ദിലീപ് മീശ പിരിച്ച് മലയാളക്കരയെ പുളകം കൊള്ളിച്ച സിനിമയായിരുന്നു ജോഷി സംവിധാനം ചെയ്ത റണ്‍വേ. ചിത്രത്തില്‍ മീശ പിരിച്ച് ഹീറോ പരിവേഷത്തിലെത്തിയത് മലയാളത്തിലെ ജനപ്രിയ നായകന്‍ ദിലീപായിരുന്നു. എന്നാല്‍ ഈ ചിത്രം മമ്മൂട്ടി അഡ്വാന്‍സ് വാങ്ങിയ ശേഷം ഒഴിവാക്കിയതാണെന്ന സത്യം അറിയുന്നവര്‍ ചുരുക്കമായിരിക്കും.

ബാലുകിരിയത്ത് 'തകിലുകൊട്ടാമ്പുറം' എന്ന ചിത്രത്തിലൂടെയായിരുന്നു സ്വതന്ത്രസംവിധായകനായി മാറിയത്. രണ്ടാമത്തെ ചിത്രമായ ' വിസ ' സൂപ്പര്‍ ഹിറ്റായതോടെ, ബാലുകിരിയത്തിന്റെ സമയം തെളിഞ്ഞു. തുടര്‍ന്ന് , തത്തമ്മേ പൂച്ച പൂച്ച - എങ്ങനെയുണ്ടാശാനേ - ഒന്നും മിണ്ടാത്ത ഭാര്യ എന്നിങ്ങനെ നാലോളം ചിത്രങ്ങള്‍ ഒരുക്കി. അതുവരെ ബാലുകിരിയത്ത് ചെയ്ത ആറുചിത്രങ്ങളില്‍ നാലിലും മമ്മൂട്ടിയുണ്ട്.

ആ , സമയത്താണ് ബാലുകിരിയത്തിന്റെ അനുജന്‍ ഗോപുരചിത്ര എന്ന പേരില്‍ ഒരു ഡിസ്ട്രിബ്യൂഷന്‍ കമ്പനി തുടങ്ങുന്നത് . ഗോപുരചിത്രക്ക് വേണ്ടിയായിരുന്നു നവ രചയിതാക്കളായ ഉദയ് കൃഷ്ണ - സിബി.കെ.തോമസിന്റെ 'വാളയാര്‍ പരമശിവം' എന്ന തകര്‍പ്പന്‍ കഥയുമായി മമ്മൂട്ടിയെ തേടി ബാലു പോയത്. കഥ കേട്ട് മമ്മൂട്ടി ത്രില്ലടിച്ചു . അവിടെ വെച്ച് അഞ്ചു ലക്ഷം രൂപ അഡ്വാന്‍സും വാങ്ങി . ബാലു കിരിയത്ത് ലൊക്കേഷന്‍ നിശ്ചയിക്കുകയും ആര്‍ട്ടിസ്റ്റുകളെ ബുക്ക് ചെയ്യുകയും ചെയ്തു.

ഇതിനിടയില്‍ , ഗോപുരചിത്ര വിതരണത്തിനെടുത്ത 'കാറ്റത്തൊരു പെണ്‍പൂവ് ' എന്ന ചിത്രം എട്ടു നിലയില്‍ പൊട്ടി. ഗോപുര ചിത്ര കമ്പനി പൊളിഞ്ഞു . പലരും മുങ്ങി . വിവരമറിഞ്ഞ മമ്മൂട്ടി ബാലുകിരിയത്തിനെ വിളിച്ചു അഡ്വാന്‍സ് വാങ്ങിയ അഞ്ചുലക്ഷം തിരിച്ചുകൊടുത്തു. സിനിമയുടെ ചിത്രീകരണം മുടങ്ങുകയും ചെയ്തു.

പിന്നീട് , പത്തോളം വര്‍ഷങ്ങള്‍ക്കുശേഷമാണ് മമ്മൂട്ടി ഇഷ്ട്ടപെട്ട വാളയാര്‍ പരമ ശിവത്തെ സിബിയും ഉദയനും കൂടി ദിലീപിനെ മുന്‍നിര്‍ത്തി ജോഷിയുടെ കയ്യില്‍ എല്‍പ്പിച്ചത് . ' റണ്‍വേ ' എന്ന പേരില്‍ വന്ന ചിത്രം മലയാളത്തിലെ എക്കാലത്തെയും സൂപ്പര്‍ഹിറ്റായി മാറിയിരുന്നു.