന്റെ വിയോഗം.

തങ്ങളുടേത് കൂട്ടുകുടുംബമാണെന്നും മുകളിലും താഴെയുമായാണ് കഴിയുന്നതെന്നും മുന്‍പ് പേളി പറഞ്ഞിരുന്നു. എപ്പോഴും ബഹളമുള്ള, കുറേയേറെ ആളുകളുള്ള വീട്ടിലാണ് താന്‍ വളര്‍ന്നതെന്നും താരം വ്യക്തമാക്കിയിരുന്നു. പേളിയുടെ പിതാവായ മാണി പോളിന്റെ സഹോദരനായ ഡോവിസ് വി പോളിന്റെ അപ്രതീക്ഷിത വിയോഗത്തിന്റെ നടുക്കത്തിലാണ് കുടുംബാംഗങ്ങള്‍. പേളിയുടെ അമ്മയുടെ സഹോദരിയെയാണ് ഡേവിസ് വിവാഹം ചെയ്തത്.

സോഷ്യല്‍ മീഡിയയിലൂടെ നിരവധി പേരാണ് ഡേവിസ് പോളിന് ആദരാഞ്ജലി നേര്‍ന്നിട്ടുള്ളത്. അദ്ദേഹത്തെ തങ്ങള്‍ മിസ്സ് ചെയ്യുമെന്നാണ് എല്ലാവരും പറയുന്നത്. മിനിയാണ് ഭാര്യ. ശ്രദ്ധ, ശരത്ത്, റിനീറ്റ ഇവരാണ് മക്കള്‍. പേളിക്കൊപ്പം മിക്കപ്പോഴും ഇവരുണ്ടാവാറുണ്ട്. റേച്ചലിന്റെ വിവാഹത്തില്‍ എല്ലാവരും സജീവമായിരുന്നു. പേളി കൊവിഡ് വാക്‌സിന്‍ എടുക്കാന്‍ പോയപ്പോള്‍ ശരത്തും ശ്രദ്ധയും ഒപ്പമുണ്ടായിരുന്നു.

മുന്‍പ് അങ്കിളിനായി പേളി പോസ്റ്റ് ചെയ്ത പിറന്നാളാശംസയും സോഷ്യല്‍ മീഡിയയിലൂടെ പ്രചരിക്കുന്നുണ്ട്. ഈ ജീവിതത്തില്‍ തന്നെ നയിക്കാനും പ്രചോദനമായും നിങ്ങള്‍ കൂടെയുണ്ട്. കൂട്ടുകുടുംബത്തില്‍ ജീവിക്കുന്നത് വലിയ ഭാഗ്യമാണെന്നുമായിരുന്നു അന്നത്തെ കുറിപ്പ്. അങ്കിളിനും കുടുംബത്തിനുമൊപ്പമുള്ള ചിത്രങ്ങള്‍ പേളി ഫേസ്ബുക്കില്‍ പോസ്റ്റ് ചെയ്തിരുന്നു.

ബിഗ് ബോസിലുള്ളപ്പോള്‍ പേളി ഡേവിസ് അങ്കിളിനെക്കുറിച്ച് പറഞ്ഞത് ഇപ്പോഴും ഓര്‍ക്കുന്നുണ്ട്. വല്ലാത്ത ഷോക്കിങായിപ്പോയി, അവര്‍ ഒരു ജോയിന്റ് ഫാമിലിയായിരുന്നു, എങ്ങനെ ഈ വേദന സഹിക്കും, ഞങ്ങള്‍ക്ക് തന്നെ സഹിക്കാനാവുന്നില്ലെന്നായിരുന്നു ആരാധകരുടെ കമന്റുകള്‍. സഹോദരൻമാരാണെങ്കിലും സുഹത്തുക്കളെപ്പോലെയാണ് മാണി പോളും ഡേവിസും. കുടുംബസമേതം സന്തോഷത്തോടെ കഴിഞ്ഞ് വരികയായിരുന്നു.