കൊച്ചിയില്‍ പ്രമുഖ നടി ആക്രമിക്കപ്പെട്ട സംഭവത്തില്‍ പ്രതിഷേധവുമായി ഡബ്ബിംഗ് ആര്‍ട്ടിസ്റ്റും സാമൂഹയപ്രവര്‍ത്തകയുമായ ഭാഗ്യലക്ഷ്മി. പ്രമുഖ നടിക്ക് ഗുണ്ടാ ആക്രമണം എന്ന വാര്‍ത്ത കണ്ടാണ് വിവരം അറിഞ്ഞത്. നടി ആരാണെന്ന് കൂടി അറിഞ്ഞപ്പോള്‍ ശരീരമാകെ തളര്‍ന്നുവെന്ന് ഭാഗ്യലക്ഷ്മി പറയുന്നു. ഞാന്‍ സ്‌നേഹത്തോടെ മോളേ എന്ന് വിളിക്കുന്ന ആ പെണ്‍കുട്ടി. അവള്‍ എത്രമാത്രം ഭയന്ന് നിലവിളിച്ചിരിക്കാംഭാഗ്യലക്ഷ്മി പറഞ്ഞു. സ്ത്രീകളെ ആക്രമിക്കുന്ന രാക്ഷസന്‍മാരുടെ ഇന്നത്തെ ഇര ഞാനാണെങ്കില്‍ നാളെയത് നിങ്ങളാകാം നിങ്ങളുടെ മക്കളാകാം. ഓരോ സ്ത്രീയും കയ്യിലൊരു ആയുധം കരുതാനും ഈ രാക്ഷസന്‍മാര്‍ക്ക് നേരെ അത് പ്രയോഗിക്കാനുള്ള ധൈര്യവും ആര്‍ജിക്കണമെന്നും ഭാഗ്യലക്ഷ്മി സ്ത്രീകളെ ഓര്‍മ്മിപ്പിക്കുന്നു.

ഭാഗ്യലക്ഷ്മിയുടെ ഫെയ്‌സ്ബുക്ക് പോസ്റ്റ്, രാവിലെ പത്രം തുറന്നയുടനെ കണ്ട വാര്‍ത്ത വായിച്ച് ഞെട്ടി. 'പ്രമുഖ നടിക്ക് ഗുണ്ടാ ആക്രമണം'. നടി ആരായിരിക്കാം എന്ന് ചിന്തിക്കാനല്ല തോന്നിയത്..വീണ്ടും ഒരു സ്ത്രീക്ക് നേരേകൂടി ആക്രമണം...നടി ആരാണെന്ന്കൂടി അറിഞ്ഞപ്പോള്‍ ശരീരമാകെ തളര്‍ന്നു.ഞാന്‍ സ്‌നേഹത്തോടെ മോളേ എന്ന് വിളിക്കുന്ന ആ പെണ്‍കുട്ടി,ഈശ്വരാ എത്രമാത്രം ഭയന്ന് നിലവിളിച്ചിരിക്കാം അവള്‍..ആലോചിക്കുന്തോറും അടിവയറ്റില്‍ നിന്നൊരു ഭീതി... എന്താണ് ചെയ്യേണ്ടത്...ഓരോ സ്ത്രീ ശരീരത്തേയും കടന്നാക്രമിക്കാന്‍ ഈ രാക്ഷസന്മാര്‍ ഏതൊക്കെയോ രൂപത്തില്‍ എവിടെയൊക്കെയോ പതുങ്ങിയിരിക്കുന്നു.. 

അവന്റെ ഇര ഇന്ന് ഞാനാണെങ്കില്‍ നാളെയത് നിങ്ങളാവാം, നിങ്ങളുടെ മക്കളാവാം..നമ്മെ രക്ഷിക്കാന്‍ ഇവിടെ ആരുമില്ല..കുറ്റവാളിയെ രക്ഷിക്കാനാണ് നിയമമുണ്ടാക്കിയതെന്ന് തോന്നിപ്പിക്കുന്ന കോടതി വിധിയും, സ്ത്രീ സ്വയം ചോദിച്ച് വാങ്ങുന്നതാണ് ബലാത്സംഗം എന്ന് പറയുന്ന സമൂഹവും സ്ത്രീകളെ ഭയപ്പെടുത്തുകയാണ്. ഞാന്‍ വീണ്ടും വീണ്ടും സ്ത്രീകളെ ഓര്‍മിപ്പിക്കുകയാണ്..ഓരോ സ്ത്രീയും കൈയ്യിലൊരു ആയുധം കരുതാനും ഈ രാക്ഷസന്മാര്‍ക്ക് നേരേ അത് പ്രയോഗിക്കാനുമുളള ധൈര്യമാണ് നമ്മള്‍ ആര്‍ജിക്കേണ്ടത്..നമ്മുടെ ശരീരത്തിനു നേര്‍ക്കുളള ഈ കടന്നാക്രമണത്തെ ഭയപ്പെടുന്നതിലും എത്രയോ ഭേദമല്ലേ ജയിലില്‍ പോകുന്നത്..സ്ത്രീകള്‍ക്കെതിരെയുണ്ടാവുന്ന ഈ അനീതി ഇനിയും കണ്ടിരിക്കാതെ കണ്ണകിയെപ്പോലെ ചുട്ടെരിക്കണം..സ്ത്രീ ശാക്തീകരണമെന്നൊക്കെ ടെലിവിഷനു മുന്പിലിരുന്ന് സംസാരിക്കുകയല്ലാതെ സ്ത്രീക്ക് വേണ്ടി പ്രവര്‍ത്തിക്കാന്‍ ആരുമില്ല. നമുക്ക് ഒന്നിച്ച് നില്ക്കാം സ്വയ രക്ഷക്കായി..

സ്ത്രീ ശരീരത്തെ കടന്നാക്രമിക്കുന്ന ഈ പാഴ്ജന്മങ്ങളെ പ്രസവിച്ച അമ്മമാര്‍ കൂടി ചിന്തിക്കൂ ഇങ്ങനെയൊരു മകനെ വേണോ നിങ്ങള്‍ക്ക്.?..വീടിനുളളില്‍ അടച്ചിരിക്കുന്ന സ്ത്രീകളേ നിങ്ങള്‍ സുരക്ഷിതരാണെന്ന് കരുതരുത്...പുറത്തേക്ക് വരൂ.നമുക്കൊന്നിച്ച് നേരിടാം സ്ത്രീയുടെ ഭയമാണ് ആക്രമിയുടെ ധൈര്യം. സ്ത്രീയുടെ ധൈര്യമാണ് ആക്രമിയുടെ ഭയം.. എന്ന സത്യം തിരിച്ചറിയുക..