അവതാരകയായാണ് എലീന പടിക്കല്‍ പ്രേക്ഷകരുടെ മുന്‍പില്‍ എത്തുന്നത്. ഒന്നിലേറെ ചാനലുകളിലായി വ്യത്യസ്തമായ ഷോകളാണ് എലീനയുടെതായി ഒരേ സമയം വീട്ടകങ്ങളിലെത്തുന്നത്. പോരാത്തതിന് ജനപ്രിയസീരിയല്‍ ഭാര്യയിലെ വില്ലത്തിയായ 'നായിക'കൂടിയാണ് എലീന ഇപ്പോള്‍. നെഗറ്റീവ് കഥാപാത്രമാണെങ്കിലും പ്രേക്ഷകര്‍ക്ക് പ്രിയങ്കരിയായി മാറിയ താരം സോഷ്യൽ മീഡിയയിൽ സജീവ സാന്നിധ്യമാണ്. ഇപ്പോഴിതാ താരം ഇന്‍സ്റ്റാഗ്രാമിലൂടെ പുതിയ ചിത്രം പങ്കുവെച്ചിരിക്കുകയാണ്. മേക്കപ്പ് ഇല്ലാത്ത ചിത്രമാണ് എലീന പങ്കുവെച്ചത്.

വിശ്വസിച്ചാലും ഇല്ലെങ്കിലും എന്ന തുടങ്ങുന്ന കുറിപ്പിനൊപ്പമാണ് താരം ഇന്‍സ്റ്റാഗ്രാമിലൂടെ ചിത്രം പങ്കുവച്ചത്.വിശ്വസിച്ചാലും ഇല്ലെങ്കിലും ഞാന്‍ എപ്പോഴും ഇഷ്ടപ്പെടുന്ന എന്റെ രൂപം ഇതാണ്. മേക്ക് അപ്പില്ലാതെ, മുടി പിന്നിലേക്കു കെട്ടി, താരപ്രഭാവമില്ലാത്ത, തമാശകളും സ്നേഹവുമുള്ള, ഒരുപാട് സംസാരിക്കുന്ന പെണ്‍കുട്ടി. ഞങ്ങള്‍ എപ്പോഴും ഇങ്ങനെ ചുറ്റി നടന്നാല്‍ എന്തായിരിക്കുമെന്ന് ആലോചിച്ചു അദ്ഭുതപ്പെടാറുണ്ട്. ഞങ്ങള്‍ എപ്പോഴും ചുണ്ടില്‍ നിറം തേച്ച്‌, സ്റ്റൈലിഷ് ഹെയര്‍ സ്റ്റൈലില്‍ മാത്രമേ നടക്കാവൂ എന്നു വല്ല നിയമവുമുണ്ടോ? ഇല്ല. അതു വെറും മനസ്ഥിതി മാത്രമാണ്.

ഇതൊന്നുമില്ലാത്ത യഥാര്‍ഥ ചിത്രങ്ങള്‍ പങ്കുവയ്ക്കാന്‍ എനിക്കു യാതൊരു മടിയുമില്ല. അതെ ഇതായിരുന്നു ഞാന്‍, ഇതാണു ഞാന്‍. (ഷോകളിലും ടിവി സീരിയലുകളിലുമല്ലാതെ ഞാനിങ്ങനെയാണ്)'' എലീന കുറിച്ചു.