ന്യൂജെന്‍ സിനിമാപ്രവര്‍ത്തകര്‍ കഞ്ചാവിന്റെയും മയക്കുമരുന്നിന്റെയും അടിമകളായതോടെ പല സിനിമകളുടെയും ചിത്രീകരണം പൂര്‍ത്തിയാക്കാന്‍ നിര്‍മാതാക്കള്‍ ബുദ്ധിമുട്ടുകയാണ്. പണനഷ്ടം മാത്രമല്ല മാനഹാനിയും നേരിടുന്നുണ്ട്. മുതിര്‍ന്ന താരങ്ങളെയും ഇക്കൂട്ടര്‍ അപമാനിക്കുന്നു. കൊച്ചിയിലെ ദമ്പതികളായ ചലച്ചിത്രപ്രവര്‍ത്തകരാണ് ലഹരി ഉപയോഗത്തിന് പൊതുസ്വീകാര്യത ഉണ്ടാക്കിക്കൊടുത്തത്. എന്നാല്‍ ഇവരടങ്ങുന്ന സംഘത്തെ കുറിച്ച് പത്രങ്ങളില്‍ വാര്‍ത്തവന്നതോടെ ഇരുവരും ബംഗലുരുവിലെ നിംഹാന്‍സ് ആശുപത്രിയില്‍ ഡീ അഡിക്ഷന് ചികിത്സ തേടിയിരുന്നു.

തൊണ്ണൂറുകളില്‍ മഹാരാജാസ് കോളജിലെ സഹപാഠികളായിരുന്നവര്‍ ഒന്നാകെ ന്യൂജെന്‍ സിനിമയുടെ വക്താക്കളായി രംഗത്തെത്തിയതോടെയാണ് മയക്കുമരുന്ന് ഉപയോഗം സാര്‍വത്രികമായതെന്ന് മുതിര്‍ന്ന താരങ്ങള്‍ പറയുന്നു. ലഹരി ഉപയോഗത്തെ തുടര്‍ന്ന് കടുത്ത വിഷാദരോഗത്തിന് അടിമകളായ ചില താരങ്ങള്‍ മംഗലാപുരം, ബംഗലുരു, ഹൈദ്രബാദ് എന്നിവിടങ്ങളിലാണ് ചികിത്സതേടുന്നത്. ഇതില്‍ പലര്‍ക്കും പഴ്‌സണല്‍ സൈക്യാട്രിസ്റ്റുകള്‍ പോലുമുണ്ട്. ഒരു പ്രമുഖ ന്യൂജെന്‍ നടനെ പിതാവ് അമേരിക്കയിലയച്ചാണ് ചികില്‍സ നല്‍കിയത്. ഇപ്പോള്‍ വിവാഹം കഴിച്ച് കുടുംബസമേതം ജീവിക്കുകയാണിയാള്‍.

മയക്കുമരുന്ന, കഞ്ചാവ് ഉപയോഗത്തെ തുടര്‍ന്ന് മുതിര്‍ന്ന സംവിധായകനും നടനുമായ ആള്‍ തന്റെ ഇളയ മകനെ വീട്ടില്‍നിന്ന് അടുത്തിടെ പുറത്താക്കിയിരുന്നു. ന്യൂജെന്‍ താരമായ മകന്‍ മയക്കുമരുന്ന് കുത്തിവച്ച് നടത്തുന്ന അക്രമങ്ങളില്‍ പൊറുതിമുട്ടിയാണ് ഈ പിതാവിന് ഇങ്ങനെ ചെയ്യേണ്ടിവന്നത്. അടുത്തിടെ പുറത്തിറങ്ങിയ ചിത്രത്തിന്റെ സെറ്റില്‍ മകന്‍ മദോന്മത്തനായി നിര്‍മ്മാതാവിനെ പരസ്യമായി തെറിവിളിച്ചതും ഏറെ വിവാദമായിരുന്നു. സംവിധായകരുടെയും നടന്‍മാരുടെയും മക്കളും അവരുടെ സുഹൃത്തുക്കളും കൂട്ടത്തോടെ ചലച്ചിത്രലേകത്തേക്ക് ചേക്കേറിയതാണ് ഈ മേഖലയിലെ അരാജകത്വത്തിന് കാരണമായി ചൂണ്ടിക്കാണിക്കപ്പെടുന്നത്.