ഗോദയ്ക്ക് ശേഷം ടോവിനോ തോമസും ബേസിൽ ജോസഫും ഒന്നിക്കുന്ന ചിത്രമായ മിന്നൽ മുരളി വീണ്ടും പ്രതിസന്ധിയിൽ. ടോവിനോയുടെ കരിയറിലെ തന്നെ ഏറ്റവും വലിയ ബഡ്ജറ്റിൽ ഒരുക്കിയിരിക്കുന്ന ചിത്രം കൂടിയാണ് മിന്നൽ മുരളി.

കൊറോണ മൂലം സിനിമയുടെ ഷൂട്ടിങ് പാതിവഴിയ്ക്ക് നിർത്തേണ്ടി വന്നിരുന്നു. തുടർന്ന് അടുത്തിടെയാണ് ഷൂട്ടിങ് പുനഃരാരംഭിച്ചത്. ഇപ്പോഴിതാ ഈ ഷൂട്ടിങ്ങും നിർത്തിവെക്കേണ്ടി വന്നിരിക്കുകയാണ്. മിന്നൽ മുരളി ഷൂട്ടിംഗിനതിരെ നാട്ടുകാർ പ്രതിഷധവുമായി രംഗത്ത് എത്തിയതിനെ തുടർന്നാണ് നിർത്തിവെച്ചത്.

കൊവിഡ് നിയന്ത്രണം ശക്തമാക്കിയ ഡി കാറ്റഗറിയിലുള്ള പഞ്ചായത്തിൽ നടന്ന ഷൂട്ടിംഗാണ് നാട്ടുകാർ ഇടപെട്ട് നിർത്തിച്ചത്. നിരോധിത മേഖലയിൽ ഷൂട്ടിങ് നടത്തിയതോടെ നാട്ടുകാർ പ്രതിഷേധവുമായി രംഗത്തെത്തുകയായിരുന്നു.

ഷൂട്ടിംഗിന് കളക്ടറുടെ അനുമതിയുണ്ടെന്ന് സിനിമയുടെ അണിയറപ്രവർത്തകർ വ്യക്തമാക്കിയിരുന്നു. എന്നിട്ടും തർക്കം മുറുകിയതോടെ നാട്ടുകാരുടെ പ്രതിഷേധത്തിനിടെ പോലീസ് ഇടപെട്ട് ഷൂട്ടിംഗ് നിർത്തിവെയ്പ്പിക്കുകയായിരുന്നു.

ചിത്രത്തിൻ്റെ ഹിന്ദി പതിപ്പിൻ്റെ പേര് മിസ്റ്റര്‍ മുരളിയെന്നാണ്. തെലുങ്ക് പതിപ്പിന് മെരുപ്പ് മുരളിയെന്നും കന്നഡ പതിപ്പിന് മിഞ്ചു മുരളിയെന്നുമാണ് പേര് നൽകിയിട്ടുള്ളത്. സിനിമയിൽ ജിഗർത്തണ്ട, ജോക്കർ തുടങ്ങിയ ചിത്രങ്ങളിലൂടെ ശ്രദ്ധേയനായ തമിഴ് താരം ഗുരു സോമസുന്ദരവും പ്രധാന കഥാപാത്രത്തെ അവതരിപ്പിക്കുന്നുണ്ടെന്ന റിപ്പോർട്ട് നേരത്തേയുണ്ടായിരുന്നു.

അജു വർഗീസ്, ബൈജു, ഹരിശ്രീ അശോകൻ, ഫെമിന ജോർജ് എന്നിവരാണ് ചിത്രത്തിലെ മറ്റു താരങ്ങൾ. സമീർ താഹിറാണ് ക്യാമറ ചലിപ്പിക്കുന്നത്. ഷാൻ റഹ്മാനാണ് ചിത്രത്തിലെ ഗാനങ്ങൾക്ക് സംഗീതം പകരുന്നത്. ബാറ്റ്മാൻ, ബാഹുബലി, സുൽത്താൻ തുടങ്ങിയ ചിത്രങ്ങൾക്ക് പിന്നിൽ പ്രവർത്തിച്ച വ്ലാഡ് റിംബർഗാണ് ചിത്രത്തിലെ രണ്ടു വലിയ സംഘട്ടനങ്ങൾ സംവിധാനം ചെയ്യുന്നത്.