പൃഥ്വിരാജിന്റെ പുതിയ ചിത്രമായ എസ്രയുടെ സെറ്റില്‍ പ്രേതബാധയുണ്ടായി എന്നത് ഒരു സമയത്ത് പ്രചരിച്ച വാര്‍ത്തയാണ്. ഫോര്‍ട്ട് കൊച്ചിയില്‍ ഷൂട്ടിങ് തുടങ്ങിയപ്പോള്‍ മുതല്‍ സെറ്റില്‍ വിചിത്രമായ സംഭവങ്ങള്‍ അരങ്ങേറിയതെന്ന് അന്ന് പ്രമുഖ മാധ്യമങ്ങള്‍ തന്നെ റിപ്പോര്‍ട്ട് ചെയ്തിരുന്നു.

ആദ്യം ഇത് ആരും വകവെച്ചില്ലെങ്കിലും സംഗതി കൂടുതല്‍ പ്രശ്‌നമായതോടെ ഇപ്പോള്‍ പള്ളീലച്ചനെ കൊണ്ടുവന്ന് സെറ്റ് വെഞ്ചരിച്ചിരിക്കുകയാണ് അണിയറപ്രവര്‍ത്തകര്‍ ചെയ്തത്. ചിത്രീകരണം തുടങ്ങി രണ്ടാഴ്ച പിന്നിടുമ്പോളാണ് സംഭവമുണ്ടായത് എന്നാണ് അന്ന് റിപ്പോര്‍ട്ട് ചെയ്യപ്പെട്ടത്.

എസ്ര അടുത്ത് തന്നെ റിലീസിന് ഒരുങ്ങുകയാണ്, ഈ സമയത്താണ് ചിത്രത്തിന്റെ സംവിധായകന്‍ ഈ സംഭവത്തെക്കുറിച്ച് വിശദീകരിക്കുന്നത്. ഒരു പ്രമുഖ മാധ്യമത്തിന് നല്‍കിയ അഭിമുഖത്തില്‍ സംവിധായകന്‍ ജെയ് കൃഷ്ണന്‍ പറയുന്നത് ഇങ്ങനെ,

എനിക്കിത്തരം കാര്യങ്ങളില്‍ വിശ്വാസമില്ല. എന്നാല്‍ പലര്‍ക്കും നെഗറ്റീവ് എനര്‍ജി അനുഭവപ്പെട്ടുവെന്നു പറഞ്ഞു കേട്ടു. ആദ്യം കേള്‍ക്കുമ്പോള്‍ സിനിമയുടെ മാര്‍ക്കറ്റിങ്ങിനായി അണിയറക്കാര്‍ പറയുന്നതാണെന്നേ എല്ലാവരും കരുതൂ. എനിക്കു നേരിട്ട് അനുഭവമില്ലെങ്കിലും സെറ്റിലുണ്ടായിരുന്ന പലര്‍ക്കും ഇത്തരം അനുഭവമുണ്ടായി. ഇംഗ്ലിഷ് ഹൊറര്‍ ചിത്രങ്ങളുടെ ലൊക്കേഷനുകളില്‍ ഇത്തരം സംഭവങ്ങള്‍ മുന്‍പു റിപ്പോര്‍ട്ട് ചെയ്യപ്പെട്ടിട്ടുണ്ട്.