ഹരി, അപ്പു എന്ന് കേട്ടപ്പോള്‍ തന്നെ മനസ്സിലായി കാണുമല്ലോ, സാന്ത്വനം വീട്ടിലെ ഹരികൃഷ്ണന്‍ എന്ന ഹരിയെ കുറിച്ചും ഭാര്യ അപര്‍ണ എന്ന അപ്പുവിനെ കുറിച്ചും ആണ് പറയുന്നത് എന്ന്. എന്നാല്‍ കഥ നടക്കുന്നത് സാന്ത്വനത്തില്‍ അല്ല, കോമഡി സ്റ്റാര്‍സിലാണ്. ഏഷ്യനെറ്റിലെ റിയാലിറ്റി ഷോ ആയ കോമഡി സ്റ്റാര്‍സ് സീസണ് 3 യിലെ പുതിയ അതിഥി സാന്ത്വനം എന്ന സീരിയലില്‍ ഹരികൃഷ്ണന്‍ എന്ന കഥാപാത്രത്തെ അവതരിപ്പിയ്ക്കുന്ന ഗിരീഷ് നമ്പ്യാരാണ്.

ഗിരീഷ് അതിഥിയായി എത്തുന്ന ഷോയുടെ പുതിയ പ്രമോ പുറത്ത് വിട്ടു. ശ്വേത മേനോനൊപ്പം ഗിരീഷ് ഡാന്‍സ് കളിയ്ക്കുന്ന പ്രമോ വീഡിയോ നിമിഷ നേരം കൊണ്ട് തന്നെ സാന്ത്വനം സീരിയല്‍ പ്രേക്ഷകരും ഏറ്റെടുത്തു കഴിഞ്ഞു. ഹരി എന്തിനാണ് ഡാന്‍സ് കളിക്കാന്‍ മടിച്ചു നില്‍ക്കുന്നത് എന്നാണ് ആരാധകരുടെ ചോദ്യം.

കോമഡി സ്റ്റാര്‍സില്‍ വരുന്ന ഒരു അതിഥിയെയും വിധി കര്‍ത്താക്കളില്‍ ഒരാളായ ശ്വേത മേനോന്‍ വിടാറില്ല. ഡാന്‍സ് ആണെങ്കില്‍ ഡാന്‍സ്, പാട്ട് ആണെങ്കില്‍ പാട്ട്, ഇനി അതല്ല ഏതെങ്കിലും രംഗം അഭിനയിച്ചു കാണിച്ച് ചിരിപ്പിക്കാനാണ് എങ്കില്‍ അതിനും ശ്വേത ജി റെഡായാണ്.

പക്ഷെ സാന്ത്വനത്തിലെ ഹരിയ്ക്ക് അത്തരം ശീലങ്ങള്‍ ഒന്നും ഇല്ല എന്ന് പുതിയ പ്രമോ വീഡിയോ കണ്ടാല്‍ വ്യക്തമാകും. ശ്വേത എത്രയൊക്കെ ഇഴുകി ചേര്‍ന്ന് ഡാന്‍സ് കളിക്കാന്‍ ശ്രമിച്ചിട്ടും ഗിരീഷ് നമ്പ്യാര്‍ അല്പം ഷൈ ആയി, പിന്നോട്ട് പോകുകയായിരുന്നു.

വീഡിയോ യൂട്യൂബില്‍ വന്ന ശേഷമുള്ള ആരാധകരുടെ രസകരമായ കമന്റുകളാണ് കൈയ്യടി നേടുന്നത്. ഇതെങ്ങാന്‍ അപ്പു ഏട്ടത്തി കണ്ടാല്‍ തീര്‍ന്ന് ഹരിയേട്ടാ എന്ന മുന്നറിയിപ്പുകള്‍ കമന്റ് ബോക്‌സില്‍ കാണാം. അപ്പു ഏട്ടത്തിയെ പേടിച്ചിട്ടാണോ മടിച്ച് നില്‍ക്കുന്നത് എന്ന് ചോദിക്കുന്നവരും ഉണ്ട്.

മലയാളികൾ ഹൃദയത്തിലേറ്റിയ പരമ്പരയാണ് സാന്ത്വനം. മനോഹരമായ കുടുംബകഥ പുതുമയോടെ പറയുന്ന പരമ്പര റേറ്റിങിലും മുന്നിലാണ്. സാന്ത്വനം വീട്ടിലെ സഹോദന്മാരും അവരുടെ ഭാര്യമാരും അവരുടെ കുടുംബവുമെല്ലാമാണ് പരമ്പരയെ മനോഹരമാക്കുന്നത്. ശിവാഞ്ജലി എന്ന ജോഡിയാണ് പരമ്പരയെ വ്യത്യസ്തമാക്കുന്നത്. ഇരുവരുടേയും കോമ്പിനേഷൻ സീനുകളെല്ലാം തന്നെ സോഷ്യൽ മീഡിയയിലും വൈറലാണ്.