മരണ ശേഷം തന്റെ മനോഹരമായ കണ്ണുകള്‍ ദാനം ചെയ്യാന്‍ നടന്‍ ഉണ്ണിമുകുന്ദന്‍ തീരുമാനിച്ചു. നേത്രദാനത്തിന് സമ്മതപത്രം ഒപ്പിട്ടു നല്കി കൊണ്ടാണ് കണ്ണന്‍താമരക്കുളത്തിന്റെ 'ചാണക്യതന്ത്ര'ത്തിന് യുവതാരം തുടക്കം കുറിച്ചത്. അനൂപ്‌മേനോനാണ് ചിത്രത്തിലെ മറ്റൊരു പ്രധാന താരം. അച്ചായന്‍സിന് ശേഷം ഉണ്ണിമുകുന്ദനും കണ്ണന്‍താമരക്കുളവും ഒന്നിക്കുന്ന സിനിയില്‍ ശിവദയും ശ്രുതിരാമചന്ദ്രനുമാണ് നായികമാര്‍. ആക്ഷന്‍ ത്രില്ലറാണ് ഇക്കുറി കണ്ണന്‍ പറയുന്നത്. ദിനേശ് പള്ളത്താണ് തിരക്കഥ എഴുതുന്നത്. കണ്ണന്‍ താമരക്കുളത്തിന്റെ അച്ചായന്‍സും തിങ്കള്‍ മുതല്‍ വെള്ളി വരെയും ആടുപുലിയാട്ടവും സാമ്പത്തിക വിജയമായിരുന്നു.

മമ്മൂട്ടി നായകനാകുന്ന മാസ്റ്റര്‍ പീസാണ് ഉണ്ണിമുകുന്ദന്റെ പുതിയ ചിത്രം. ക്രിസ്മസ് റിലീസാണിത്. ഇര എന്ന സിനിമയില്‍ സുരേഷ് ഗോപിയുടെ മകന്‍ ഗോകുല്‍ ഉണ്ണിക്കൊപ്പം അഭിനയിക്കുന്നുണ്ട്. കൊല്ലത്തും പരിസത്തും അതിന്റെ ചിത്രീകരണം പൂര്‍ത്തിയാക്കിയ ശേഷമാണ് ഉണ്ണിമുകുന്ദന്‍ ചാണക്യസൂത്രത്തില്‍ ജോയിന്‍ ചെയ്തത്. ആരോഗ്യകാര്യങ്ങള്‍ അതീവ ശ്രദ്ധാലുവായ ഉണ്ണിമുകുന്ദന്‍ കണ്ണുകള്‍ ദാനം ചെയ്തത് സമൂഹത്തിന് മാതൃകയാണെന്ന് കണ്ണന്‍ താമരക്കുളം പറഞ്ഞു.

സായ്കുമാര്‍, രമേഷ് പിഷാരടി, ധര്‍മജന്‍, ഹരീഷ് കണാരന്‍ തുടങ്ങിയവരും അഭിനയിക്കുന്നു. നീണ്ട ഇടവേളയ്ക്ക് ശേഷം കൈതപ്രം ദാമോദരന്‍ നമ്പൂതിരി പാട്ടെഴുതുന്നു എന്ന പ്രത്യേകതയും ചിത്രത്തിനുണ്ട്. ഷാന്‍ റഹ്മാനാണ് ഈണം. ഈ ചിത്രത്തിന് ശേഷം മമ്മൂട്ടി നായകനാകുന്ന കുട്ടനാടന്‍ ബ്‌ളോഗ് എന്ന സിനിമയില്‍ ഉണ്ണിമുകുന്ദന്‍ അസോസിയേറ്റ് ഡയറക്ടറായും ജോലി ചെയ്യും. താരത്തിന്റെ അടുത്ത സുഹൃത്തായ സേതുവാണ് ചിത്രത്തിന്റെ സംവിധായകന്‍.