ട്യൂമറിനോട് പൊരുതി അതിജീവനത്തിന്റെ മാതൃകയായി മാറിയ ശരണ്യ ശശി യാത്രയായി. നിരവധി തവണ മരണത്തെ അതിജീവിച്ച പ്രിയതാരത്തിന്റെ അപ്രതീക്ഷിത വിടവാങ്ങലില്‍ താരങ്ങളും പ്രേക്ഷക സമൂഹവും ഒരുപോലെ സങ്കടത്തിലാണ്. വേദനകളില്ലാത്ത ലോകത്തേക്ക് യാത്രയായ ശരണ്യയ്ക്ക് ആദരാഞ്ജലി നേര്‍ന്ന് താരങ്ങളും എത്തിയിരുന്നു. കേരളക്കര മുഴുവന്‍ ഇപ്പോൾ ശരണ്യയുടെ ആത്മശാന്തിക്കായി പ്രാര്‍ത്ഥിക്കുകയാണ്.

അതേസമയം, ശരണ്യ ഏറെ ആഗ്രഹിച്ച, കൊതിച്ച ഒരു ആഗ്രഹത്തെ കുറിച്ച് പറയുകയാണ് സീരിയൽ നടനും ശരണ്യയുടെ അടുത്ത സുഹൃത്തുമായ സാജൻ സൂര്യ. അവസാനമായി ശരണ്യയെ കണ്ടതിനെ കുറിച്ചും ഏറ്റവും വലിയ ആഗ്രഹത്തെക്കുറിച്ചുമാണ് ഒരു മാസികയ്ക്ക് നൽകിയ അഭിമുഖത്തിൽ സാജൻ സൂര്യ പറയുന്നത്.

"തിരിച്ചു വരണമെന്ന് ഏറെ ആഗ്രഹിച്ചിരുന്നതായി ശരണ്യ പറഞ്ഞിരുന്നു . ‘ശരണ്യയുടെ പുതിയ വീടിന്റെ പാലുകാച്ചല്‍ ചടങ്ങിനാണ് ഞങ്ങൾ അവസാനം കണ്ടത്. അന്നും എന്നോട് പറഞ്ഞത് ‘ചേട്ടാ, നമുക്കിനിയും ഒന്നിച്ചഭിനയിക്കണം' എന്നാണ്. അത്രത്തോളം ജീവിതത്തെ സ്നേഹിച്ചയാളാണ് ശരണ്യ. വർഷങ്ങൾക്ക് മുമ്പ് ഞങ്ങൾ നായികാനായകൻമാരായി ഒരു സീരിയലിൽ അഭിനയിച്ചിരുന്നു. അക്കാലം മുതലേയുള്ള പരിചയവും സൗഹൃദവുമാണെന്ന് ഓർമ പങ്കുവെച്ച കൊണ്ട് സാജൻ സര്യ പറയുന്നു.

ഒരുപാട് പ്രയാസപ്പെട്ട കുട്ടിയാണ് അവൾ. രോഗം അവളെ ഒത്തിരി വേദനിപ്പിച്ചു. അപ്പോഴൊക്കെയും ജീവിതത്തിലേക്കു തിരിച്ചു വരണമെന്ന് അവൾ അതിഭയങ്കരമായി ആഗ്രഹിച്ചു. ഞങ്ങളെല്ലാവരും അതാണ് പ്രാർഥിച്ചത്. സീമച്ചേച്ചിയും ശരണ്യയുടെ അമ്മയുമൊക്കെ ഈ വേദന എങ്ങനെ താങ്ങുമെന്ന് എനിക്കറിയില്ല. സീമ.ജി.നായരുടെ പിന്തുണ ശരണ്യയ്ക്ക് നൽകിയ ആശ്വാസം ചെറുതല്ല''.- സാജന്‍ അഭിമുഖത്തിൽ പറയുന്നു,. ശരണ്യയ്ക്ക് ആദരാഞ്ജലികൾ അർപ്പിച്ച് മഞ്ജു വാര്യർ, ഉണ്ണി മുകുന്ദൻ തുടങ്ങിയ താരങ്ങളും എത്തിയിട്ടുണ്ട്. ബിഗ് സ്ക്രീനിലും സജീവമായിരുന്നു ശരണ്യ.

സീമ ജി നായരിലൂടൊണ് ശരണ്യയുടെ രോഗത്തെ കുറിച്ചും നടിയുടെ അവസ്ഥയെ കുറിച്ചും പ്രേക്ഷകർ അറിഞ്ഞത്. നടിക്കും അമ്മയ്ക്കും എല്ലാവിധത്തിലുള്ള പിന്തുണയുമായി അവസാനം വരെ സീമ ജി നായർ ഒപ്പം തന്നെയുണ്ടായിരുന്നു. ശരണ്യയ്ക്ക് സ്വന്തമായി ഒരു വീട് വയ്ക്കാൻ മുന്നിൽ നിന്നതും സീമയായിരുന്നു. 'സ്നേഹസീമ' എന്നാണ് ശരണ്യ തന്റെ വീടിന് നൽകിയിരിക്കുന്ന പേര്. സീമയുമായി അത്രയ്ക്ക് അത്മബന്ധമായിരുന്നു ശരണ്യക്ക്. നടിക്ക് കൊവിഡ് പോസിറ്റീവായ വിവരം സീമാ ജി നായരിലൂടെയാണ് പ്രേക്ഷകർ അറിഞ്ഞത്. വീഡിയോയിലൂടെയാണ് ശണ്യയുടെ അവസ്ഥയെ കുറിച്ച് സീമ പങ്കുവെച്ചത്. നല്ല ചികിത്സ നൽകുന്നുണ്ടെന്നും ജീവിതത്തിലേയ്ക്ക് മടങ്ങി എത്തുമെന്നുള്ള പ്രതീക്ഷയും പങ്കുവെച്ചിരുന്നു.

2012 ലാണ് ശരണ്യയ്ക്ക് ട്യൂമർ സ്ഥിരീകരിക്കുന്നത് 9 ശസ്ത്രക്രീയകളും 33 കിമോയും ചെയ്തിരുന്നു. ഇത് ശരണ്യയുടെ ആരോഗ്യത്തെ മോശമായി ബാധിച്ചിരുന്നു.ശരീരത്തിന്റെ ഒരു വശം തളർന്നു പോവുകയായിരുന്നു. പിന്നീട് നടത്തിയ ചികിത്സകളുടെ ഭാഗമായി ശരണ്യ ജീവിതത്തിലേയ്ക്ക് മടങ്ങി എത്തുകയായിരുന്നു. പിന്നീട് പോസിറ്റിവ് മാറ്റമായിരുന്നു ശരണ്യയിൽ കണ്ടത്. എന്നാൽ അപ്രപതീക്ഷിതമായി വന്ന കൊവിഡും ന്യുമോണിയയും ശരണ്യയുടെ ജീവിതത്തിന്റെ താളം തെറ്റിക്കുകയായിരുന്നു. കൊവിഡ് നെഗറ്റീവ് ആയെങ്കിലും നടിയുടെ ആരോഗ്യസ്ഥിതി ഗുരുതരമാവുകയായിരുന്നു. മികച്ച ചികിത്സ നൽകിയെങ്കിലും ശരണ്യയെ രക്ഷപ്പെടുത്താൻ കഴിഞ്ഞില്ല.