പത്തനാപുരം പുനലൂര്‍ സ്വദേശിയായ പ്രേംകുമാര്‍ ആണ് അഭ്യര്‍ത്ഥനയുമായി എത്തിയത്. ഇത് ശ്രദ്ധയില്‍പ്പെട്ടതോടെ കഴിയുന്ന സഹായം ചെയ്യണമെന്ന സന്ദേശം ആരാധകര്‍ ഗ്രൂപ്പുകളിലും മറ്റും പങ്കുവെച്ചു. പിന്നാലെ കമന്റ് മമ്മൂട്ടിയുടെ ശ്രദ്ധയില്‍പ്പെട്ടതായി മമ്മൂട്ടിയുടെ ജീവകാരുണ്യ പ്രവര്‍ത്തനങ്ങള്‍ ഏകോപിപ്പിക്കുന്ന ചുമതല വഹിക്കുന്ന റോബര്‍ട്ട് കുര്യാക്കോസ് ഫേസ്ബുക്കില്‍ കുറിക്കുകയായിരുന്നു. കഴിഞ്ഞ രണ്ട് ദിവസമായി ചര്‍ച്ചയാകുന്നത് മെഗാസ്റ്റാര്‍ മമ്മൂട്ടിയുടെ പേജില്‍ പ്രേംകുമാര്‍ എന്ന യുവാവ് കുറിച്ച കമന്റ് ആണ്. 'ഞാന്‍ അസുഖ ബാധിതനായി നാലുവര്‍ഷം കിടപ്പിലാണ്. എന്റെ വീടും സ്ഥലവും ഇപ്പോള്‍ ജപ്തി ഭീഷണിയിലാണ്.

എന്നെ എങ്ങനേലും സഹായിക്കണം മമ്മൂക്ക'-എന്നായിരുന്നു കമന്റ്. കമന്റ് എത്തിയതിനു പിന്നാലെ പ്രേംകുമാറിന് വേണ്ട സഹായങ്ങള്‍ എത്തിച്ച്‌ നല്‍കാന്‍ മമ്മൂട്ടി ഫാന്‍സ് രംഗത്തെത്തിയിരുന്നു. ഇപ്പോള്‍ ആ കമന്റില്‍ ഒടുവില്‍ മമ്മൂട്ടിയും ഇടപ്പെട്ടിരിക്കുകയാണ്. പ്രേംകുമാറിന്റെ മക്കളുടെ വിദ്യാഭ്യാസ ചെലവ് ഇനി താരം വഹിക്കും. എല്ലാ ചെലവുകളും ഏറ്റെടുക്കാമെന്ന് മമ്മൂട്ടി അറിയിച്ചു. ഇതിന്റെ ഭാഗമായി താരത്തിന്റെ പ്രതിനിധി പ്രേംകുമാറിന്റെ വീട്ടില്‍ ഉടനെ എത്തും. മമ്മൂട്ടിയുടെ ഫേസ്ബുക്ക് പേജില്‍ മധുരരാജ പോസ്റ്റ് പങ്കുവെച്ചതിനു താഴെയാണ് പ്രേംകുമാര്‍ തന്റെ പ്രാരാബ്ദങ്ങളും മറ്റും തുറന്നെഴുതിയത്. തനിയ്ക്ക് വീടും സ്ഥലവുമില്ലെന്നും അദ്ദേഹം തുറന്നെഴുതി.