ലോകം മുഴുവന്‍ ശ്രദ്ധാകേന്ദ്രമായ പ്രിയാ വാര്യരെച്ചൊല്ലി ബാബു ആന്റണിക്ക് ഉറക്കം നഷ്ടപ്പെടുന്നു. ഒരൊറ്റ കണ്ണിറുക്കല്‍ കൊണ്ട് ലോകം മുഴുവനും ഫാന്‍സിനെ സൃഷ്ടിച്ച പ്രിയ ഇന്റര്‍നെറ്റിലെ തരംഗമായി മുന്നേറുകയാണ്. കണ്ണടച്ച് തുറക്കുന്ന വേഗതയിലാണ് പ്രിയയുടെ ഇന്‍സ്റ്റഗ്രാം പേജില്‍ ഫോളോവേഴ്‌സ് കൂടുന്നത്.

എന്നാല്‍ ഇതൊന്നും അമേരിക്കയില്‍ താമസിക്കുന്ന ബാബു ആന്റണി അറിഞ്ഞിരുന്നില്ല. അങ്ങിനെ ഇരിക്കുമ്പോഴാണ് ബാബു ആന്റണിയുടെ ഫോണ്‍ നിലയ്ക്കാതെ അടിക്കാന്‍ തുടങ്ങിയത്. എല്ലാവര്‍ക്കും ഒരു കാര്യം അറിഞ്ഞാല്‍ മതി. പ്രിയാ വാര്യരെ അറിയാമോ? ചില തമിഴ് പത്രക്കാരും പ്രിയയെ തിരക്കി ബാബു ആന്റണിയെ വിളിച്ചിരുന്നു. തൃശൂരിലെ പൂങ്കുന്നം കാരിയായ പ്രിയ തന്റെ നാടായ പൊന്‍കുന്നംകാരിയാണ് എന്ന് വിചാരിച്ചാണ്രേത പലരും ബാബു ആന്റണിയെ വിളിച്ചത്.

ബാബു ആന്റണി ഫേസ്ബുക്കിലൂടെയാണ് തന്റെ അനുഭവം പങ്കുവച്ചത്

പൊന്‍കുന്നവും പൂങ്കുന്നവും പ്രിയ വാരിയരും.

ഒരുപാടു മെസ്സേജുകള്‍ വന്നു.. ബാബു ചേട്ടാ പ്രിയ വാര്യര്‍ നൈബര്‍ ആണോ? ചില തമിഴ് പത്രക്കാരും വിളിച്ച് ചോദിച്ചു, ഞാന്‍ ആകെ അന്തംവിട്ടു. ആരാണ് പ്രിയ വാര്യര്‍??. അറിയില്ല എന്ന് പറഞ്ഞാല്‍ എന്നെ അറിയുന്ന ആളാണെങ്കില്‍ മോശമല്ലേ എന്ന് കരുതി ഒരു തരത്തില്‍ തടിതപ്പി. ഉടനെ ഗൂഗിള്‍ ചെയ്തപ്പോഴാണ് സംഭവം പിടികിട്ടിയത്.

പ്രിയ വാര്യര്‍ ഓണ്‍ലൈന്‍ സെന്‍സേഷന്‍ ആണെന്നും കണ്ണിറുക്കിയും സൈറ്റ് അടിച്ചും ലക്ഷങ്ങളെ വീഴ്ത്തിയെന്നും മറ്റും. പ്രിയയുടെ നാട് പൂങ്കുന്നവും എന്റെ നാട് പൊന്‍കുന്നവും. അത് രണ്ടും ഒരു സ്ഥലമാണെന്ന് കരുതിയാണ് എനിക്ക് മെസ്സേജുകള്‍ വരുന്നത്. ഏതായാലും ആ കുട്ടിക്ക് എന്റെ എല്ലാവിധ ആശംസകളും. പുതിയ പുതിയ താരങ്ങള്‍ ജനിക്കട്ടെ. ബാബു ആന്റണി.