ഏത് പ്രായത്തിലുള്ള കഥാപാത്രവും അനായാസം ചെയ്യാന്‍ കഴിയുന്ന മലയാളത്തിലെ അപൂര്‍വ്വം നടിമാരില്‍ ഒരാളാണ് ലെന. ഇരുപത്തിയഞ്ച് വര്‍ഷത്തോളം നീണ്ട സിനിമാ ജീവിതത്തില്‍ പ്രമുഖരായ താരങ്ങളുടെ നായികയായും അവരുടെ അമ്മയായിട്ടുമൊക്കെ നടി അഭിനയിച്ച് കഴിഞ്ഞു. ഇപ്പോഴിതാ മുന്‍ഭര്‍ത്താവ് അഭിലാഷിനെ കുറിച്ചും, പുതിയ ചിത്രത്തെക്കുറിച്ചും മനസ് തുറക്കുകയാണ് നടി. ഒരു ചാനൽ പരിപാടിക്കിടെയായിരുന്നു ലെന മനസ് തുറന്നത്. 1998 ലാണ് ഞാന്‍ സിനിമയിലേക്ക് എത്തിയത്.

അച്ഛനും അമ്മയും ടീച്ചര്‍മാരുമൊക്കെ എന്നെ സപ്പോര്‍ട്ട് ചെയ്തു. പക്ഷേ കൂടെ ഉണ്ടായിരുന്ന സഹപാഠികള്‍, പ്രത്യേകിച്ച് ബോയ്ഫ്രണ്ടും അതിനോട് എതിര്‍പ്പാണ് പറഞ്ഞത്. ആ ബോയ്ഫ്രണ്ടിനെയാണ് പിന്നീട് കല്യാണം കഴിച്ചത്. അദ്ദേഹം പറഞ്ഞത് സിനിമയില്‍ പോയാല്‍ ആളുകള്‍ നമ്മളെ വളരെ മോശമായി കാണുമെന്നാണ്. ചെറുപ്പമായത് കൊണ്ട് അതിനെപ്പറ്റി വലിയ ധാരണയില്ലായിരുന്നു.

ആറാം ക്ലാസിലെ മലയാളത്തിന്റെ പിരീഡിലാണ് ആളെ കണ്ട് ഇഷ്ടത്തിലാവുന്നത്. ആ സൗഹൃദം തുടര്‍ന്ന് വിവാഹത്തിലേക്ക് എത്തി. കല്യാണം കഴിഞ്ഞിട്ട് ഏഴ് വര്‍ഷം ഒരുമിച്ച് ജീവിച്ചു. കുറേ കഴിഞ്ഞപ്പോള്‍ ഞങ്ങള്‍ക്ക് തന്നെ ബോറടിച്ചു. പന്ത്രണ്ട് വയസ് മുതല്‍ കാണുന്നതാണ്. ഇനി നീ പോയി വേറൊരു ലോകം കാണൂ, ഞാനും പോകട്ടെ എന്ന് പറഞ്ഞാണ് ആ ബന്ധം അവസാനിപ്പിക്കുന്നത്.

ഞങ്ങള്‍ക്കിടയില്‍ ഒരു തല്ലോ വഴക്കോ ഉണ്ടായിരുന്നെങ്കില്‍ പിന്നെയും മുന്നോട്ട് ജീവിച്ച് പോയെനെ. തല്ല് കൂടാത്തതാണ് പ്രശ്നമെന്ന് പിന്നീട് എനിക്ക് മനസിലായെന്ന് ലെന പറയുന്നു. അടുത്തിടെ അഭിമുഖങ്ങളിലെല്ലാം ഭര്‍ത്താവിനെ കുറിച്ച് ലെന പറഞ്ഞിരുന്നു. അവതാരകന്റെ ചോദ്യത്തിന് മുന്‍ഭര്‍ത്താവായിരുന്ന അഭിലാഷ് ഇപ്പോള്‍ എന്ത് ചെയ്യുകയാണെന്നും ആരാണെന്നും നടി വെളിപ്പെടുത്തിയിരിക്കുകയാണ്. ആഷിക് അബു സംവിധാനം ചെയ്ത 22 ഫീമെയില്‍ കോട്ടയം എന്ന സിനിമയുടെ സഹ എഴുത്തുകാരില്‍ ഒരാളാണ്. ഇപ്പോള്‍ ചട്ടമ്പി എന്ന സിനിമ സംവിധാനം ചെയ്ത അഭിലാഷാണ് എന്റെ മുന്‍ ഭര്‍ത്താവെന്ന് ലെന പറയുന്നു.

ഞങ്ങളുടെ റിലേഷന്‍ വളരെ മുകളില്‍ നില്‍ക്കുന്നതായിരുന്നു. ഇതിന് മുകളിലേക്ക് ഇനിയില്ലെന്ന് മനസിലായപ്പോഴാണ് ആ ബന്ധം അവസാനിപ്പിക്കുന്നത്. വേര്‍പിരിഞ്ഞെന്ന് കരുതി ശത്രുക്കളായി ജീവിക്കുകയല്ലെന്നും ഇപ്പോഴും അഭിലാഷും താനും നല്ല സുഹൃത്തുക്കളാണെന്ന് ലെന പറയുന്നു. ഏഴ് വര്‍ഷം ദമ്പതിമാരായിരുന്നെങ്കിലും കുട്ടികള്‍ ഇല്ലേ എന്ന് കൂടി അവതാരകന്‍ ചോദിച്ചിരുന്നു.

എന്നാല്‍ കുട്ടികള്‍ വേണ്ടെന്ന് വളരെ നേരത്തെ ഞങ്ങള്‍ തീരുമാനിച്ചിരുന്നതായിട്ടാണ് നടി പറയുന്നത്. അത്തരത്തില്‍ പല തീരുമാനങ്ങളും ഞങ്ങള്‍ നേരത്തെ എടുത്തിരുന്നു. അതൊക്കെ നന്നായി. എനിക്ക് എന്നെ ബോറടിക്കുന്നില്ലെന്നതാണ് അതിലെ ഏറ്റവും മനോഹരമായ കാര്യമെന്നും ലെന പറയുന്നു. എന്നാല്‍ നടിയുടെ വിവാഹമോചന കഥ കേട്ടിട്ട് ഇത്രയും സിംപിളായി കാര്യങ്ങള്‍ കൈകാര്യം ചെയ്യാന്‍ സാധിക്കുമോന്ന് ചോദിക്കുകയാണ് ആരാധകര്‍.

വിവാഹമോചനം നേടാന്‍ ഇതൊക്കെ ഒരു കാരണമാണോന്നാണ് പലരുടെയും ചോദ്യം. എന്തായാലും ലെനയും അഭിലാഷും ശരിക്കും മാതൃകയാണ്. ഒരുമിച്ച് ദമ്പതിമാരെ പോലെ ജീവിച്ച് വേര്‍പിരിഞ്ഞവരൊക്കെ പില്‍ക്കാലത്ത് ശത്രുക്കളായി മാറുകയാണ് ചെയ്തിട്ടുള്ളത്. അവിടെയാണ് വേര്‍പിരിയലിന്റെ മനോഹരമായ കഥ കേള്‍ക്കാന്‍ സാധിക്കുന്നത്.