യുവ സംവിധായകന്‍ അഭിലാഷ് പുരുഷോത്തമന്‍ നടി പ്രിയങ്കയെ കേന്ദ്രകഥാപാത്രമാക്കി ഒരു സിനിമ ഒരുക്കുന്നു. സ്ത്രീകള്‍ക്ക് പ്രാധാന്യം നല്‍കുന്ന സിനിമയാണ് ഇതെന്ന് ഇതുവരെ പേരിടാത്ത സിനിമയെ കുറിച്ച് സംവിധായകന്‍ പറയുന്നു. ചിത്രത്തിന്റെ ഷൂട്ടിങ് പുരോഗമിച്ചുകൊണ്ടിരിക്കുകയാണെന്നും ചിത്രത്തെ കുറിച്ചുള്ള കൂടുതല്‍ വിവരങ്ങള്‍ വരും ദിവസങ്ങളില്‍ പുറത്തുവിടുമെന്നും സംവിധായകന്‍ പറയുന്നു. മലയാളത്തിലും തമിഴിലുമായി രണ്ട് ഭാഷകളിലാണ് സിനിമ പുറത്തിറങ്ങുന്നത്. പ്രിയങ്ക അവതരിപ്പിക്കുന്ന സ്ത്രീ കഥാപാത്രം ഇന്നത്തെ ഒരു സ്ത്രീയാണ്, അവള്‍ അഭിമുഖീകരിക്കുന്ന ഒരു പ്രത്യേക സാഹചര്യവും അക്കാലത്തെ അവളുടെ മാനസികാവസ്ഥയുമാണ് സിനിമയില്‍ പറയുന്നത്. രണ്ടു ഗാനങ്ങളും ചിത്രത്തില് ഉള്‌പ്പെടുത്തിയിട്ടുണ്ട്. ബാങ്ക് ഉദ്യോഗസ്ഥന്‍ കൂടിയായ യുവ സംവിധായകന്‍ അഭിലാഷ് പുരുഷോത്തമന്‍ ഇതിനോടകം മൂന്നോളം ഹ്രസ്വചിത്രങ്ങള്‍ സംവിധാനം ചെയ്തിട്ടുണ്ട്.

ചിത്രത്തിന്റെ ഛായാഗ്രഹണം പ്രതാപ് പി. നായരും എഡിറ്റിംഗ് സോബിനും സംഗീതം ദീപാങ്കുരന് കൈതപ്രവും ഗാനങ്ങള്‍ ശ്യാം കെ വാരിയരുമാണ്.