സൂപ്പര്‍താരം ഷാരൂഖ് ഖാന്റെ ഉള്‍പ്പെടെ സിനിമകള്‍ കേരളത്തില്‍ പരാജയപ്പെട്ടപ്പോള്‍ ആസിഫ് അലിയുടെ സണ്‍ഡേ ഹോളിഡേ പണം വാരുന്നു. അടുത്തിടെ ഇറങ്ങിയ, എല്ലാത്തരം പ്രേക്ഷകരെയും രസിപ്പിക്കുന്ന ചിത്രമാണിത്. ആസിഫ് അലിക്ക് നല്ലൊരു വിജയവും. കഥയല്ല കഥപറയുന്ന രീതിയാണ് സിനിമയെ വ്യത്യസ്തമാക്കുന്നത്. അമാനുഷികതയോ, അശ്ലീല സംഭാഷണമോ, ദ്വയാര്‍ത്ഥ പ്രയോഗമോ ഇല്ലാതെ കുടുംബ സമേതം കാണാവുന്ന ചിത്രം. തിരുവനന്തപുരത്ത് മാത്രം രണ്ട് തിയേറ്ററുകളില്‍ നല്ല കളക്ഷനില്‍ മുന്നേറുകയാണ്. ആസിഫ് അലിയേക്കാള്‍ നായിക അപര്‍ണാ ബാലമുരളിയാണ് കയ്യടി നേടുന്നത്. ചിത്രത്തിന്റെ തമിഴ്, തെലുങ്ക് അവകാശം ഇതിനകം വിറ്റ് പോയി. 

സിനിമയ്ക്കുള്ളിലെ സിനിമ എന്ന രീതിയിലാണ് കഥ വികസിക്കുന്നത്. കഥ പറയാന്‍ സംവിധായകരുടെ വീടുകള്‍ തോറും കയറിയിറങ്ങുന്ന കോളജ് അധ്യാപകന്‍ ഒരിക്കല്‍ ആസ്പത്രി കിടക്കയിലുള്ള സംവിധായകന്‍ ഡയമണ്ട് പോളിന്റെ അടുത്ത് കഥപറയാന്‍ ചെല്ലുന്നു. കോമണ്‍സെന്‍സില്ലാത്ത അധ്യാപകനെ സംവിധായകന്‍ ഇറക്കിവിട്ടു. പക്ഷെ, പിന്നീട് അദ്ദേഹം അയാളെ വിളിച്ച് വരുത്തി കഥ കേള്‍ക്കുന്നു. ആ കഥയാണ് സണ്‍ഡേ ഹോളിഡേ. കഥ പറയാന്‍ നടന്ന് അലയുന്ന ഒരുപാട് പേരുടെ ജീവിതത്തിലെ പ്രശ്‌നങ്ങളും അവരുടെ തളരാതെയുള്ള പരിശ്രമവുമാണ് ചിത്രത്തിന്റെ ഉള്ളടക്കം.

സൂപ്പര്‍ താരങ്ങളടക്കം തങ്ങളുടെ ഇഷ്ടക്കാരെ വച്ച് സിനിമ എടുത്ത് പരാജയം ഏറ്റുവാങ്ങുമ്പോള്‍ പുതിയ സംവിധായകര്‍ മനുഷ്യനും സമൂഹവും ഇഴചേര്‍ന്ന് നില്‍ക്കുന്ന കഥ പറയുന്ന സിനിമകള്‍ വിജയിക്കുകയാണ്. തൊണ്ടിമുതലും ദൃക്‌സാക്ഷിയും അതിന് ഉദാഹരണമാണ്. ദിലീപ് ജയിലില്‍ ആയതോടെ സൂപ്പര്‍താര ചിത്രങ്ങളുടെ കളക്ഷനിലും കുറവ് വന്നിട്ടുണ്ട്. കഥ നന്നായെങ്കില്‍ താരം പ്രശ്‌നമേയല്ല എന്ന നിലയിലേക്ക് കാര്യങ്ങള്‍ നീങ്ങുകയാണെന്നാണ് ഇത് സൂചിപ്പിക്കുന്നത്.