മകളെ നഷ്ടപ്പെട്ടെങ്കിലെന്താ, അവന് അധികം പ്രായമൊന്നും ആയിട്ടില്ലല്ലോ, ഇനിയും കുഞ്ഞിനെ ഉണ്ടാക്കാമല്ലോ... കാറപകടത്തില് ഗുരുതരമായി പരിക്കേറ്റ് ചികിത്സയില് കഴിയുന്ന ബാലഭാസ്കറിനെതിരെ പ്രവാസി യുവാവിന്റെ അശ്ലീല കമന്റ്; പൊങ്കാലയിട്ട് സോഷ്യൽ മീഡിയ
കാറപകടത്തില് ഗുരുതരമായി പരിക്കേറ്റ് ചികിത്സയില് കഴിയുന്ന വയലിനിസ്റ്റ് ബാലഭാസ്കറിന്റെ നിലയില് പുരോഗതിയുണ്ടെന്ന് ആശുപത്രി അധികൃതര്. അതേസമയം ബാലഭാസ്കറിനെതിരെ പ്രവാസി യുവാവിന്റെ അശ്ലീല കമന്ററിനെതിരെ രൂക്ഷ വിമര്ശനവുമായി സോഷ്യൽ മീഡിയ. സ്വന്തം മകളുടെ വിയോഗ വാര്ത്ത പോലും അറിയാതെ ഒന്നും അറിയാതെ കിടക്കുന്ന വ്യക്തിയ്ക്ക് നേരെയായിരുന്നു വായിച്ചാല് അറപ്പുളവാക്കുന്ന കമന്റ്. മനസില് കുഷ്ഠം നിറച്ച പ്രവാസി യുവാവിന്റെ പേര് പ്രബേ ലിഫിയെന്നാണ് സോഷ്യല് മീഡിയ പറയുന്നത്.
മുറിവിലും മുളക് പുരട്ടുന്ന സൈബര് പുഴുക്കളെ എടുത്ത് കളയണമെന്ന് അവര് പ്രതികരിച്ചു. ‘മകളെ നഷ്ടപ്പെട്ടെങ്കിലെന്താ, അവന് അധികം പ്രായമൊന്നും ആയിട്ടില്ലല്ലോ, ഇനിയും കുഞ്ഞിനെ ഉണ്ടാക്കാമല്ലോ.’ എന്നതായിരുന്നു മേല്പ്പറഞ്ഞയാളുടെ അറപ്പുളവാക്കുന്ന ആ സോഷ്യല് മീഡിയ കമന്റിന്റെ സാരം.
ഒരു നാട് മുഴുവന് ബാലഭാസ്കറിനും കുടുംബത്തിനും വേണ്ടി പ്രാര്ത്ഥനയ്ക്കെത്തുമ്പോഴാണ് വിഷം തീണ്ടിയ ഈ വാക്കുകള് എത്തുന്നത്. പ്രബേ ലിഫിയെന്ന പേരുകാരനേയും ക്രൂരമായ അവന്റെ വാക്കുകളേയും സോഷ്യല് മീഡിയ പ്രതിഷേധം കൊണ്ട് പൊതിയുമ്പോള് ബാലഭാസ്കറിന്റെ സുഹൃത്തും റേഡിയോ ജോക്കിയുമായ കിടിലം ഫിറോസും രംഗത്തെത്തിയിരിക്കുകയാണ്. മനുഷ്യത്വമില്ലാത്ത വാക്കുകള് പുലമ്പി നിറച്ച ഇയാളെ കണ്ടെത്തണമെന്നും ഫിറോസ് ഫേസ്ബുക്ക് കുറിപ്പിലൂടെ വ്യക്തമാക്കുന്നു.
കമന്റിനെതിരെ പ്രതിഷേധം ശക്തമായതോടെ ഇക്കാര്യത്തിൽ തനിക്ക് പറ്റിയ പിശക് മനസിലായെന്ന് കാട്ടി ഇയാൾ രംഗത്തെത്തി. അറിവില്ലായ്മ മൂലം സംഭവിച്ച് പോയ തെറ്റാണെന്നും വാർത്ത വ്യാജമാണെന്ന് കരുതിയാണ് അങ്ങനെ പ്രതികരിച്ചതെന്നും എല്ലാവരോടും മാപ്പ് ചോദിക്കുന്നതായും ഇയാൾ കുറിച്ചു. കിടിലം ഫിറോസ് തന്നെയാണ് ഇക്കാര്യം പോസ്റ്റ് ചെയ്തത്. ഇതിന് പിന്നാലെ ഇയാൾ തന്റെ ഫേസ്ബുക്ക് അക്കൗണ്ട് ഡി ആക്ടിവേറ്റ് ചെയ്തെന്നാണ് വിവരം.
https://www.facebook.com/Malayalivartha