അമല്‍നീരദിന്റെ സ്റ്റൈലിഷ് മമ്മൂട്ടി ചിത്രം ബിഗ്ബിയുടെ രണ്ടാം ഭാഗം വരുന്നു. ആദ്യഭാഗത്തിലെ മമ്മൂട്ടിയുടെ നായകകഥാപാത്രത്തിന്റെ പേരാണ് ഇക്കുറി ടൈറ്റില്‍. ബിലാല്‍, ബിലാല്‍ ജോണ്‍ കുരിശിങ്കല്‍. അടുത്തവര്‍ഷം സിനിമ ഉണ്ടാകുമെന്ന് അമല്‍ നീരദ് ഫെയിസ്ബുക്കിലൂടെ അറിയിച്ചു. രക്തരൂക്ഷിതമായി അവന്‍ വരുന്നു എന്നാണ് സംവിധായകന്‍ ഫെയിസ്ബുക്കില്‍ കുറിച്ചത്. പത്ത് വര്‍ഷത്തിന് ശേഷമാണ് ബിലാല്‍ വീണ്ടും പ്രേക്ഷകര്‍ക്ക് മുന്നിലെത്തുന്നത്. അന്നും ഇന്നും മമ്മൂട്ടിക്ക് വലിയമാറ്റമില്ലാത്തതിനാല്‍ അണിയറപ്രവര്‍ത്തകര്‍ക്ക് ആശങ്കയില്ല. കൊച്ചിയിലെ ഗ്യാങ് വാറിന്റെ കഥ പറഞ്ഞ ബിഗ് ബി അന്ന് വരെ മലയാളത്തില്‍ ഉണ്ടായിരുന്ന സ്റ്റൈലിഷ് ചിത്രങ്ങളുടെ ജാതകം പൊളിച്ചെഴുതി. 

പഞ്ച് ഡയലോഗുകളും ആക്ഷന്‍ സീക്വന്‍സുകളും ക്യാമറയുടെ കരവിരുതും മമ്മൂട്ടിയുടെ സ്‌റ്റൈലിഷ് ലുക്കും നടത്തവും ചിത്രത്തിന്റെ സാമ്പത്തിക വിജയത്തിന് സഹായകമായി. മമ്മൂട്ടി, മനോജ് കെ.ജയന്‍, മംമ്ത, ബാല, പശുപതി, നഫീസാ അലി തുടങ്ങിയവരായിരുന്നു പ്രധാന താരങ്ങള്‍. ആന്റോജോസഫ് ആയിരുന്നു നിര്‍മാതാവ്. രണ്ടാംഭാഗം അമല്‍നീരദ് തന്നെയാണ് നിര്‍മിക്കുന്നത്. മറ്റ് താരങ്ങളെ തീരുമാനിച്ചുവരുന്നതേയുള്ളൂ. ഗോപിസുന്ദറിനെ ഏറെ ശ്രദ്ധേയനാക്കിയത് ആദ്യഭാഗത്തെ പശ്ചാത്തല സംഗീതമായിരുന്നു. രണ്ടാം ഭാഗത്തിലും ഗോപിതന്നെയാണ് ബി.ജി.എം ഒരുക്കുന്നത്. 

കൊച്ചി പഴയ കൊച്ചിയല്ലായിരിക്കും പക്ഷെ, ബിലാല് പഴയ ബിലാല് തന്നെയാ... എന്ന മമ്മൂട്ടിയുടെ മാസ് ഡയലോഗ് ഇന്നും പലരും പ്രയോഗിക്കാറുണ്ട്. ബിഗ് ബിക്ക് ഉണ്ണി ആര്‍ ആണ് തിരക്കഥയും സംഭാഷണവും എഴുതിയത്. പ്രശസ്ത ഹോളിവുഡ് ചിത്രമായ ഫോര്‍ ബ്രദേഴ്‌സില്‍ നിന്ന് പ്രചോദനം ഉള്‍ക്കൊണ്ടാണ് ചിത്രം ഒരുക്കിയത്. ക്യാമറാമാനായ അമല്‍നീരദ് സംവിധാന രംഗത്തേക്ക് ചുവടുറപ്പിച്ച ചിത്രം കൂടിയായിരുന്നു ബിഗ് ബി. കൊച്ചി, ധനുഷ്‌ക്കോടി എന്നിവിടങ്ങളിലായിരുന്നു ബിഗ് ബി ചിത്രീകരിച്ചത്. രണ്ടാംഭാഗം കൊച്ചിയിലാണെങ്കിലും ആദ്യത്തേതില്‍ നിന്ന് വ്യത്യസ്തമായ ലൊക്കേഷനുകളായിരിക്കും തെരഞ്ഞെടുക്കുക.