സമയമാകുമ്പോള്‍ എല്ലാവരെയും അറിയിക്കാം. ആരും വേവലാതിപ്പെടേണ്ട. വിവാഹ വാര്‍ത്ത നിഷേധിച്ച് നടി ഭാവന. കന്നഡ നിര്‍മ്മാതാവും ഭാവനയുമായുള്ള വിവാഹം 2017 ഏപ്രിലില്‍ നടക്കുമെന്ന് ചില മാധ്യമങ്ങളില്‍ വാര്‍ത്ത ഉണ്ടായിരുന്നു. വര്‍ഷങ്ങളായി ഇരുവരും പ്രണയത്തിലാണെന്നും വിവാഹ തീയതിയോട് അടുത്ത ദിവസങ്ങളില്‍ വരനെ വെളിപ്പെടുത്തുമെന്നുമായിരുന്നു റിപ്പോര്‍ട്ടുകള്‍.
ഇത്തരം വാര്‍ത്തകള്‍ പ്രചരിപ്പിക്കുന്നതില്‍ ദു:ഖമുണ്ടെന്നും വ്യാജവാര്‍ത്ത ഷെയര്‍ ചെയ്യരുതെന്നും ഭാവന പറയുന്നു. നേരത്തെയും ഭാവനയുടെ വിവാഹം കഴിഞ്ഞെന്നും പ്രണയത്തിലാണെന്നും വാര്‍ത്തകള്‍ പ്രചരിച്ചിരുന്നുവെന്നും ഇപ്പോള്‍ ഇത്തരം വ്യാജ പ്രചരണങ്ങള്‍ പരിഗണിക്കാറില്ലെന്നും ഭാവനയുടെ അമ്മ സൗത്ത് ലൈവിനോട് പറഞ്ഞു. നിയമനടപടികളെക്കുറിച്ച് ആലോചിച്ചിട്ടില്ല. ഹണി ബീ രണ്ടാം ഭാഗത്തിന്റെ ഷൂട്ടിംഗ് തിരക്കിലാണ് ഭാവന ഇപ്പോള്‍.തികച്ചും ലളിതമായ രജിസ്റ്റര്‍ വിവാഹമായിരിക്കും ഭാവനയുടേതെന്നും കുടുംബക്കാര്‍ മാത്രമേ ഉണ്ടാകുവെന്നും അച്ഛന്‍ അടുത്തകാലത്ത് മരണപ്പെട്ടതിനാലാണ് ആര്‍ഭാടം ഒഴിവാക്കുന്നതെന്നും ഭാവനയുടെ വിവാഹ വാര്‍ത്തയില്‍ വിവിധ മാധ്യമങ്ങളുടെ റിപ്പോര്‍ട്ട് ഉണ്ടായിരുന്നു.