താര ദമ്പതികളായ ബിജുമേനോനും സംയുക്താ വര്‍മയും അമേരിക്കയ്ക്ക് പറക്കുന്നു. അവാര്‍ഡ് ഫങ്ഷനില്‍ പങ്കെടുക്കാനാണ് വര്‍ഷങ്ങള്‍ക്ക് ശേഷം യു.എസിലേക്ക് പോകുന്നത്. ഇതിന് മുന്നോടിയായി മകനെയും കൂട്ടി ചെന്നൈയിലെ അമേരിക്കന്‍ എംബസിയില്‍ വിസ ഇന്റര്‍വ്യൂവിന് കഴിഞ്ഞ ദിവസം പോയിരുന്നു. കാര്യങ്ങള്‍ ഭംഗിയായി. നടന്നു.

മുമ്പ് സ്റ്റേജ്ഷോയുമായി ബന്ധപ്പെട്ടാണ് രണ്ട് പേരും അമേരിക്കയില്‍ പോയിരുന്നത്. അന്നത്തെ വിമാന യാത്രക്കിടെ പരിപാടിയുടെ റിഹേഴ്സല്‍ വിമാനത്തില്‍ നടത്തിയത് വിവാദമായിരുന്നു. അന്ന് വേള്‍ഡ് ട്രെയിഡ് സെന്റര്‍ ആക്രമണം നടന്നിട്ട് അധിക നാള്‍ ആയിരുന്നില്ല. ലോകം മുഴുവന്‍ തീവ്രവാദ ഭീഷണിയിലായിരുന്നു. താരങ്ങളുടെ റിഹേഴ്സലില്‍ സംശയം തോന്നിയ ഫ്ളൈറ്റിലെ ജീവനക്കാര്‍ സുരക്ഷാ ഉദ്യോഗസ്ഥരെ വിവരം ധരിപ്പിച്ചു.

വിമാനം ന്യൂയോര്‍ക്ക് എയര്‍ പോര്‍ട്ടില്‍ ലാന്റ് ചെയ്തപ്പോള്‍ താരങ്ങളെയെല്ലാം അമേരിക്കല്‍ പൊലീസ് ( എഫ്.ബി.ഐ) കസ്റ്റഡിയിലെടുത്തു. സംയുക്താവര്‍മ ഉള്‍പ്പെടെയുള്ളവരെ മര്‍ദ്ദിച്ചെന്നാണ് അന്ന് വാര്‍ത്തകള്‍ പുറത്ത് വന്നത്. അവസാനം പരിപാടിയുടെ റിഹേഴ്സലാണ് നടത്തിയതെന്ന് ബോധ്യപ്പെട്ടതോടെയാണ് എല്ലാവരെയും വിട്ടയച്ചത്.

ഇത്തവണ സ്റ്റേജ് ഷോയ്ക്കല്ല പോകുന്നത് എന്നതും ശ്രദ്ധേയമാണ്. ഷാഫിയുടെ ഷെര്‍ലോക് ടോംസ് പൂര്‍ത്തിയാക്കിയ ശേഷമായിരിക്കും ബിജുമേനോന്റെ യാത്ര. മലയാളത്തില്‍ നിന്ന് വേറെയും താരങ്ങളുണ്ട്. സിനിമയുടെ തിരക്കുകള്‍ ഒഴിഞ്ഞാല്‍ ബിജുമേനോന്‍ തൃശൂരിലേ വീട്ടിലേക്ക് പോവുകയാണ് പതിവ്. കൂട്ട്കുടുംബമായാണ് ബിജുവും ഭാര്യയും സഹോദരങ്ങളും താമസിക്കുന്നത്.