സംഗീത സംവിധായകൻ ജയ്സൺ ജെ. നായരെ വാൾ കൊണ്ടു വെട്ടി അപായപ്പെടുത്താൻ ശ്രമിച്ച് മൂവർ സംഘം; ആക്രമണം നടന്നത് വയലാർ ശരത്ചന്ദ്രവർമയുടെ വീട്ടിൽ പാട്ട് ചിട്ടപ്പെടുത്തുന്ന ജോലി കഴിഞ്ഞ് മടങ്ങവേ
കല്ലറ– വെച്ചൂർ റോഡിലെ ആളൊഴിഞ്ഞ ഭാഗത്ത് വച്ച് സംഗീത സംവിധായകൻ ജയ്സൺ ജെ. നായരെ വാൾ കൊണ്ടു വെട്ടി അപായപ്പെടുത്താൻ ശ്രമം. ജയ്സണ് കഴുത്തിന് അടിയേറ്റു. ചൊവ്വാഴ്ച രാത്രി 7.45ന് ഇടയാഴത്തിനും കല്ലറയ്ക്കും ഇടയിലായിരുന്നു സംഭവം. 18 വയസ്സിൽ താഴെയുള്ള മൂന്നു പേരാണ് ആക്രമിച്ചതെന്ന് അദ്ദേഹം പറഞ്ഞു. ഇരുവശവും പാടങ്ങളുള്ള ആളൊഴിഞ്ഞ ഭാഗമാണിവിടം.
വയലാർ ശരത്ചന്ദ്രവർമയുടെ വീട്ടിൽ പാട്ട് ചിട്ടപ്പെടുത്തുന്ന ജോലി കഴിഞ്ഞ് ഏറ്റുമാനൂരിലെ വീട്ടിലേക്ക് തനിയെ കാറോടിച്ചു മടങ്ങുകയായിരുന്നു ജയ്സൺ. ഇടയ്ക്ക് ഫോൺ വന്നപ്പോൾ കാർ റോഡരികിൽ നിർത്തി സംസാരിച്ചു. ഈ സമയം മൂന്നു പേർ കാറിന്റെ ഗ്ലാസിൽ തട്ടി. അപകടം നടക്കുന്ന വളവാണെന്നും കാർ മാറ്റിയിടണമെന്നും അവർ ആവശ്യപ്പെട്ടു. കാർ മുൻപോട്ടു മാറ്റിയിട്ടപ്പോൾ വീണ്ടും വന്ന് പണം ആവശ്യപ്പെട്ടെന്നും ഇല്ലെന്നു പറഞ്ഞപ്പോൾ കഴുത്തിന് അടിച്ചെന്നും ജയ്സൺ പറയുന്നു.
ഒരാൾ അരയിൽ നിന്ന് വാൾ ഊരി വെട്ടാൻ ആഞ്ഞു. ഉപദ്രവിക്കരുതെന്ന് ജയ്സൺ അപേക്ഷിച്ചു. തുടർന്ന് കാർ വേഗത്തിൽ ഓടിച്ചാണു രക്ഷപ്പെട്ടതെന്നും അദ്ദേഹം പറഞ്ഞു. സംഭവം സമൂഹമാധ്യമങ്ങളിൽ എഴുതിയെങ്കിലും ജയ്സൺ പരാതി നൽകിയിട്ടില്ല. ആനച്ചന്തം, കഥ പറഞ്ഞ കഥ, എബി, മിഷൻ 90 ഡേയ്സ്, ഇത്രമാത്രം തുടങ്ങി വിവിധ സിനിമകൾക്കു സംഗീതം നൽകിയ അദ്ദേഹം വിവിധ ആൽബങ്ങൾക്കും സംഗീതമൊരുക്കി.
https://www.facebook.com/Malayalivartha