നടിയെ ആക്രമിച്ച സംഭവത്തില്‍ നടന്‍ ദിലീപിന് അനുകൂലമായി ചാനല്‍ ചര്‍ച്ചകളില്‍ പങ്കെടുത്ത് സംസാരിച്ചതിന് മഹേഷിന് പ്രതിഫലം കിട്ടി. ദിലീപ് നായകനായ കമാരസംഭവത്തില്‍ മഹേഷ് അഭിനയിച്ചു. മുമ്പ് ദിലീപ് ചിത്രങ്ങളിലൊന്നും അഭിനയിച്ചിട്ടില്ലാത്ത മഹേഷിനെ ഇത്തവണ ജനപ്രിയന്‍ നേരിട്ട് ക്ഷണിക്കുകയായിരുന്നു. കമാരസംഭവത്തിന്റെ തുടക്കത്തില്‍ മഹേഷിന് വേഷമില്ലായിരുന്നു. ദിലീപ് അറസ്റ്റിലാവുകയും അതിന് ശേഷം നടന്ന സംഭവവികാസങ്ങളില്‍ പിന്തുണ നല്‍കിയതിന് കിട്ടിയ സമ്മാനമാണ് പുതിയ വേഷം. ഇത് കൂടാതെ മറ്റ് രണ്ട് ചിത്രങ്ങളില്‍ കൂടി മഹേഷിനെ ദിലീപ് കാസ്റ്റ് ചെയ്യിച്ചിട്ടുണ്ടെന്ന് അറിയുന്നു. രണ്ട് പെണ്‍മക്കളുള്ള മഹേഷ് നടിയെ ആക്രമിച്ച കേസില്‍ കുറ്റാരോപിതനായ ദിലീപിനെ അനുകൂലിച്ച് എത്തിയതിനെതിരെ സോഷ്യല്‍ മീഡിയയില്‍ വ്യാപക പ്രതിഷേധം ഉയര്‍ന്നിരുന്നു. 

കുറേ വര്‍ഷങ്ങളായി സിനിമയില്‍ ഒരു ചെറിയ വേഷത്തിനായി കാത്തിരിക്കുകയായിരുന്നു മഹേഷ്. ലക്ഷ്യം എന്ന ചിത്രത്തില്‍ ചെറിയൊരു വേഷം ചെയ്തിരുന്നു. തൊണ്ണൂറുകളുടെ തുടക്കം മുതല്‍ സിനിമയില്‍ സജീവമായിരുന്നു. മഹേഷ്. തന്നെ ആരൊക്കെയോ ഒതുക്കിയെന്നാണ് താരം പറയുന്നത്. വിവാഹശേഷം സിനിമകള്‍ കുറഞ്ഞതോടെ മഹേഷ് അമേരിക്കയിലേക്ക് പോയി. അവിടെ കുറേ വര്‍ഷം ജോലി ചെയ്‌തെങ്കിലും വലിയ മെച്ചമുണ്ടായില്ല. തുടര്‍ന്ന് നാട്ടിലെത്തി സിനിമയില്‍ സജീവമാകാന്‍ ശ്രമിച്ചെങ്കിലും നടന്നില്ല. അങ്ങനെയാണ് പൃഥ്വിരാജിനെ നായകനാക്കി കലണ്ടര്‍ എന്ന ചിത്രം സംവിധാനം ചെയ്തത്. അത് എട്ട്‌നിലയില്‍ പൊട്ടിയതോടെ സിനിമയിലേക്ക് തിരിഞ്ഞ് നോക്കാന്‍ വയ്യാത്ത സ്ഥിതിയായി. 

സീരിയലുകളാണ് പിന്നീട് മഹേഷിനെ രക്ഷിച്ചത്. നിരവധി സീരിയലുകളില്‍ ചെറുതും വലുതുമായ നിരവധി വേഷങ്ങള്‍ ചെയ്‌തെങ്കിലും സിനിമയായിരുന്നു സ്വപ്നം. മലയാളസിനിമ തന്നെ മറന്നെന്ന് പലതവണ മഹേഷ് മാധ്യമങ്ങളിലൂടെ പരിഭവം പറഞ്ഞിരുന്നു. എന്നിട്ടും ആരും മഹേഷിനെ ക്ഷണിച്ചില്ല. ഇതിനിടെയാണ് നടിയെ ആക്രമിച്ച സംഭവം ഉണ്ടായതും അതിന് പിന്നാലെ ദിലീപിനെതിരെ മാധ്യമങ്ങളും പൊതുസമൂഹവും തിരിഞ്ഞത്. വിമര്‍ശനങ്ങള്‍ ഭയന്ന് ദിലീപുമായി അടുത്തബന്ധമുണ്ടായിരുന്ന പലരും പരസ്യപിന്തുണയ്ക്ക് തയ്യാറാകാതിരുന്നപ്പോഴാണ് മഹേഷ് ദിലീപിന് വേണ്ടി ചാനല്‍ ചര്‍ച്ചകളില്‍ സജീവമായത്.