തന്റെ ഏത് സിനിമ ഹിറ്റായാലും ആഘോഷത്തിന്റെ ഭാഗമായി രണ്ട് പെഗ്ഗ് കഴിക്കുമെന്ന് വിദ്യാബാലന്‍. ഭര്‍ത്താവിന്റെ അനുവാദത്തോടെയാണിതെന്നും താരം വ്യക്തമാക്കി. ഒരു ഇംഗ്ലീഷ് മാഗസിന് നല്‍കിയ അഭിമുഖത്തിലാണ് തന്റെ ചില സ്വകാര്യതകള്‍ പങ്കുവച്ചത്.

ഓരോ സിനിമയുടെ ചിത്രീകരണം കഴിയുമ്പോഴും ആഘോഷം ഉണ്ടാകും. സിനിമയില്‍ കിട്ടുന്ന അവസരങ്ങളെല്ലാം വാരിക്കൂട്ടാറില്ല. കഥ ഇഷ്ടപ്പെട്ടാല്‍ മാത്രമേ കാള്‍ഷീറ്റ് കൊടുക്കൂ. അഭിനയത്തിന് പുറമേ എഴുതുകയും ചെയ്യുമെന്നും വിദ്യ വെളിപ്പെടുത്തി. ധാരാളം കഥകള്‍ എഴുതിയിട്ടുണ്ട്. പക്ഷെ, ഒന്നും പ്രസിദ്ധീകരിച്ചിട്ടില്ല. എഴുതിയ സൃഷ്ടികള്‍ നല്ല സുഹൃത്തിനെ പോലെയാണ്. സമയം ഇല്ലാത്തതിനാല്‍ ഇപ്പോള്‍ എഴുതാറില്ലെന്നും താരം സമ്മതിച്ചു.

സിനിമ കണ്ട് രസിക്കുന്ന പ്രേക്ഷകര്‍ക്ക് നടിമാരെ കുറിച്ച് മതിപ്പില്ല, അത് തന്നെ വിഷമിപ്പിക്കുന്നുണ്ടെന്നും വിദ്യാബാലന്‍ പറയുന്നു. നടിമാര്‍ എന്ന് കേള്‍ക്കുമ്പോള്‍ എല്ലാവരുടെയും മനസില്‍ അവജ്ഞാ പൂര്‍വമായ ധാരണയാണ്. അതേസമയം അവരെ മനസില്‍ സങ്കല്‍പ്പിച്ച് ആരാധിക്കുന്ന ഒരു വിഭാഗമുണ്ട്. പക്ഷെ, അത് ശാശ്വതമല്ലതാനും.

ഒരു നടിയുടെ ജീവിതം എത്രത്തോളം പരിതാപകരമാണെന്ന് അറിയാന്‍ സില്‍ക്ക് സ്മിതയായി താന്‍ അഭിനയിച്ച ഡേര്‍ട്ടി പിക്ച്ചര്‍ കണ്ടാല്‍ മതിയെന്നും വിദ്യാബാലന്‍ പറഞ്ഞു. തെന്നിന്ത്യക്കാരിയെന്ന നിലയ്ക്ക് സില്‍ക്ക് സ്മിതയുടെ എല്ലാ സിനിമകളും കണ്ടിട്ടുണ്ടെന്നും വളരെ വ്യത്യസ്തമായ അഭിനയമാണ് അവരുടേതെന്നും താരം ഓര്‍ക്കുന്നു.

സില്‍ക്ക് സ്മിത അഭിനയിച്ച പല സിനിമകളുടെയും വിജയഘടകങ്ങളിലൊന്ന് അവരായിരുന്നു. പക്ഷെ, ജീവിതത്തില്‍ അവര്‍ ഏകാകിയായിരുന്നു. വെറുപ്പിനും ചതിക്കും വഞ്ചനയ്ക്കും മധ്യേ അവര്‍ ജീവിച്ചു പോന്നിരുന്നു. വളരെ ശോചനീയമായ ജീവിതം. ഒടുവില്‍ ആത്മഹത്യ ചെയ്തു. അതിന് തക്കതായ ഒരു തെറ്റും അവര്‍ ചെയ്തിട്ടില്ലെന്നും വിദ്യാബാലന്‍ വ്യക്തമാക്കി. താന്‍ സിനിമയില്‍ കാലുറപ്പിക്കാനെടുത്ത കാലതാമസം അമ്മയ്ക്ക് വലിയ വിഷമമുണ്ടാക്കിയെന്നും അതേസമയം അച്ഛന് ആത്മവിശ്വാസം ഉണ്ടായിരുന്നെന്നും താരം പറയുന്നു.