നിവിന്‍ പോളി നായകനായ തമിഴ് ചിത്രം റിച്ചിയെ വിമർശിച്ച സംവിധായകനും നടനുമായ രൂപേഷ് പീതാംബരനെതിരെ ഫേസ്ബുക്കിൽ പ്രതിഷേധം ശക്തമാണ്. തനിക്കെതിരെയുള്ള പ്രതിഷേധങ്ങൾക്കും അസഭ്യങ്ങൾക്കും മറുപടിയുമായി എത്തിയിരിക്കുകയാണ് രൂപേഷ്. റിച്ചിയുടെ ഒറിജിനല്‍ ഉളിദവരു കണ്ടതെ എന്ന കന്നഡ ചിത്രത്തിനെ പ്രശംസിച്ചു കൊണ്ട് രൂപേഷ് ഇട്ട പോസ്റ്റാണ് വിവാദങ്ങള്‍ക്ക് തുടക്കം കുറിച്ചത്.

ഉളിദവരു കണ്ടതെ ഒരു മാസ്റ്റര്‍പ്പീസ് ആണെന്നും അതെങ്ങനെ വെറും 'പീസ്' ആയെന്ന് ചിന്തിക്കാന്‍ കഴിയുന്നില്ലെന്നുമാണ് രൂപേഷ് പറഞ്ഞത്. ഇതോടെ നിവിന്‍ പോളി ആരാധകർ രൂപേഷിനെതിരെ തിരിയുകയും ചെയ്തു. എന്നാൽ തന്റെ സുഹൃത്തിന്റെ ഒരു പഴയ വര്‍ക്കിനെ അഭിനന്ദിക്കുക മാത്രമായിരുന്നു താൻ ചെയ്തതെന്നും, ഉളിദവരു കണ്ടതെയ്ക്ക് വേണ്ടത്ര പരിഗണന ലഭിക്കാതെ പോയി എന്നുമാണ് താൻ പറഞ്ഞത്. തന്റെ അഭിപ്രായം ഇപ്പോൾ ഇറങ്ങിയ സിനിമയെപ്പറ്റി അല്ലെന്നും തനിക്ക് അഭിപ്രായ സ്വാതന്ത്ര്യമുണ്ടെന്നും രൂപേഷ് പ്രതികരിച്ചു.