കഴിഞ്ഞ ദിവസം അന്തരിച്ച നടി ശരണ്യ ശശി സര്‍ജറികളുടെയും കീമോകളുടെയും മരുന്നുകളുടെയും നടുവില്‍ മല്ലിട്ടത് നീണ്ട പത്തുവർഷക്കാലം. ഒരു തലവേദനയായി വന്നത് ക്യാന്‍സര്‍ ആണെന്ന് തിരിച്ചറിഞ്ഞ കാലം മുതല്‍ ശരണ്യയുടെ ഏതൊരു ആവശ്യത്തിനും നടി സീമ ജി നായര്‍ ഒപ്പമുണ്ട്. നിരന്തരമുള്ള ചികിത്സയുടെ സമയത്ത് സാമ്പത്തികമായി പ്രതിസന്ധിയില്‍ എത്തിയപ്പോള്‍ സീമ സഹായാഭ്യര്‍ത്ഥനയുമായി ലൈവില്‍ എത്തി. ചികിത്സയ്ക്ക് പുറമെ നിരവധി പേരുടെ കാരുണ്യത്തില്‍ സ്ഥലം വാങ്ങി വീട് നിര്‍മ്മിച്ചതിലും സീമ മുമ്പിൽ ഉണ്ടായിരുന്നു.

താരത്തിന്റെ അവസാന ദിവസങ്ങളിലെ ചികിത്സയ്ക്ക് പണമില്ലാതെ വന്നപ്പോള്‍ സീമ തന്റെ സ്വര്‍ണ്ണം മുഴുവന്‍ എടുത്തു വിറ്റാണ് ആശുപത്രി ബില്‍ അടച്ചതെന്നാണ് പുതിയ റിപ്പോര്‍ട്ട്. കോവിഡ് ബാധിച്ച്‌ മെയ് 23നാണ് ശരണ്യയെ ആശുപത്രിയില്‍ പ്രവേശിപ്പിച്ചത്. നില ഗുരുതരമായതിന് പിന്നാലെ വെന്റിലേറ്റര്‍ ഐസിയുവിലേക്ക് മാറ്റി. ജൂണ്‍ 10ന് നെഗറ്റീവ് ആയതിനെത്തുടര്‍ന്ന് മുറിയിലേക്കു മാറ്റിയെങ്കിലും ആരോഗ്യസ്ഥിതി മോശമാകുകയായിരുന്നു. തുടര്‍ന്നായിരുന്നു താരത്തിന്റെ അന്ത്യം.