കല്ലറ– വെച്ചൂർ റോഡിലെ ആളൊഴിഞ്ഞ ഭാഗത്ത് വച്ച് സംഗീത സംവിധായകൻ ജയ്സൺ ജെ. നായരെ വാൾ കൊണ്ടു വെട്ടി അപായപ്പെടുത്താൻ ശ്രമം നടന്ന സംഭവത്തിൽ അറസ്റ്റിലായ പ്രതികളായ കൂട്ടുകാർ ധൈര്യം പരീക്ഷിച്ചതെന്ന് പൊലീസ്.

കേസിൽ 3 പേരാണ് അറസ്റ്റിലായത്. ഇവരിൽ രണ്ടു പേർ പ്രായപൂർത്തിയാകാത്തവരാണ്. മൂന്നു പേരും കൂട്ടുകാരാണ്. അക്രമം നടന്ന സ്ഥലത്തിന് അടുത്ത് താമസിക്കുന്ന ഇവർ റോഡരികിൽ നിൽക്കുകയായിരുന്നു. ജെയ്സൺ റോഡരികിൽ കാർ നിർത്തിയത് ഇവർ കണ്ടു. കാറിലുള്ള ആളെ ഭീഷണിപ്പെടുത്തി 500 രൂപ വാങ്ങാൻ ഇവരിൽ പ്രായത്തിൽ മുതിർന്ന അർജുൻ (18) മറ്റുള്ളവരോട് പറഞ്ഞതായി ഡിവൈഎസ്പി എ. ജെ തോമസ് പറയുന്നു.

ധൈര്യം പരീക്ഷിക്കാനാണ് ഇതു ചെയ്തതെന്നും പൊലീസ് പറയുന്നു. രണ്ടു പേരും ജയ്സന്റെ അടുത്തെത്തി പണം ചോദിച്ചു. തരില്ലെന്നു പറഞ്ഞപ്പോൾ കത്തി കാട്ടി ഭീഷണിപ്പെടുത്തിയെന്നും ഡിവൈഎസ്പി പറഞ്ഞു. ഇവർക്കെതിരെ മുൻപ് വേറെ കേസുകളും ഇല്ല. പ്രായപൂർത്തിയാകാത്ത രണ്ടു പേരെയും തിരുവഞ്ചൂർ ജുവനൈൽ ഹോമിലാക്കി.

അർജുന് കഴിഞ്ഞ ദിവസം സേ പരീക്ഷ എഴുതാൻ ജാമ്യം നൽകി. ആനച്ചന്തം, കഥ പറഞ്ഞ കഥ, എബി, മിഷൻ 90 ഡേയ്സ്, ഇത്രമാത്രം തുടങ്ങി വിവിധ സിനിമകൾക്കു സംഗീതം നൽകിയ അദ്ദേഹം വിവിധ ആൽബങ്ങൾക്കും സംഗീതമൊരുക്കിയ സംഗീത സംവിധായകനാണ് ജയ്സൺ ജെ. നായർ.