അതുല്യ കലാകാരന്‍ നെടുമുടി വേണുവിന് ആദരാഞ്ജലികളുമായി മലയാള സിനിമാലോകം മുഴുവനും രംഗത്ത് എത്തിയിരിക്കുകയാണ്. ദിലീപ്, പൃഥ്വിരാജ്, ജയസൂര്യ, വിനീത് ശ്രീനിവാസന്‍ തുടങ്ങി നിരവധിപേരാണ് സമൂഹമാധ്യമങ്ങളിലൂടെ അനുശോചന കുറിപ്പ് പങ്കുവച്ചിരിക്കുന്നത്. ഒരിക്കലും ഉള്‍ക്കൊള്ളാന്‍ പറ്റാത്ത വേര്‍പാട്, വേണുവേട്ടാ പ്രണാമം എന്നാണ് ദിലീപ് കുറിച്ചിരിക്കുന്നത്. അതേസമയം കലാരംഗത്ത് ഇത്ര താളബോധമുള്ള നടൻ വേറെ ഉണ്ടാകില്ലെന്നാണ് നടൻ ജയറാം പറഞ്ഞത്. ഒരു പ്രമുഖ ചാനലിനോടായിരുന്നു നടന്റെ പ്രതികരണം.

ജയറാമിന്റെ വാക്കുകൾ ഇങ്ങനെയായിരുന്നു...

ഇന്നലെ രാത്രി മുതൽ ഇങ്ങനത്തെ ഒരു വാർത്ത പുറത്തു വരരുതേ എന്ന് പ്രാർഥിക്കുകയായിരുന്നു. മൂന്ന് മണിക്കൂർ മുമ്പ് വരെ മകൻ ഉണ്ണിയുമായി സംസാരിച്ചു. പക്ഷേ അത് സംഭവിച്ചു. സത്യത്തിൽ ഏഷ്യയിൽ തന്നെ പകരം വെക്കാന്‍ ഒരാളില്ലാത്ത നടനാണ് അദ്ദേഹം. അത് തെളിയിച്ച ആളാണ്. എന്നെ സംബന്ധിച്ചിടത്തോളം വേണുച്ചേട്ടൻ ആയിട്ടൊരു സിനിമ ഉണ്ടെന്നറിഞ്ഞാൽ ചെണ്ട, ഘടം, ജിഞ്ചറ എല്ലാ സാധനവുമായിട്ടാകും ഞാൻ സെറ്റിലെത്തുക.

എല്ലാ ക്ഷേത്രകലകളും അദ്ദേഹത്തിന് വശമാണ്. ഇത്ര താളബോധമുള്ള നടൻ വേറെ കാണില്ല .വേറെ ഭാഷയിൽ അഭിനയിക്കാൻ പോകുമ്പോൾ നെടുമുടി വേണുവിനെ പോലെ ഒരു നടൻ ഞങ്ങൾക്ക് ഉണ്ടായിരുന്നെങ്കിൽ എന്ന് അവർ പറയുമായിരുന്നു എന്ന് ജയറാം പറയുന്നു.