ലോക സുന്ദരിമാരായ സുസ്മിത സെന്നും ഐശ്വര്യ റായിയും പ്രേക്ഷകരുടെ പ്രിയതാരങ്ങളാണ്. അഭിഷേക് ബച്ചനെ വിവാഹം കഴിച്ച് മകള്‍ ആരാധ്യയുമൊത്ത് കഴിയുമ്പോഴും ഐശ്വര്യ ബോളിവുഡിലെ തിരക്കുള്ള നായികമാരില്‍ ഒരാളാണ്. സിനിമയില്‍ അത്ര സജീവമല്ലാത്ത സുസ്മിത രണ്ട് പെണ്‍കുട്ടികളെ ദത്തെടുത്ത് അവര്‍ക്കൊപ്പം കഴിയുന്നു. ഇതിനിടെ താരം വിവാഹിതയാകാന്‍ ഒരുങ്ങുന്നുവെന്ന വാര്‍ത്തയാണ് പുറത്തുവരുന്നത്.

ഫാഷന്‍ മോഡലായ റോഹ്മാന്‍ ഷാലാണ് സുസ്മിതയുടെ കഴുത്തില്‍ മിന്നുചാര്‍ത്തുകയെന്നാണ് അറിയുന്നത്. മക്കളായ അലീഷയ്ക്കും റെനിയ്ക്കും ഒപ്പം സുസ്മിതയുടെ ദീപാവലി ആഘോഷങ്ങളില്‍ ഇക്കുറി റോഹ്മാന്‍ ഷാലുമുണ്ടായിരുന്നു. നാലുപേരും ഒന്നിച്ചുള്ള ക്യൂട്ട് ചിത്രങ്ങള്‍ സുസ്മിത തന്നെയാണ് ഇന്‍സ്റ്റാഗ്രാമിലൂടെ പങ്കുവച്ചത്.

42കാരിയായ സുസ്മിതയും 27കാരനായ റോഹ്മാനും പ്രണയത്തിലാണെന്ന വാര്‍ത്ത വന്നിട്ട് നാളേറെയായി. ഇക്കാര്യം താരം ഇതുവരെ തുറന്നു സമ്മതിച്ചിരുന്നില്ല. എന്നാല്‍, ദീപാവലി ചിത്രങ്ങള്‍ ഈ വാര്‍ത്തകള്‍ ശരിവയ്ക്കും വിധമുള്ളതായിരുന്നു. ഒരു ഫാഷന്‍ ഷോയില്‍ വച്ചാണ് ഇവര്‍ പരിചയപ്പെട്ടതും സുഹൃത്തുക്കളായതും.

എന്നാല്‍ സൗഹൃദം വളരെ പെട്ടന്ന് പ്രണയമായി മാറി . അധികം വൈകാതെ സുസ്മിത വിവാഹം സംബന്ധിച്ച വിവരവും ഔദ്യോഗികമായി അറിയിക്കുമെന്നാണ് ഇരുവരുടെയും അടുത്ത സുഹൃത്തുക്കള്‍ നല്‍കുന്ന സൂചന.