ഡോ. ബിജുവിന്റെ ചിത്രങ്ങൾക്ക് ബ്രില്ല്യന്‍സില്ലെന്ന് മോഹന്‍ലാല്‍; താല്‍പര്യം ഉണ്ടെങ്കില്‍ അഭിനയിച്ചാല്‍ മതിയെന്ന് ഡോ. ബിജു ; സൂപ്പർതാരവും സംവിധായകനും തമ്മിലുള്ള വാക് പോരിന്റെ കഥ ഇങ്ങനെ
അന്താരാഷ്ട്ര ചലച്ചിത്രമേളകളില്‍ സാന്നിധ്യമായി ശ്രദ്ധേയനായ സംവിധായകന്‍ ഡോ. ബിജുവും മലയാളികളുടെ സ്വകാര്യ അഹങ്കാരം മോഹന്‍ലാലും തമ്മില്‍ വാക് തര്‍ക്കം രൂക്ഷമാവുന്നു. മോഹന്‍ലാലിനോട് നേരിട്ട് കഥ അവതരിപ്പിക്കാന്‍ സാധിക്കുന്നില്ലെന്ന് ഡോ. ബിജു പരാതി ഉന്നയിച്ചതോടെ ഇതിന് മറുപടിയുമായി താരം രംഗത്തെത്തിയിരുന്നു ഇതിന് പിന്നാലെയാണ് ഇരുവരും തമ്മില്‍ ശീതമായ വാക്പോര് ആരംഭിച്ചിരിക്കുന്നത്.
സ്ത്രീകളുടെ മാഗസിനായ കന്യകയിലെ അഭിമുഖത്തില്‍ ഡോ. ബിജുവിന്റെ ആക്ഷേപത്തിന് മോഹന്‍ലാല്‍ മറുപടി പറഞ്ഞത് ഇങ്ങനെ,
"ഡോ. ബിജു പറഞ്ഞുപരത്തുന്നതിനെയൊന്നും നമ്മള്‍ ചലഞ്ച് ചെയ്യാന്‍ ഉദ്ദേശിക്കുന്നില്ല. പക്ഷേ അദ്ദേഹം വന്നു കഥ പറഞ്ഞിട്ടുണ്ട്. അതു സത്യം. ഞാന്‍ പറഞ്ഞതുപോലെ കഥ കേള്‍ക്കുമ്ബോള്‍ എനിക്കെന്റേതായ ചില ചോദ്യങ്ങളുണ്ട്. അതിനു മറുപടി തരാന്‍ അദ്ദേഹത്തിനു സാധിച്ചില്ല. ആ ഒരു സിനിമയില്‍ അഭിനയിച്ചില്ല എന്നു വച്ച്‌ എനിക്കൊന്നും സംഭവിച്ചിട്ടില്ല. അതിലഭിനിയച്ചു എന്നുവച്ചും ഒന്നും സംഭവിക്കില്ല. അങ്ങനൊരു സിനിമയായിരുന്നു. എനിക്കതില്‍ ത്രില്ലിങായി യാതൊന്നും തോന്നിയില്ല. അത് അദ്ദേഹത്തിന്റെ പേഴ്സണല്‍ ഫിലിമാണ്. തീര്‍ച്ചയായും അത്തരം സിനിമകള്‍ നമുക്കു ചെയ്യാം. മുമ്ബ് ചെയ്തിട്ടുണ്ട് ഇനിയും ചെയ്യും. പക്ഷേ അതത്രയ്ക്കു ബ്രില്ല്യന്റായിരിക്കണം. ഒരു വാസ്തുഹാരയോ ഒരു വാനപ്രസ്ഥമോ.. അല്ലാതെ മനഃപൂര്‍വം ഒരു ആര്‍ട്ട്ഹൗസ് സിനിമയില്‍ അഭിനയിച്ചു കളയാം എന്നുവച്ച്‌ അഭിനയിക്കേണ്ട കാര്യം ഇന്നത്തെ നിലയ്ക്ക് എനിക്കില്ല".
അതേസമയം മോഹന്‍ലാലിന്റെ മറുപടിയോട് അല്‍പ്പം കടുത്തു തന്നെയാണ് സംവിധായകന്‍ ഡോ. ബിജു പ്രതികരിച്ചിരിക്കുന്നത്. അന്ന് മോഹന്‍ലാലുമായി അത്രയ്ക്കു വലിയ ചര്‍ച്ചകള്‍ ഒന്നും അന്നു നടന്നില്ല എന്നും ഒരു ഇനിഷ്യല്‍ ഡിസ്കഷന്‍ മാത്രമാണ് നടന്നത് എന്നും സംവിധായകന്‍ പറയുന്നു. മോഹന്‍ലാലിന് താല്‍പര്യമുണ്ടെങ്കില്‍ തന്റെ ചിത്രത്തില്‍ അഭിനയിച്ചാല്‍ മതിയെന്നും തനിക്ക് വലിയ താല്‍പര്യമൊന്നുമില്ലെന്നും ഡോ. ബിജു അഭിപ്രായപ്പെട്ടു.
"മറ്റു പ്രോജക്ടുകളുടെ തിരക്കിലായിരുന്നതു കൊണ്ട് ഇനിഷ്യല്‍ ഡിസ്കഷന്‍ മാത്രമാണ് ഉണ്ടായിരുന്നത്. എന്റെ സിനിമയില്‍ ആര് അഭിനയിച്ചാലും അതു കാണിക്കുന്നത് അന്താരാഷ്ട്രാവേദികളിലാണ്. അവിടെ ആര്‍ക്കും മോഹന്‍ലാലിനെയും അറിയില്ല മമ്മൂട്ടിയേയും അറിയില്ല. അതുകൊണ്ട് അതില്‍ ആര് അഭിനയിക്കുന്നു എന്നത് എന്നെ സംബന്ധിച്ച പ്രശ്നമുള്ള കാര്യം അല്ല. കാരണം ആ സിനിമകള്‍ കാണിക്കുന്നതു യൂറോപ്യന്‍ രാജ്യങ്ങളിലും അമേരിക്കയിലുമൊക്കെയാണ്.
അതുകൊണ്ടു സിനിമയുടെ ക്വാളിറ്റി മാത്രമാണ് അതില്‍ വിഷയം. ആര് അഭിനയിക്കുന്നു എന്നതു വിഷയമല്ല. നമ്മളോട് സഹകരിക്കാന്‍ താല്‍പ്പര്യമുള്ളവര്‍ സഹകരിക്കുന്നു എന്നു മാത്രം. ഒരു പക്ഷേ മോഹന്‍ലാല്‍ അഭിനയിച്ചതു കൊണ്ട് കേരളത്തില്‍ ഒരു മൈലേജ് ഉണ്ടാകുമെന്നുള്ളതല്ലാതെ മറ്റൊന്നും സംഭവിക്കാനില്ല." സംവിധായകന്റെ പ്രതികരണം ഇങ്ങനെ.
അതേസമയം ഇനി ഒരു സ്ക്രിപ്റ്റുമായി മോഹന്‍ലാലിനെ സമീപിക്കുമോ എന്ന ചോദ്യത്തിനു മോഹന്‍ലാലിന് താല്‍പ്പര്യം ഉണ്ടെങ്കില്‍ എന്റെ സിനിമകളില്‍ അഭിനയിക്കാം എന്നല്ലാതെ എനിക്ക് വലിയ താല്‍പ്പര്യം ഒന്നും ഇല്ല എന്നായിരുന്നു ഡോ. ബിജുവിന്റെ പ്രതികരണം.
https://www.facebook.com/Malayalivartha
