മഞ്ജുവാര്യര്‍ വീണ്ടും നാടകത്തില്‍ അഭിനയിക്കുന്നു. കാവാലം നാരായണപ്പണിക്കരുടെ ശാകുന്തളത്തില്‍ അഭിനയിച്ചതിന് ശേഷം താരം വീണ്ടും സ്‌റ്റേജിലെത്തുകയാണ്. മോഹന്‍ലാലിനെയും മുകേഷിനെയും കേന്ദ്രകഥാപാത്രങ്ങളാക്കി ഛായാമുഖി എന്ന നാടകം സംവിധാനം ചെയ്ത പ്രശാന്ത് നാരായണന്‍ ആണ് നാടകം സംവിധാനം ചെയ്യുന്നത്. ശ്യാമമാധവം എന്നാണ് നാടകത്തിന്റെ പേര്. 

മഞ്ജുവാര്യര്‍ക്ക് കഥ ഇഷ്ടമായി. താരത്തിന്റെ തിരക്ക് കാരണമാണ് റിഹേഴ്‌സല്‍ അടക്കമുള്ള കാര്യങ്ങള്‍ നീണ്ട് പോകുന്നത്. ഒടിയന്‍ എന്ന ചിത്രം പൂര്‍ത്തിയാക്കിയ ശേഷം മഞ്ജു നാടകത്തിന്റെ പ്രവര്‍ത്തനങ്ങളുമായി മുന്നോട്ട് പോകുമെന്നറിയുന്നു.

കാവാലം നാരായണപ്പണിക്കരുടെ ഓര്‍മയ്ക്കായാണ് അദ്ദേഹം തന്നെ സംവിധാനം ചെയ്ത ശാകുന്തളം എന്ന സംസ്‌കൃത നാടകം കഴിഞ്ഞ വര്‍ഷം മഞ്ജുവാര്യര്‍ അവതരിപ്പിച്ചത്. തിരുവനന്തപുരം ടാഗോര്‍ തിയേറ്ററിലെ നിറഞ്ഞ സദസിലായിരുന്നു നാടകം.

 താരത്തിന്റെ വര്‍ഷങ്ങളായുള്ള ആഗ്രഹമായിരുന്നു കാവലത്തിനൊപ്പം സഹകരിക്കണമെന്ന്. പലതവണ അദ്ദേഹത്തെ നേരില്‍ കണ്ട് ഇക്കാര്യം പറഞ്ഞതുമാണ്. എന്നാല്‍ മരണ ശേഷമാണ് കാവാലത്തിന്റെ നാടകത്തില്‍ അഭിനയിക്കാന്‍ കഴിഞ്ഞത്. സിനിമയിലും നാടകത്തിലും അടക്കമുള്ളവര്‍ താരത്തെ അഭിനന്ദിച്ചിരുന്നു. അതിന് ശേഷമാണ് വീണ്ടും നാടകത്തില്‍ അഭിനയിക്കണമെന്ന് തോന്നിയത്. നാടകത്തില്‍ പലവിധ പരീക്ഷണങ്ങളും നടത്തുന്നയാളാണ് പ്രശാന്ത്. മമ്മൂട്ടി അടക്കമുള്ളവര്‍ പ്രശാന്തിന്റെ നാടകത്തില്‍ അഭിനയിക്കാന്‍ താല്‍പര്യമുള്ളവരാണ്.