ഇപ്പോള്‍ വയസ് ഇരുപത്താറായി. മുപ്പത്തഞ്ചാകും മുമ്ബ് അമേരിക്കന്‍ നടിയായ കിം കര്‍ദിഷിയാനെപ്പോലാകണം. ബ്രസീലിയന്‍ മോഡലായ ജെന്നിഫര്‍ പാംലോണയുടെ ഒരേ ഒരു ആഗ്രഹമാണിത്.അതിനായുള്ള കഠിന പരിശ്രമത്തിലാണ് അവരിപ്പോള്‍. വര്‍ഷങ്ങളായുള്ള പരിശ്രമത്തിന്റെ ഫലമായി കിമ്മിന്റെ വിദൂര ഛായവന്നിട്ടുണ്ട്. പക്ഷേ, അതുകൊണ്ട് തൃപ്തിയാകാന്‍ ജെന്നിഫര്‍ ഒരുക്കമല്ല.മൂന്നരക്കോടിരൂപയിലേറെയാണ് ഡ്യൂപ്‌ളിക്കേറ്റ് കിമ്മാവാന്‍ ഇതുവരെ ചെലവാക്കിയത്.

നിരവധി സൗന്ദര്യവര്‍ദ്ധക ശസ്ത്രക്രിയകള്‍ക്ക് വിധേയയായാണ് ഇപ്പോഴത്തെ രൂപത്തിലായത്. ഒരാഴ്ചയ്ക്കുള്ളില്‍ ഒമ്ബതുശസ്ത്രക്രിയകള്‍ക്ക് വരെ വിധേയയായിട്ടുണ്ട്.ചുണ്ട്, മൂക്ക്, മാറിടങ്ങള്‍, നിതംബം, വയറ് തുടങ്ങിയിടങ്ങളിലാണ് കൂടുതല്‍ ശസ്ത്രക്രിയകള്‍ നടത്തിയത്. ശസ്ത്രക്രിയക്ക് വിധേയാവുക എന്നതാണ് ഇപ്പോഴത്തെ ഹോബി. 

മോഡലിംഗില്‍ നിന്ന് കിട്ടുന്ന വരുമാനത്തില്‍ ഉണ്ണാനും ഉടുക്കാനുമുള്ളത് എടുത്തശേഷം ബാക്കിയെല്ലാം ഡോക്ടര്‍മാര്‍ക്ക് കൊടുക്കുകയാണ്. കിമ്മിനോടുള്ള ആരാധന ചെറുപ്പം മുതല്‍ തുടങ്ങിയതാണ്.

അന്ന് കിം ഇത്രയും പോപ്പുലറല്ല. പതിനേഴാം വയസില്‍ മാറിടങ്ങളിലാണ് ആദ്യശസ്ത്രക്രിയ നടത്തിയത്. പിന്നങ്ങോട്ട് ശസ്ത്രക്രിയകളുടെ പൂരമായിരുന്നു. 

ഇതിനൊപ്പം വിലകൂടിയ ക്രീമുകളും മരുന്നുകളും ഉപയോഗിച്ചു. പലരും പലതും പറയുന്നുണ്ടെങ്കിലും ചികിത്സകളില്‍ താന്‍ തൃപ്തയാണെന്നാണ് ജെന്നിഫര്‍ പറയുന്നത്. എന്നാല്‍ ഇനിയും ശസ്ത്രക്രിയകള്‍ക്ക് വിധേയയാവുന്നത് പ്രശ്‌നങ്ങള്‍ക്ക് ഇടയാക്കുമെന്നാണ് ഡോക്ടര്‍മാരുടെ മുന്നറിയിപ്പ്.