വില്ലനായി വന്ന് മലയാള ടെലിവിഷന്‍ ലോകത്തെ നായക നിരയിലേക്ക് എത്തിയ നടനാണ് റിച്ചാര്‍ഡ് ജോസ്. പട്ടുസാരി എന്ന സീരിയലിലൂടെ തുടങ്ങിയ റിച്ചാര്‍ഡ് ഇതിനോടകം പത്തിനടുത്ത് സീരിയലുകള്‍ ചെയ്തു കഴിഞ്ഞു. തന്റേതല്ലാത്ത കാരണത്താല്‍ എന്ന ഹ്രസ്വ ചിത്രം എഴുതി സംവിധാനം ചെയ്തു എന്ന ക്രഡിറ്റും റിച്ചാര്‍ഡിനുണ്ട്.

സീരിയലുകാർക്കിടയിലെ വിജയ് ദേവരഗൊണ്ട എന്നാണ് താരത്തെ ആരാധകർ പറയുന്നത്. നിലവിൽ, സീ കേരളത്തിലെ പ്രണയവർണങ്ങൾ സീരിയലിലാണ് താരം അഭിനയിക്കുന്നത്‌.

ഒരു സീരിയല്‍ നടന്‍ ആയത് കൊണ്ട് അഭിമാനക്കുറവ് ഇല്ല എന്നും, സീരിയലിനെ തരംതാഴ്ത്തി പറയുന്ന പ്രേക്ഷകരെ ഒരിക്കലും കുറ്റം പറയില്ല എന്നും സമീപകാലത്ത് താരം നൽകിയ ഇന്റർവ്യൂവിൽ പറഞ്ഞിരുന്നു. താരത്തിന്റെ വാക്കുകൾ ഇങ്ങനെയാണ്..

സീരിയല്‍ നടി, സീരിയല്‍ നടന്‍ എന്നൊക്കെ പറയുമ്പോള്‍ പലര്‍ക്കും പുച്ഛമാണ്. എന്നാല്‍ സീരിയലിനെയും സീരിയല്‍ താരങ്ങളെയും ജനങ്ങള്‍ തരംതാഴ്ത്തി പറയുന്നതില്‍ ഒരിക്കലും അവരെ കുറ്റം പറയില്ല. അങ്ങനെ പറയുന്നുണ്ട് എങ്കില്‍ അത് സീരിയലിന്റെ സാങ്കേതിക പ്രവര്‍ത്തകരുടെയും സംവിധായകന്റെയും കുഴപ്പം തന്നെയാണ്- റിച്ചാര്‍ഡ് പറഞ്ഞു.

എന്തെങ്കിലും സ്വാഭാവികമായി ചെയ്യാം എന്ന് വിചാരിച്ചാല്‍ സാങ്കേതിക പ്രവര്‍ത്തകരോ സംവിധായകരോ സമ്മതിക്കില്ല. അത്രമതി, സീരിയല്‍ അല്ലേ എന്നാവും അവരുടെ പ്രതികരണം. നായികമാര്‍ക്ക് ആണെങ്കില്‍ മേക്കപ്പുകള്‍ അധികം ഉപയോഗിക്കും. അവര്‍ ആവശ്യപ്പെട്ടിട്ടും ആയിരിക്കില്ല. പക്ഷെ അത് അങ്ങനെയാണ്.

ഒരു റൊമാന്റിക് രംഗം ചെയ്യുകയാണങ്കില്‍ തന്നെ ചിലപ്പോള്‍ ചില നായികമാര്‍ക്ക് പറ്റില്ല. സിനിമയില്‍ ആണെങ്കില്‍ അവര്‍ ഓകെയാണ്. സീരിയലില്‍ ആണെങ്കില്‍ പറ്റില്ല എന്ന് പറയും. അതെന്താ അങ്ങനെ. രണ്ടിലും പൈസ അല്ലേ വാങ്ങുന്നത്. ഈ പണിയ്ക്ക് പറ്റാത്തവര്‍ അതിന് വരേണ്ട ആവശ്യമുണ്ടോ എന്നാണ് റിച്ചാര്‍ഡിന്റെ ചോദ്യം.

അതേ സമയം ചെയ്ത കഥാപാത്രങ്ങളുടെ പേരിലോ, അല്ലാതെയോ സോഷ്യല്‍ മീഡിയയില്‍ യാതൊരു ആക്രമണങ്ങള്‍ക്കും താന്‍ ഇരയായിട്ടില്ല എന്ന് റിച്ചാര്‍ഡ് പറയുന്നു. എനിക്ക് നേരെ ഇതുവരെ ഒരു അതിക്രമങ്ങളും ഉണ്ടായിട്ടില്ല എന്നും താരം കൂട്ടിച്ചേർത്തു.