മലയാളത്തിലും തമിഴിലും നായികയായി തിളങ്ങുന്ന നടിയാണ് മഞ്ജിമ മോഹൻ. സൂര്യ ടിവിയിലെ ഔര്‍ കിഡ്‌സ് പരിപാടി അവതരിച്ചിരുന്നത് ഈ താരമായിരുന്നു. മികച്ച സ്വീകാര്യതയും പിന്തുണയുമായിരുന്നു ഈ താരത്തിന് ലഭിച്ചത്. വിപിന്‍ മോഹന്റേയും ഗിരിജ കുമാരിയുടേയും മകളായ മഞ്ജിമ ചെറുപ്രായത്തില്‍ തന്നെ നൃത്തം അഭ്യസിച്ചിരുന്നു. കളിയൂഞ്ഞാല്‍, മയില്‍പ്പീലിക്കാവ്, സാഫല്യം, തെങ്കാശിപ്പട്ടണം, മധുരനൊമ്ബരക്കാറ്റ്, പ്രിയം തുടങ്ങിയ സിനിമകളില്‍ ബാലതാരമായിട്ടായിരുന്നു താരം അഭിനയിച്ചത്. ബാലതാരമായി പ്രേക്ഷക മനസ്സില്‍ നിറഞ്ഞുനിന്ന താരം പിന്നീട് നായികയായി സിനിമയിലേക്ക് തിരിച്ചെത്തുമെന്ന് അന്നേ പ്രേക്ഷകര്‍ ഉറപ്പിച്ചിരുന്നു.

13 വര്‍ഷത്തിന് ശേഷമാണ് നിവിന്‍ പോളിക്കൊപ്പം താരം നായികയായി തുടക്കം കുറിച്ചത്. മലയാളത്തില്‍ നായികയായി അരങ്ങേറിയതിന് പിന്നാലെയായാണ് താരത്തിനെ തേടി അന്യഭാഷയിലെ സിനിമാപ്രവര്‍ത്തകരും എത്തിയത്. വടക്കന്‍ സെല്‍ഫി ഇറങ്ങി രണ്ടാഴ്ച കഴിയുന്നതിനിടയിലായിരുന്നു ഗൗതം മേനോന്‍ വിളിച്ചത്. അദ്ദേഹം സന്ദേശം അയച്ചത് തന്നെ പറ്റിക്കാനായി ആരോ ചെയ്യുന്ന കാര്യമാണ് ഇതെന്നായിരുന്നു തോന്നിയത്. പിന്നീട് അദ്ദേഹം വിളിച്ചപ്പോഴാണ് അക്കാര്യത്തെക്കുറിച്ച്‌ കൃത്യമായി മനസ്സിലാക്കിയത്. അച്ചം യെന്‍പത് മടമയ്യടായെന്ന സിനിമയില്‍ ചിമ്ബുവിന്റെ നായികയാണ് താരമെത്തിയത്. എആര്‍ റഹ്മാനായിരുന്നു സിനിമയ്ക്ക് സംഗീതമൊരുക്കിയത്.

ഇടയ്ക്ക് മേക്കോവര്‍ നടത്തിയും താരം ഞെട്ടിച്ചിരുന്നു. ചിമ്ബുവിനൊപ്പമാണ് അഭിനയിക്കാന്‍ പോവുന്നതെന്നും ഇരുവരും പ്രണയത്തിലാണെന്ന തരത്തിലുമുള്ള റിപ്പോര്‍ട്ടുകളായിരുന്നു ഒരുകാലത്ത് പ്രചരിച്ചിരുന്നത്. അപ്പോഴായിരുന്നു ഒളിച്ചോട്ടത്തെക്കുറിച്ച്‌ റിമി ചോദിച്ചത്. അങ്ങനെയൊരു പ്ലാനില്ലെന്നും വീട്ടില്‍ പറഞ്ഞാല്‍ സമ്മതിക്കുമെന്നുമായിരുന്നു താരം പറഞ്ഞത്. വിപിന്‍ മോഹനും ഗിരിജ മോഹനും അങ്കിളായ വേണുവും പരിപാടിയില്‍ പങ്കെടുക്കാനെത്തിയിരുന്നു.

മഞ്ജിമയുടെ അച്ഛൻ വിപിൻ മോഹനും അമ്മ ഗിരിജയും പ്രണയിച്ച് വിവാഹം കഴിച്ചവരാണ്. ആ കഥയും പരിപാടിയിലൂടെ ഇവർ പങ്കുവയ്ക്കുകയുണ്ടായി. നർത്തകി കൂടിയായ കലാമണ്ഡലം ഗിരിജ ഒരു മലയാളചിത്രത്തിൽ അഭിനയിച്ചിട്ടുണ്ട്. ഭരത് ഗോപി ആദ്യമായി സംവിധാനം ചെയ്ത ഞാറ്റടി എന്ന ചിത്രത്തിൽ നായികായയിരുന്നു ഗിരിജ. 1979ൽ ചിത്രീകരിച്ച സിനിമയിൽ മുരളിയായിരുന്നു നായകൻ. ഛായാഗ്രഹണം വിപിൻ മോഹനും.

ക്യാമറയിൽ കൂടി കണ്ടിട്ടാണ് ഗിരിജയെ പ്രണയിച്ചതെന്ന് വിപിൻ മോഹൻ പറഞ്ഞു. ക്യാമറ കാണുമ്പോഴേ ഇപ്പോൾ പേടിയാണെന്ന് ഗിരിജയും മറുപടിയായി പറഞ്ഞു. ‘അഭിനയിക്കാൻ പോകില്ലെന്ന ഉറപ്പിലാണ് ഞങ്ങൾ വിവാഹിതരായത്. വേറൊരു ചിത്രത്തിനായി വിളിച്ചപ്പോഴും പോകല്ലേ പോകല്ലേ എന്ന് അദ്ദേഹം പറഞ്ഞിരുന്നു. അങ്ങനെ ആദ്യ ചിത്രത്തോടെ അഭിനയം ഉപേക്ഷിച്ചു.’–ഗിരിജ പറഞ്ഞു.

ജീവിത്തിലെ ഒരുപാട് നല്ല നിമിഷങ്ങളെക്കുറിച്ച് മൂവരും സംസാരിച്ചു. ഇത്രയും നാളുകളായിട്ടും ജീവിതത്തിൽ തന്നെയാരും പ്രപ്പോസ് ചെയ്തിട്ടില്ലെന്നും ബോയിഷ് ക്യാരക്ടർ ഉള്ളതുകൊണ്ടാകാം അങ്ങനെ സംഭവിക്കാത്തതെന്നും മഞ്ജിമ പറഞ്ഞു. ഇപ്പോഴും സിംഗിളാണെന്നും തന്നേക്കാളുപരി തന്റെ അച്ഛനെയും അമ്മയെയും ഇഷ്ടപ്പെടാൻ കഴിയുന്ന ആളായിരിക്കണം ഭാവി വരനെന്നും നടി പറഞ്ഞു.