മേക്ക്ഓവര്‍ മലയാളസിനിമയില്‍ ഇപ്പോള്‍ പുതിയ ട്രെന്‍ഡാണ്. ഓരോ സിനിമകളിലും വ്യത്യസ്തമായ രൂപത്തിലും ഭാവത്തിലും പ്രത്യക്ഷപ്പെടാനായി എന്ത് ചെയ്യാനും ആര്‍ടിസ്റ്റുകള്‍ തയ്യാറാണ്. അതിനായി എത്ര റിസ്‌ക്കെടുക്കാനും തയ്യാറാണ്. തടി കൂട്ടുന്നതിനേക്കാള്‍ പ്രയാസമാണ് കുറയ്ക്കുന്നത്. നായിക വേഷം അധികം ചെയ്യുന്നില്ലെങ്കിലും മലയാളത്തിലെ സുന്ദരിമാരായ നടിമാരില്‍ ഒരാളാണ് ലെന. ലെനയുടെ പ്രയാം എത്രയാണെന്ന് കണ്ടാല്‍ പറയാനൊക്കില്ല. കഥാപാത്രങ്ങള്‍ വിവേചനബുദ്ധിയോടെ തെരഞ്ഞെടുക്കുന്ന അപൂര്‍വം നടിമാരില്‍ ഒരാളുമാണ് താരം. പൃഥ്വിരാജിന്റെ അമ്മയായി വരെ അഭിനയിക്കാന്‍ ശോഭന പോലും മടിച്ചപ്പോള്‍ ധൈര്യം കാണിച്ച താരമാണ് ലെന.

സിനിമകള്‍ വാരിവലിച്ച് ചെയ്യുന്നയാളല്ല ലെന. സിനിമകളില്‍ ഗ്യാപ്പെടുത്ത ദിവസങ്ങളില്‍ നന്നായി ഭക്ഷണം കഴിച്ചത് കാരണം നല്ല തടിവെച്ചു. ആ ദിവസങ്ങളില്‍ വ്യായാമവും ചെയ്തിരുന്നില്ല. ഇതോടെ ഭാരം കൂടി. അതോടെ ആഹാരം നിയന്ത്രിച്ചു. എക്‌സര്‍സൈസ് വീണ്ടും തുടങ്ങി. എന്നിട്ടും തടികുറയ്ക്കാനായില്ല. ഇതിനിടെ നല്ലൊരു വേഷവുമായി ഒരു സംവിധായകന്‍ എത്തി. ചെയ്യാമെന്ന് താരം സമ്മതിച്ചു. പക്ഷെ, സംവിധായകന്‍ ഒരു നിബന്ധന മുന്നോട്ട് വെച്ചു. ഭാരം കുറയ്ക്കണം, കുറഞ്ഞത് പത്ത് കിലോയെങ്കിലും. ശ്രമിക്കാമെന്ന് പറഞ്ഞെങ്കിലും എങ്ങനെയെന്ന ആശങ്ക താരത്തിനുണ്ടായി. അങ്ങനെയാണ് ലൂസിയ എന്ന സ്ത്രീയെക്കുറിച്ച് കേട്ടത്. തടികുറയ്ക്കാന്‍ അവരെന്തോ ഷോ നടത്തുന്നുണ്ടെന്ന് അറിഞ്ഞു.

തേടി ചെന്നപ്പോള്‍ ലൂസിയ ലെനയുടെ പഴയ സുഹൃത്തായിരുന്നു. കാര്യം അവതരിപ്പിച്ചപ്പോള്‍ അഞ്ച് ദിവസം കൊണ്ട് ഏഴ് കിലോ കുറച്ച് കൊടുത്തിട്ടുണ്ടെന്ന് പറഞ്ഞു. നൃത്തത്തിലൂടെയും ആഹാരനിയന്ത്രണത്തിലൂടെയും ഭാരം കുറയ്ക്കുകയാണ് ലൂസിയ ചെയ്യുന്നത്. എന്തായാലും പത്ത് ദിവസം കൊണ്ട് ലെനയ്ക്ക് ഉദ്ദേശിച്ച റിസല്‍ട്ട് കിട്ടി. ഇത്തരം സ്ഥാപനങ്ങള്‍ കേരളത്തിലുടനീളം ഉണ്ടെങ്കില്‍ അത് പലര്‍ക്കും പ്രയോജനമാകുമെന്ന് താരം വിശ്വസിച്ചു. അതോടെ സ്ഥാപനത്തിന്റെ പാട്ണറായി. സിനിമയില്‍ നിന്ന് കിട്ടുന്ന പണം എങ്ങനെ നിക്ഷേപിക്കണമെന്ന് ആലോചിച്ചിരിക്കുകയായിരുന്നു താരം.