ഇപ്പോള്‍ ആരാധകര്‍ക്ക് നടിമാരോട് കൂടെ നിന്ന് സെല്‍ഫിയെടുത്താല്‍ മാത്രം പോരാ... അവരെ കെട്ടിപ്പിടിച്ച് നിന്ന് തന്നെ ഫോട്ടോ എടുക്കണം. നടി വിദ്യാബാലനാണ് ആരാധകനില്‍ നിന്ന് മോശം അനുഭവം ഉണ്ടായിരിക്കുന്നത്. കൊല്‍ക്കത്ത വിമാനത്താവളത്തില്‍ വച്ചായിരുന്നു സംഭവം. വിദ്യയുടെ പുതിയ ചിത്രമായ ബീഗം ജാനിന്റെ പ്രമോഷന്‍ പരിപാടികളുമായുള്ള യാത്രയ്ക്കിടയില്‍ കൊല്‍ക്കത്തയില്‍ വച്ചായിരുന്നു സംഭവം.

വിദ്യയെ കണ്ട് ആരാധന്‍ ഒപ്പം നിന്നു സെല്‍ഫി എടുക്കണം എന്ന ആവശ്യവുമായി എത്തി. വിദ്യ ഇതിനു സമ്മതം മൂളുകയും ചെയ്തു. തുടര്‍ന്നു ഫോട്ടോയ്ക്കു പോസ് ചെയ്യാന്‍ എത്തിയ ആരാധകന്‍ വിദ്യയെ കയറി പിടിക്കുകയായിരുന്നു.

താരം അയാളോടു കയ്യെടുക്കാന്‍ ആവശ്യപ്പെട്ടു. ഇതോടെ ആരാധകന്‍ കയ്യെടുത്തു. എന്നാല്‍ ഫോട്ടോ എടുക്കാനായി നിന്നപ്പോള്‍ വീണ്ടും ഇയാള്‍ വിദ്യയെ ചുറ്റി പിടിക്കുകയായിരുന്നു. അതോടെ വിദ്യയുടെ സകലനിയന്ത്രണവും വിട്ടു. തുടര്‍ന്നു വിദ്യ ഇയാളോടു പൊട്ടിത്തെറിച്ചു. മാത്രമല്ല കരണത്തൊരണ്ണം പൊട്ടിക്കുകയും ചെയ്തു. സിനിമതാരങ്ങള്‍ പൊതുസ്വത്ത് അല്ല എന്നും അവര്‍ക്ക് ഒരു സ്വകാര്യ ജീവിതം ഉണ്ടെന്നും അതിനെ മാനിക്കണം എന്നും സംഭവത്തെക്കുറിച്ച് വിദ്യ പ്രതികരിച്ചു.